Asteazkenetik aurrera, hilak 31, Nafarroako Gobernuak zuzenean eskainiko ditu Nafarroako Jauregiko prentsa-aretoan egiten diren informazio-ekitaldi guztiak, YouTube sare sozialean duen kontuaren bidez (https://www.youtube.com/user/GobiernoNavarra). Neurri honek irisgarriago bihurtzen du zerbitzua, orain terminal informatiko guztietatik erabil baitaiteke (besteak beste, tabletak eta gailu mugikorrak). Orain arte, aplikazio informatiko baten bidez eskaintzen ziren prentsaurrekoak, eta mahai gaineko ordenagailuetatik soilik ikus zitezkeen.

Nafarroako Gobernuak prentsaurrekoen grabazio osorako esteka jarriko du navarra.es / nafarroa.eus bidez kaleratzen dituen eta Jauregiko prentsa-aretoan egin beharreko informazio-ekitaldiei dagozkien prentsaurrekoen behealdean. Horrela, hedabideek eta herritarrek geroago ikusi ahal izango dituzte. Era berean, ekitaldi publiko horien laburpenak jarriko ditu egunero YouTube kontuan, euskaraz eta gaztelaniaz, baita Twitter kontu ofizialean ere (@gob_na).

Informazio-ekitaldi horien grabazioak kalitate handian eta telebista-kanonera egokitutako formatuan egongo dira; horri esker, hedabide digitalek eta telebistek YouTube-tik deskargatu ahal izango dituzte irudiak, edo haietarako esteka erabili, eta, nahi izanez gero, erreproduzitu.

Nafarroako Gobernuak YouTube-n dituen zortzi kanal sektorialak zuzenean ikusteko aukera eskaintzen du Nafarroako Gobernuaren YouTube-ko profil ofizialak: Instituto Navarro de Deporte y Juventud, Carné Joven, Salud, Internacionalización, Turismo, Cultura, Festival Punto de Vista eta Euskarabidea.