navarra.es
Castellano | Euskara | Français | English
Ezagutzera eman
58/2012 Foru Agindua, otsailaren 9koa, Gizarte Politika, Berdintasun, Kirol eta Gazteriako kontseilariak emana, gizarteratze errentaren ohiz kanpoko eta berritze bereziko kasuak arautzen dituena
(Testu bateratua. Jatorrizkoa 2012ko 57. NAOn argitaratua, martxoaren 22an. Aldaketak: 193/2013 Foru Agindua, otsailaren 22koa)
Atarikoa
Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.17 artikuluak ezartzen du Nafarroako Foru Komunitateak erabateko eskumena duela gizarte laguntzaren arloan.
Eskubide sozialen gutun baterako apirilaren 6ko 9/1999 Foru Legearen bidez aldarrikatu zen Nafarroako herritarrek badutela eskubidea oinarrizko errenta jasotzeko, eta Nafarroako Gobernuari ahalmena eman zitzaion erregelamendu bidez hura garatu zezan. Ahalmen hori baliaturik, apirilaren 19ko 120/1999 Foru Dekretuaren bidez oinarrizko errenta arautu zen.
Egungo errealitate sozialak oinarrizko errentaren prestazioaren programa birmoldatzea eskatzen du, eta beharrezkotzat jotzen da arau aldaketa bat, bi ibilbide ezarriko dituena prestazioak jasoko dituztenentzat. Bata, gizartean bazterturik dauden familia unitateentzat, oinarrizko premiei erantzuteko eta gizarteratzen laguntzeko helburua izanen duen prestazio ekonomikoa jaso dezaten, eta bestea, langabezian eta laneko prestazio eta sorospenik gabe gelditu diren pertsonentzat.
Adierazitakoaren ildotik, urtarrilaren 23ko 1/2012 Foru Legearen bidez onetsi da gizarteratze errentaren erregulazio berria, prestazio horren helburuak eguneratzearren, gizartetik baztertuta dauden Nafarroako herritarrei arreta emateko.
Lege arau horren azken xedapenetako lehenak sei hilabeteko epea ezartzen du hark indarra hartuz geroztik Nafarroako Gobernuak, foru dekretu baten bidez, gizarteratze errentaren erregelamendua onets dezan.
Erregelamenduzko arau hori eman arte, aipatu foru legearen bigarren xedapen iragankorrak Gizarte Politika, Berdintasun, Kirol eta Gazteriako kontseilaria gaitzen du Gizarteratze Errenta arautzen duen Foru Legeak 3.2 artikuluan jasotako salbuespenak, prestazioa eskuratzeko baldintzei buruzkoak, ezar ditzan, baita 5. artikulua, prestazioa emateko gehieneko epeari buruzkoa, ezar dezan ere.
Hortaz, foru agindu honen bidez garatzen da lege xedapen hau hiru kapitulutan: xedapen orokorrak, laguntza emateko prozedura eta gizarte bazterketaren balorazioa, eta Gizarteratzearen Balorazio Batzordea.
I. kapituluak xedapenaren xedea, prestazioa eskuratzeko ohiz kanpoko kasuak eta gizarteratze errenta berritzeko egoera bereziak jasotzen ditu.
Atal honetan aipagarria da modu iragankorrean arautzen dela zer egoeratan izaten ahal diren eskatzaileak gizarteratze errentaren onuradun, adinaren baldintza betetzen ez dutenean edo Gizarteratze Errentari buruzko Foru Legearen 5. artikuluan aurreikusitako diru-sarrerak gainditzen dituztenean.
Halaber, azpimarratzekoa da ohiz kanpoko arrazoiei eta bazterketa finkatuaren egoerei buruz egin den aurreikuspena, zeinetan modu berezi batean berritzen ahalko zaien gizarteratze errenta hura 24 hilabetez jaso duten onuradunei.
II. kapituluak gizarteratze errentari buruzko foru lege berriaren ondoriozko prozedurako espezialitateak ezartzen ditu.
Alde horretatik, eskabidearekin batean aurkeztu beharreko dokumentazioa gaurkotzen da, araudian ezarritako baldintzak betetzen direla frogatzearren. Orobat, kasu horietan gizarte bazterketaren egoera baloratzeko modua zehazten da.
Azkenik, III. kapituluan Gizarteratzearen Balorazio Batzordea sortzen da, ohiz kanpoko kasuetan eta prestazio honen berrikuntza berezietan gizarte bazterketari buruzko txosten osagarria egin dezakeen kide anitzeko organo tekniko gisa.
Haren osaera eta erabakiak hartzeko araubidea zehazten dira, eta aurreikusten ez den hartan, kide anitzeko organoei buruzko erregulazio orokorrera jotzen da.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Gizarteratze Errenta arautzen duen urtarrilaren 23ko 1/2012 Foru Legeak eman dizkidaten eskudantziekin bat, agindu dut:
I. KAPITULUA. Xedapen orokorrak
1. artikulua. Xedea.
Gizarteratze errenta eskuratzeko ohiz kanpoko kasuak eta prestazio horren berritze berezia, Gizarteratze Errentari buruzko Foru Legearen 3.2 eta 5. artikuluetan aurreikusiak, arautzea du xede foru agindu honek, baita kasu horietan prestazioa emateko prozedura egokitzea ere.
2. artikulua. Prestazioa eskuratzeko ohiz kanpoko kasuak.
1. Gizarteratze errenta eskatzen dutenek, oro har, Gizarteratze Errenta arautzen duen urtarrilaren 23ko 1/2012 Foru Legearen 3. artikuluan aurreikusitako baldintzak beharko dituzte bete.
2. Salbuespen gisa, xedapen honetan deskribatzen diren egoera behartsuetan diren eskatzaileak gizarteratze errentaren onuradunak izaten ahal dira, nahiz ez bete Gizarteratze Errentari buruzko Foru Legearen 3. artikuluko baldintza, adinari edo diru-sarrerei buruzkoa.
3. artikulua. Adinaren baldintza zein kasutan salbuesten den.
Salbuespen gisa, 25 urtetik beherako pertsonak gizarteratze errentaren onuradunak izaten ahalko dira, egoera hauetako batean badaude:
a) Bi kideren edo gehiagoren arteko familia unitate independentea osatzen badute, eta haietako bat gutxienez gizarte zerbitzuen arloan eskumena duen departamentuak gizartean eta lanean txertatzeko kudeatu edo finantzatzen duen proiektu batean sartua izatea.
b) Familia unitate independentea izatea eta seme-alabak edo etxean hartutako adingabeak haren kargu izatea.
c) Adingabeak babesteko programetako batetik heldu diren 18 urtetik gorakoak, baldin eta erregulazioan ezarritako gainontzeko baldintzak betez emantzipazio edo desinstituzionalizazio programetan badaude, adingabeak babesteko eskumena duen administrazio unitateak jarraipena egiten diela.
4. artikulua. Errentako diru-sarreren baldintza zein kasutan salbuesten den.
Gizarteratze errenta arautzen duen urtarrilaren 23ko 1/2012 Foru Legearen 4.1 artikuluan aurreikusitako diru-sarreren muga gainditzen duten pertsonak prestazioaren onuradunak izaten ahal dira egoera behartsu hauetako batean daudenean:
a) Baztertuta eta gizartean zein lanean txertatzeko zailtasunak izanik, familia unitatean bizi diren pertsona bakarrak, beren bizitegirik ez dutenak, edo anai-arrebekin nahiz gurasoekin haien etxean bizitzera itzultzen direnak, deserrotze sozialeko prozesuen ondorioz; besteak beste, toxikomaniengatik, buruko eritasunagatik edo lan munduan sartzea zailtzen duten bestelako nahaste larriengatik.
Prestazioaren zenbatekoa kalkulatzeko, ez dira kontuan hartuko etxean hartzen duen familia unitatearen diru-sarrerak, hura osatzen duten pertsona kopuruaren arabera legokiokeen gizarteratze errenta halako bi arte, gehienez ere.
Diru-sarrerak gizarteratze errenta halako bi baino handiagoak badira, muga horretatik gorakoa familia unitateko pertsona kopuruaren artean hainbanatuko da. Ateratzen den kopurua etxean hartutako pertsonari egotziko zaio, dagokion gizarteratze errenta zehaztearren.
b) Lanean txertatzeko zentro okupazionaletan parte hartzeagatik haborokinak jasotzen dituzten gizarteratze errentaren eskatzaileak.
Lanean txertatzeko zentro okupazionalak baliatzen dituzten pertsonen gizarteratze errenta kalkulatzeko, ez zaie diru-sarrera gisa kontatuko haietan parte hartzeagatik haborokin edo laguntza ekonomiko gisa jasotzen dutena, hilabeteko lanbidearteko gutxieneko soldataren %50etik beherakoa denean. Salbuetsitako muga hori gainditzen duten kopuruak diru-sarrera konputagarriak izanen dira.
c) Erakunde publikoek sustaturik, gizartean eta lanean txertatzeko programetan ari diren 18 urtetik beherako kideen diru-sarrerak dituzten familia unitateak.
Kasu horretan, ez dira adingabeen diru-sarrerak kontuan hartuko urteko lanbidearteko gutxieneko soldata berdindu arte. Kopuru hori gainditzen duten diru-sarrerak konputatu eginen dira, gizarteratze errenta zehazteko.
d) Aldi baterako ostatua duten pertsonen egoera iragankorrak, oinarrizko beharrak beteta dituztela, baina desinstituzionalizazio prozesuari heldu behar diotenak funtzionamendu autonomoa lortzeko.
Kasu horretan, salbuespen gisa eta murriztera joz kudeatuko du laguntza, banan banako balorazioa eginez; betiere, gizarteratzeko erabakia edo gizartean eta lanean txertatzekoa bete beharko da. Ostatu emateko baliabideaz arduratzen den erakundeak bermatu beharko du eskaera.
5. artikulua. Gehieneko iraunaldia eta berritze bereziko kasuak.
Gizarteratze Errenta arautzen duen urtarrilaren 23ko 1/2012 Foru Legean aurreikusitakoari jarraituz, hasiera batean, sei hilabeterako emanen da gizarteratze errenta, eta beste sei hilabeterako berritzen ahalko da, harik eta hogeita lau hilabete egin arte, gehienez ere.
1. Prestazioaren gehieneko epealdia agortu gabe hura etenez gero, onuradunak eskubidea izanen du, etenaldi horretatik urtebeteko epean, gizarteratze errenta beste sei hilabeterako eskatzeko edo epe txikiago baterako, zein den kasua, 24 hilabeteak egin arte. 24 hilabeteko gehieneko epealdia agorturik, ez zaio berriz prestazio hori onuradunari emanen, hura azken hilabetean jaso eta 12 hilabete iragan arte.
2. Salbuespen gisa, aurreko atalean errenta kobratzeko ezarritako gehieneko epea iraganik, egoera hauetako batean dauden eskatzaileek errenta kobratzen segitzen ahalko dute, gainerako baldintzak ere betetzen badituzte:
a) Adingabeak zaintzeagatik ezinezkoa denean, salbuespenez eta denbora baterako, familia unitateko helduak lanean jartzea, eta betiere, 12 urtetik beherako adingabeak dituzten familia unitateen kasuan.
b) Familia unitatean osasun egoera larriak edo desgaitasun kasuak daudenean edo gerora sortzen direnean, eskatzaileari eta gainontzeko familiakide helduei edozein lan jarduera ordaindurik egitea zailtzen dietenak.
c) Familia unitateko kideren bat gizartean eta lanean txertatzeko prozesu trinko bukatu gabe batean dagoenean Nafarroako Administrazio Publiko batek zuzenean edo zeharka kudeatzen duen gizartean eta lanean txertatzeko zerbitzu batean, errenta luzatzearen aldeko txostena izanda. Luzapen hori 6 hilabetekoa izanen da, gehienez ere.
d) Familia unitateak etxebizitza arloko gizarteratze programa edo jarduketa batean parte hartzen ari direnean, eta gizartean integratzeko kontraturen bat sinatua baldin badute Gizarte Integrazioko Etxebizitzen eta Alokairu Sozialeko Etxebizitzen Programen lankidetzat hartutako entitateren batekin.
e) Eskatzailea 60 urtetik gorakoa denean eta duen adinagatik lan merkatuan sartzeko zailtasunak dituenean.
f) Eskatzaileak afekturik eta familiaren laguntzarik gabeko pertsonak direnean, bizi egoera orokorki hondatua dutenak. Izan ere, egoera horietan pertsonek deserrotze soziala bizi izaten dute hainbat arrazoirengatik (lanean jartzea zailtzen duten toxikomaniak, eritasun mentalak eta bestelako nahaste larriak).
g) Eskatzailea genero-indarkeria jasan duen emakumezkoa denean.
Foru lege honen ondorioetarako, genero-indarkeria jasan duela ondorioztatuko da honako baliabide hauen bitartez egiaztatzen denean egoera hori:
–Genero indarkeriako egintzengatik kondenatzeko epai irmoa, azkeneko bi urtean emana.
–Babesteko agindu indarduna.
–Fiskaltzaren txostena.
–Zerbitzu publiko batek luzatutako txosten teknikoa, eskatzaileak jasandako genero indarkeriaren gaineko irizpen profesionala eta egindako jarduketak jasotzen dituena. Esku-hartzea intentsiboa izatea eskatuko da ezinbestez, eta jasandako genero indarkeriaren ondoriozkoa izatea.
3. Artikulu honen 2.a), b), d) eta g) kasuetan, sei hilabeterako eginen dira ohiz kanpoko berritzeak; 2.c) idatz-zatikoan, sei hilabete arteko epeetarako; eta 2.e) eta f) idatz-zatietakoetan, 12 hilabete arteko epeetarako
.II. KAPITULUA. Laguntza emateko prozedura eta gizarte bazterketaren balorazioa
6. artikulua. Laguntza emateko prozedura.
Gizarteratze errenta arautzen duen foru dekretua onetsi arte, oinarrizko errenta arautzen duen apirilaren 19ko 120/1999 Foru Dekretuan aurreikusitako prozedura aplikatuko da laguntza emateko, hurrengo artikuluetan azaltzen diren espezialitateak galarazi gabe.
7. artikulua. Dokumentazioa.
1. Gizarteratze Errenta arautzen duen urtarrilaren 23ko 1/2012 Foru Legean aurreikusitako baldintzei jarraituz, errenta eskatzaileak, behar bezala betetako eskabidearekin batera, hurrengo atalean aurreikusitako dokumentazioa beharko du aurkeztu.
2. Kasuen arabera, honako dokumentazio hau erantsi beharko zaio eskaerari:
a) Nortasun agiri nazionalaren fotokopia, Europar Batasuneko herritarren erregistroko ziurtagiria, atzerritarraren identifikazio txartela edo beste edozein dokumentu, eskatzailearen identitatea eta Espainian legezko egoitza duela frogatzen dituena eta, zein den kasua, familia unitatea osatzen duten pertsona guztiena.
b) Eskatzailearen erroldako ziurtagiria, prestazioa eskatu aurreko 24 hilabetean Nafarroan bizi zela frogatzen duena, baita familia unitateko gainontzeko kideena ere.
c) Bizikidetasunaren ziurtagiria, non helbide bera duten pertsonak adieraziko baitira, eta eskatzailearekin duten harremanaren zinpeko aitorpena.
d) Familia liburuaren fotokopia edo balio bereko dokumentuarena, atzerritarren kasuan.
e) Banantze, dibortzio edo deuseztasunaren gaineko epaia, hitzarmen arautzailea eta, zein den kasua, ezarritako pentsioa ez ordaintzeagatik hasitako legezko ekintzak.
f) Gizarteratze errentaren eskabidea aurkeztu aurreko sei hilabeteko errenten eta ondarearen gaineko frogagiriak (nominak, prestazioak, pentsioak, sorospenak, kalte-ordainak, katastroko ziurtagiriak), familia unitateko kide guztienak.
g) Diru-sarrerak sortzen dituen bestelako jarduerarik eginez gero, horien gaineko erantzukizunpeko aitorpena, gizarteratze errentaren eskabidea aurkeztu aurreko sei hilabetekoa, familia unitateko edozein kiderena. Hartan, egindako jarduera, emandako denbora eta ardura eta guztira lortutako diru-sarrerak adieraziko dira.
h) Familia unitatea osatzen duten pertsonek izan ditzaketen laguntza, prestazio, pentsio edo sorospenak eskatu izanaren frogagiriak.
i) Eskaera egin aurreko hamabi hilabetean borondatezko baja edo laneko eszedentzia hartu ez izanaren zinpeko aitorpena, edo lan eskaintzei uko egin ez izanarena.
8. artikulua. Gizarte bazterketaren balorazioa ohiz kanpoko kasuetan eta berritze berezian.
Gizarteratze errentaren ohiz kanpoko kontzesioaren eta berritze bereziaren kasuetan, espedientea osaturik eta administrazio unitateak haiek eskuratzeko baldintzen gaineko txosten teknikoa emanik, ebazteko eskumena duen organoak txosten osagarria eskatzen ahalko dio Gizarteratzearen Balorazio Batzordeari gizarteratze egoeraren balorazioa egin dezan.
2. Helburu horrekin, gehiengoaren bizitza sozialean parte hartzea galarazten dutenak gizarte bazterketaren faktoretzat hartuko dira; bat baino gehiago izan beharko dira, eta hona garrantzitsuenak:
-Pobretasunean egotea, lanbidearteko gutxieneko soldataren %50etik beherako diru-sarrerekin.
-Etxebizitzarik ez izatea, ez alokatuta, ez pentsioan edo hurbileko norbaiten etxera bilduta.
-Lanik ez izatea.
-Analfabetismo funtzionala.
-Osasun faltaren ondoriozko arazoak, lana eskuratzea galarazten dutenak.
-Afektua eta familiaren laguntza galtzea edo haiek ez izatea harreman gatazkengatik.
3. Gizarte bazterketaren egoera baloratzearren, besteak beste, adierazle hauek hartuko dira kontuan hura atzemateko:
a) Familiari eusten diona urtebete edo lehenagotik langabezian egotea.
b) Familiari eusten dionak bazterketatzat jotako enplegua izatea.
c) Familian inor ez izatea lana, kotizaziopeko pentsioa edo langabeziaren prestazioak dituena.
d) Familian langabezian diren pertsonak izatea, azken urtean lanerako prestakuntzarik jaso gabe.
e) Muturreko pobretasuna.
f) Oinarrizkotzat jotako ondasunik ez duten familiak.
g) Eskolatu gabeko 3-16 urteko adingabeak dituzten familiak edo eskola absentismo jarraian direnak.
h) Familiako 17-64 urteko inork ikasketarik ez izatea.
i) Familiako 65 urtekoa edo zaharragoa den norbaitek irakurtzen eta idazten ez jakitea.
j) Infraetxea.
k) Akats larriak etxebizitzan.
l) Pilaketa.
m) Etxebizitza kolokan izatea.
n) Ingurune narriatua.
ñ) Osasun estaldurarik ez izatea.
o) Desgaitasuna, eritasun kronikoa edo eguneroko bizitzarako mugak sortzen dizkieten osasun arazo larriak dituzten helduak.
p) Familian mendekotasuna duten pertsonak izatea, eta laguntzarik ez.
q) Urtean osasun zerbitzuetara jo ez duten familiak.
r) Botikarik ezin erosi duten familiak.
s) Familiako kideen artean gatazkak izatea.
t) Familian alkoholarekin, drogekin edo jokoarekin arazoak dituzten pertsonak izatea.
u) Espetxean direnak edo handik ateratakoak dituzten familiak.
v) Familian harremanik ez duten pertsonak.
w) Babes erakundeetan bizi diren pertsonak dituzten familiak.
9. artikulua. Gizarteratze errentaren eskabideen ebazpena, ohiz kanpoko eta berritze bereziko kasuetan.
Gizarte Politika, Berdintasun, Kirol eta Gazteria Departamentuko kontseilariaren eskumena da gizarteratze errenta eman ala ez ebaztea gizarteratze errentaren ohiz kanpoko kasuetan eta berritze bereziarenean.
III. KAPITULUA. Gizarteratzearen Balorazio Batzordea
10. artikulua. Gizarteratze egoeraren Balorazio Batzordea.
1. Gizarteratzearen Balorazio Batzordea sortzen da, teknika eta aholkuen arloko organo gisa, gizarte zerbitzuetan eskumena duen zuzendaritza nagusiaren mende.
2. Batzordeak gizarte bazterketaren gaineko txostena eginen du ohiz kanpoko kasuetan edo berritze bereziarenean gizarteratze errenta emateko proposamenei buruz.
11. artikulua. Gizarteratzearen Balorazio Batzordearen osaera.
Honako hauek osatuko dute Gizarteratzearen Balorazio Batzordea:
a) Batzordeburua: gizarteratze arloan eskumena duen zerbitzuko zuzendaria.
Kargua hutsik edo batzordeburua kanpoan edo eri dagoenean edo legezko beste edozein arrazoi dela medio, gizarteratze arloan eskumena duen ataleko buruak ordeztuko du batzordeburua.
b) Idazkari-batzordekidea: gizarte zerbitzuen arloan eskumena duen Araubide Juridikoaren Ataleko burua.
Kargua hutsik edo idazkaria kanpoan edo eri dagoenean edo legezko beste edozein arrazoi dela medio, aipatu atalari atxikitako adar juridikoko administrazio publikoko teknikarietako batek ordeztuko du idazkari batzordekidea.
c) Batzordeko kideak:
-Gizarteratze arloan eskumena duen ataleko burua.
-Gizarteratze arloan eskumena duen ataleko bi teknikari.
Kargua hutsik edo batzordekidea kanpoan edo eri dagoenean edo legezko beste edozein arrazoi dela medio, aipatu ataleko teknikariek ordeztuko dituzte batzordekideak.
Gizarte zerbitzuen arloan eskumena duen zuzendari nagusiaren ebazpenaren bidez izendatuko dira Balorazio Batzordeko kideak eta horien ordezkoak.
2. Batzordeak kasuaz arduratzen den lantalde teknikoaren ordezkarien, teknikarien eta adituen laguntza eskatzen ahalko du. Horiek hizpidea izanen dute, baina botorik ez.
12. artikulua. Gai-zerrenda eta Batzordeak erabakiak hartzeko araubidea.
1. Aztertu beharreko gaien zerrenda idatzita jakinarazi beharko zaie Batzordeko kideei, bilkura egin baino 24 ordu lehenago, gutxienez ere.
2. Halaber, salbuespenezko eta presako kontuak aztertzen ahalko dira, gai zerrendan ez egonda ere, Batzordeko kide guztiak bertaraturik, gehiengoz hala erabakitzen bada.
3. Bilkurak egiteko, eztabaidatzeko eta erabakiak hartzeko, Batzordearen eraketak balioa izan dezan, hiru kide bertaratu beharko dira; horien artean batzordeburua eta idazkaria egonen dira, edo horien ordezkoak.
4. Bildutakoen gehiengoaz hartuko dira erabakiak. Berdinketarik gertatuz gero, batzordeburuaren kalitateko botoak erabakiko du.
5. Batzordeko kideak ezin dira bozketetan abstenitu, artikulu honen seigarren atalean adierazitakoa galarazi gabe.
6. Batzordeko kideen abstentzioa eta errekusazioa Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean xedaturikoarekin bat etorriko dira.
13. artikulua. Funtzionamenduaren araubidea.
Balorazio Batzordearen funtzionamenduari dagokionez, indarra duen legerian kide anitzeko organoentzat xedatutakoa aplikatuko zaio.
Xedapen Gehigarri Bakarra. Genero berdintasuna.
Gaztelaniazko bertsioan, zenbait pertsonari buruz ari denean foru lege honek genero gramatikal maskulinoko izenak erabiltzen dituen kasu guztietan ulertu behar da adierazpideen ekonomia hutsagatik jokatzen dela horrela, eta postu horiek orokorrean hartzen dituela hizpide, haiek bai emakumezkoek bai gizonezkoek betetzen dituztela ere, erabateko berdintasun-baldintzetan, ondorio juridikoen ikuspegitik.
Xedapen Indargabetzaile Bakarra. Arauak indargabetzea.
Indarrik gabe utzi dira foru agindu honetan ezarritakoaren kontrakoak diren maila bereko edo apalagoko xedapen guztiak.
Azken Xedapenetako Bakarra. Ondorioetarako eguna.
Foru agindu honek 2012ko otsailaren 4tik aurrera izanen ditu ondorioak.
Foru agindu hau Nafarroako Aldizkari Ofizialean argitara dadila agintzea.
