navarra.es
Castellano | Euskara | Français | English
Ezagutzera eman
36/2002 Foru Agindua, martxoaren 14koa, Industria eta Teknologia, Merkataritza, Turismo eta Lan kontseilariak emana, lana eskatzen duten emakumeak hurbileko zerbitzuetan lanean hasteko laguntzak emateko araubidea ezartzen duena
(2002ko 47. NAOn argitaratutako testua, apirilaren 17an)
Atarikoa
Ikusirik enplegurako politika aktiboen kudeaketan azken urteotan hartutako esperientzia eta erakunde batzuek egindako azterlanak, esan daiteke, alde batetik, enplegua sortzeko aukerak daudela, enplegu-hobi berrietan, pertsonentzako zerbitzuetan eta hurbileko zerbitzuetan zehazki, eta, bestetik, gaur egun emakume langabeak ari direla zerbitzu horiek ematen, lurpeko ekonomiaren barruan.
Nafarroako Gobernuak eta sindikatu eta enpresa erakunderik garrantzitsuenek Nafarroako Enplegu Plana sinatu zuten 2002-2004 urteetarako. Haren helburuen eta emakumeen enplegua bultzatzeko neurrien arteko bat "hurbiltasuneko zerbitzuetako laguntza" ezartzea da, hiru urte horietan 901.520 euroko kontsignazioa izanen duena. Neurri hori aplikatzeko, Nafarroako Enplegu Zerbitzuaren 2002ko aurrekontuan bada "emakumeak hurbileko zerbitzuetan birtxertatzeko ekintzak" izeneko kontusail bat, 300.506 euroz hornitua.
Foru Agindu honen xedea jardunbide zehatz bat ezartzea da. Dirulaguntzak emanen dira aipatu datatik aurrera ekonomia sozialaren modalitateren baten edo sozietate irregularren nahiz fundazioen gisara eta zaharrei eta/edo ezinduei eta haurrei laguntza emateko eratzen diren enpresek emakume langabeak kontratatzeko. Funtsezko helburua da lurpeko ekonomiaren barrenean ematen ari diren lan eta zerbitzu horiek ahalik eta gehiena azaleratu eta lan normalizatuaren esparrura sartzea.
Apirilaren 29ko 148/1998 Foru Dekretuan xedaturikoari jarraikiz, Nafarroako Enplegu Zerbitzua, Industria eta Teknologia, Merkataritza, Turismo eta Lan Departamentuari atxikitako erakunde autonomoa dena, Nafarroako Foru Komunitatean enpleguari loturiko ekintzak burutzeko baliabide nagusia da.
Ikusirik aipatu arauak eta Nafarroako Enplegu Zerbitzuko Zuzendaritza Kontseiluaren adostasun txostena
Hori horrela, agindu dut:
1. artikulua. Xedea.
Agindu honen helburua laguntzak ematea da, emakume langabeek hurbileko zerbitzuetan lan egin dezaten.
2. artikulua. Hurbileko zerbitzuak.
1.-Foru Agindu honen ondorioetarako, hurbileko zerbitzuak ondoko hauek dira:
A.-Funtsezko premiak asetzeko beste norbaiten laguntza behar duten pertsonei laguntza eta zerbitzuak ematea, etxean edo, aldi batez, ospitalean.
B.-12 urtez beheitikoak lagundu eta zaintzea, eskola edo haurtzaindegitik kanpo.
2.-Famili Etxearen Zerbitzua, abuztuaren 1eko 1424/1985 Errege Dekretuaren bidez arautua, Foru Agindu honen aplikazio eremutik at dago.
3. artikulua. Onuradunak.
Foru Agindu honetako laguntzak hartu ahalko dituzte bigarren artikuluan azaldutako zerbitzuak emateko ekonomia sozialaren modalitateren baten edo sozietate irregularren nahiz fundazioen gisara eratzen diren enpresek.
4. artikulua. Diruz lagun daitezkeen egoerak.
Aurreko artikuluan aipaturiko enpresek emakumeak kontratatzeko dirulaguntza jasoko dute baldin eta emakume horiek bulego publikoetan lan eskatzaile gisara inskribaturik badaude eta ondoren azaltzen diren taldeetakoak badira:
A.-Gizartean bazterturik dauden edo egoteko arriskua duten emakumeak. Betiere, Nafarroako Gizartearen Institutuak ziurtatu beharko du egoera hori.
B.-40 urtez goitiko emakumeak.
C.-Aurreko taldeetan ez dauden emakumeak.
5. artikulua. Enplegua sortzeagatik emanen diren laguntzak.
1.-Foru Agindu honetan ezarritakoari jarraikiz sortzen diren enpleguengatik ondoko laguntza hauek emanen dira:
A.-204 euro hilean, 4. artikuluko A taldeko emakumeak direnean, gehienez 36 hilabetez.
B.-162 euro hilean, 4. artikuluko B taldeko emakumeak direnean, gehienez 24 hilabetez.
C.-120 euro hilean, 4. artikuluko C taldeko emakumeak direnean, gehienez 12 hilabetez.
2.-Dirulaguntza horiek emateko, beharrezkoa izanen da kontratazio horien asteko lanaldia 30 ordukoa edo handiagoa izatea. Lanaldia txikiagoa izanez gero, diru kopurua zati proportzionalean murriztuko da.
6. artikulua. Laguntza teknikorako dirulaguntzak.
Hirugarren artikuluan azaldutako enpresek laguntza teknikorako dirulaguntza jaso ahalko dute.
Laguntza teknikoa kaudimen profesionalaren bermeak dituzten enpresa edo pertsona fisiko espezializatuek emanen dute, eta ondoko hauetako bat izan ahalko da:
-Zuzendari nagusia edo kudeatzailea kontratatzea.
Kostuaren % 80a bitarteko dirulaguntza emanen da kontratazioaren lehenbiziko urtean, gehienez 18.030 euro.
-Bideragarritasun, antolaketa, merkaturatze, diagnosi edo antzeko azterlanak, baimenak eta/edo dirulaguntzak eskatzeko administrazio espedienteen tramitazioan eskatutakoak izan ezik.
Dirulaguntza ekintzaren kostearen % 80ª bitartekoa izanen da eta gehienez 6.010 eurokoa.
7. artikulua. Eskabideak aurkezteko epea.
Dirulaguntzen eskabideak Nafarroako Enplegu Zerbitzuan aurkeztuko dira, Administrazio Publikoen Araubideari eta Guztiendako Administrazio Prozedurari buruzko Legean ezarritako edozein bideren bitartez, hurrengo artikuluan zehazturiko agiriekin batera.
2.-Eskabideak aurkezteko epea 3 hilabetekoa izanen da, kontratatu edo lanean hasi eta biharamunetik hasita.
8. artikulua. Agiriak.
1.-Eskabideak Nafarroako Enplegu Zerbitzuan eskura dagoen ereduaren araberakoak izanen dira eta haiekin batera, oro har, ondoko agiri hauek aurkeztuko dira:
a) Erakundearen edo entitatearen identitatea egiaztatzen duten agiriak: eratze eskrituraren, estatutuen eta erregistroko inskripzioaren fotokopia konpultsatuak. Agiri horiek aurretik Nafarroako Enplegu Zerbitzuan badaude eta haietan aldaketarik izan ez bada, ez dira aurkeztu beharko.
b) Entitate eskatzailearen legezko ordezkarien datu pertsonalak, eta, hala behar izanez gero, haien ahalordetzea eta jakinarazpenak igortzeko helbidea.
c) Zer laguntza eskatzen den eta haren zenbatekoa.
d) Identifikazio Fiskaleko Txartelaren fotokopia konpultsatua.
e) Nafarroako Ogasunari eta Gizarte Segurantzari ordaindu beharrekoa ordaindua duela frogatzen duten agiriak.
f) Transferentzia bidez ordaintzeko eskabidea, behar bezala betea, eskabidea onartuz gero, dirulaguntza pagatu ahal izateko.
g) Lan kontratuaren eta Gizarte Segurantzan dagokion araubideko alta agiriaren fotokopia konpultsatuak.
h) Nafarroako Enplegu Zerbitzuak eskatzen duen beste edozein agiri.
2.-Eskabidean edo aurkezturiko agirietan datu faltsurik aurkitzen baldin bada, zilegi izanen da, horren muntaren arabera, eskatutako dirulaguntza ukatzea, egon litezkeen gainerako erantzukizunak kendu gabe.
9. artikulua. Tramitazioa eta ebazpena.
Nafarroako Enplegu Zerbitzuko Zuzendaritza- Kudeatzailetzak ebazpena emanen du eskabideak aurkeztu eta biharamunetik hiru hilabeteko epean, gehienez.
Ebazpenak arrazoituak izanen dira eta haien berri, bai eta bidezko diren errekurtsoen berri ere, emanen zaie interesatuei.
Epe hori Nafarroako Enplegu Zerbitzuak berariazko ebazpena eman gabe agortzen bada, eskabidea ukatutzat emanen da.
Dirulaguntza hauek emateko beharrezkoa izanen da aurrekontuko "Emakumeak hurbileko zerbitzuetan lanean hasteko laguntzak emateko neurrien garapena" izeneko kontusailean dirua egotea.
10. artikulua. Ordaintzeko modua.
Dirulaguntza Nafarroako Enplegu Zerbitzuko Zuzendaritza- Kudeatzailetzaren ordainketa-ebazpenen bidez ordainduko da, Enplegua Sustatzeko Zerbitzuak adostasun txostena eman ondoren.
Zuzendari nagusia edo kudeatzailea kontratatzeko dirulaguntza aldez aurretik eta behin bakarrik ordainduko da, eman eta osorik ordaintzeko ebazpenaren bidez.
Azterlanak egiteko dirulaguntza, horiek bukatzean ordainduko da, egindako azterlana aurkeztu ondoren.
Diruz lagundutako hileroko kopuruak aldian behin ordainduko dira, dagozkion nominak aurkeztu ondoren.
11. artikulua. Onuradunen betebeharrak.
Dirulaguntzak hartzen dituzten enpresek ondoko betebehar hauek izanen dituzte:
a) Dirulaguntza kobratu aurretik, Nafarroako Ogasunari eta Gizarte Segurantzari ordaindu beharrekoa ordaindua dutela egiaztatuko dute.
b) Onetsi diren kontzeptuetarako erabiliko dute, eta ezarritako kopuruetan.
c) Dirulaguntzaren erabilpena egiaztatu, jarraitu eta ikuskatzeko egiten diren jarduketak eta Industria eta Teknologia, Merkataritza, Turismo eta Lan Departamentuko Kontu-hartzailetza Delegatuak egiten duen kontrol finantzarioa onartuko dituzte.
12. artikulua. Gastuen justifikazioa.
Enpresa onuradunek ondoko agiri hauek aurkeztu beharko dituzte:
a) Zuzendari nagusia edo kudeatzailea kontratatzeko:
1. Gizarte Segurantzan dagokion araubidearen kotizazio agiriak, diruz lagundutako denboraldikoa.
2. Diruz lagundutako pertsonaren nominak, behar bezala sinatuak.
b) Azterlanak:
1.Egindako ordainketaren fakturak eta frogagiriak.
c) Diruz lagundutako hileroko zenbatekoak.
1. Gizarte Segurantzan dagokion araubidearen kotizazio agiriak, diruz lagundutako denboraldikoa.
2. Nominak, behar bezala sinatuak.
13. artikulua. Jarraipena eta kontrola.
Dirulaguntzak hartzen dituzten enpresek emakumeak hurbileko zerbitzuetan lanean hasteko araubide honen kargura laguntzen diren prozesuei buruzko informazioa emanen diote aldian behin Nafarroako Enplegu Zerbitzuari.
14. artikulua. Ez betetzea.
Laguntzak hartzeko ezarritako baldintzak bete ezean, laguntzak deuseztatuko dira eta dagokion zatia itzuliko, eta, gainera, horri buruz irekitzen ahal diren zehapen espedienteak irekiko dira.
15. artikulua. Laguntzen bateragarritasuna.
Ematen diren dirulaguntzen zenbatekoa, bakarrik hartuta edo Administrazio honen edo beste Administrazio Publikoen nahiz estatuko edo nazioarteko bestelako ente publiko edo pribatuen laguntzekin batera, ez da izanen diruz lagundu beharreko kontzeptuaren edo onuradunak egin beharreko jardueraren kostuaren % 100 baino handiagoa.
16. artikulua. Ordezko arauak.
Foru Agindu honetan aurreikusi ez den orotan, Nafarroako Foru Komunitatearen eta haren erakunde autonomoen dirulaguntzak eman, kudeatu eta kontrolatzeko araubide orokorra erregulatzen duen ekainaren 9ko 8/1997 Foru Legean ezarritakoari jarraikiko zaio.
17. artikulua. De minimis klausula.
Foru Agindu honetan ezarritako laguntzak de minimis izaerakoak dira. Hortaz, Europako Batzordeak de minimis dirulaguntzei buruzko urtarrilaren 12ko EE 69/2001 Erregelamenduan ezarritako baldintzak bete beharko dira (EEAO, 2001-1-13).
Erregelamendu horren ondorioz, onuradunak ez du 100.000 euro baino gehiago jasoko 3 urteko epean.
Azken Xedapen Bakarra
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
