navarra.es
Castellano | Euskara | Français | English
Ezagutzera eman
618/2013 Foru Agindua, abuztuaren 5ekoa, Gizarte Politiketako kontseilariak emana, oinarrizko gizarte zerbitzuak eta Nafarroako Foru Komunitateko Administrazioaren kargura ematen diren programak finantzatzeko zati aldakorra neurtzeko datuen iturriak
(2013ko 149. NAOn argitaratutako testua, abuztuaren 28an)
Atarikoa
Gizarte Zerbitzuei buruzko abenduaren 14ko 15/2006 Foru Legearen babesean eta Gizarte Zerbitzu Orokorren Zorroa onetsi zuen ekainaren 17ko 69/2008 Foru Dekretuaren babesean, maiatzaren 22ko 32/2013 Foru Dekretua eman da, Gizarte Zerbitzuei buruzko Foru Legea Oinarrizko Gizarte Zerbitzuen Programa eta Finantzaketa arloan garatzeko erregelamendua onesten duena.
32/2013 Foru Dekretu horren III. kapituluan oinarrizko gizarte zerbitzuak finantzatzeko sistema zehazten da. Hala, 14. artikuluaren arabera, bi tarte izanen ditu, tarte finko bat, lanbide arteko taldeen langileria kostuari dagokiona, eta tarte aldakor bat, kostuan eragina duten inguruabar batzuen konkurrentzia neurtzeko prestatutako adierazle batzuen bidez kalkulatua, izan ere, inguruabar horietako bakoitzaren intentsitateak berarekin ekar dezake baliabide gehiago aplikatu behar izatea oinarrizko gizarte zerbitzuen eremu orokorreko zorroan pertsonen eskubide subjektibo gisa ezarritako mugetara iristeko. Era berean, 11 artikuluan adierazten da unitate kudeatzaileak arau hartan berean ezarritako indizeak aplikatuko dituela, toki entitate bakoitzak jaso beharreko finantzaketa zehazteko. Gainera, adierazten du kalkulu hori egiteko Nafarroako Estatistika Institutuak argitara ematen dituen azkeneko datu ofizialak eta toki entitate bakoitzak jakinarazten dituen datuak erabiliko direla, eta, beste alde batetik, 19. artikuluan tarte aldakorra kalkulatzeko aintzat hartuko diren adierazleak aipatzen dira.
Azkenik, foru dekretu haren lehenengo xedapen gehigarrian xedatzen da gizarte zerbitzuen arloan eskumena duen kontseilariak, foru agindu baten bidez, onetsiko dituela Oinarrizko Gizarte Zerbitzuak finantzatzeko tarte aldakorra neurtzeko behar diren datuen iturriak.
Gizarte Politiketako Departamentuari dagokio, departamentu horren egitura organikoa ezarri zuen uztailaren 25eko 73/2012 Foru Dekretuaren 1. artikuluan xedatuaren arabera, Nafarroako Foru Komunitateko Administrazioak gizarte arloetan bereganatu dituen eskumenak gauzatzea.
Horrenbestez, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen bidez eman dizkidaten ahalmenak erabiliz, agindu dut:
1. artikulua. Xedea
Foru agindu honen helburua da tarte aldakorra neurtzeko behar diren datuen iturriak ezartzea, hain zuzen ere, Gizarte Zerbitzuei buruzko Foru Legea Oinarrizko Gizarte Zerbitzuen Programa eta Finantzaketa arloan garatzeko erregelamendua onesten duen maiatzaren 22ko 32/2013 Foru Dekretuaren 19. artikuluan aipatutako eta lehenengo xedapen gehigarrian adierazitako adierazleak neurtzeko erabiliko direnak.
2. artikulua. Adierazle bakoitzeko datuen iturriak.
1. Sakabanatze geografikoa:
a) Nafarroako Estatistika Institutuak argitara emandako azkeneko “Nomenclátor de Navarra” delakoa, eskualde oinarrizko bakoitzaren kilometro koadroak zehazteko.
b) Nafarroako Estatistika Institutuak argitara emandako azkeneko “Nomenclátor de Navarra” delakoa, eskualde oinarrizko bakoitzeko biziguneen kopurua zehazteko.
2. Zahartzea:
a) Estatistika Institutu Nazionalak argitara emandako azkeneko “Etengabeko errolda”, eskualde oinarrizko bakoitzean 65 urte edo gehiago dituzten biztanleen kopurua zehazteko.
3. Oinarrizko gizarte zerbitzuaren arreta jasotzen duen oinarrizko eskualdeko biztanleria:
a) Gizarte Zerbitzuen Erabiltzaileen Informazio Sistema (SIUSS), finantzatzen den urtearen aurre-aurreko urtean oinarrizko gizarte zerbitzuaren arreta jaso duten biztanleen kopurua zehazteko.
4. Haurreria:
a) Estatistika Institutu Nazionalak argitara emandako azkeneko “Etengabeko errolda”, eskualde oinarrizko bakoitzean 18 urte baino gutxiago duten biztanleen kopurua zehazteko.
b) Gizarte Zerbitzuen Erabiltzaileen Informazio Sistema (SIUSS), Haurtzaroari eta Familiari Arreta emateko Programari lotutako jarduketen esparruan, adingabeei arreta emateari dagokionez, oinarrizko gizarte zerbitzuaren arreta jaso duten 18 urtetik beherakoen kopurua zehazteko, betiere finantzatzen den urtearen aurre-aurreko urteko datuak hartuz.
5. Gizarteratzea.
a) Gizarte Zerbitzuen Erabiltzaileen Informazio Sistema (SIUSS), finantzatzen den urtearen aurre-aurreko urtean oinarrizko gizarte zerbitzuaren gizarteratzeko baliabideak erabili dituzten biztanleen kopurua zehazteko.
b) Gizarte Zerbitzuen eta Prestazioen Sistema Integratua (SIPSS), finantzatzen den urtearen aurre-aurreko urtean gizarteratzeko prestazioen onuradun izan diren biztanleen kopurua zehazteko.
6. Etorkinak:
a) Estatistika Institutu Nazionalak argitara emandako azkeneko “Etengabeko errolda”, eskualde oinarrizko bakoitzean bizi diren etorkinen kopurua zehazteko.
b) Gizarte Zerbitzuen Erabiltzaileen Informazio Sistema (SIUSS), finantzatzen den urtearen aurre-aurreko urtean oinarrizko gizarte zerbitzuaren arreta jaso eta Espainiako nazionalitatea ez duten biztanleen kopurua zehazteko.
7. Toki entitatearen aurrekontua:
a) Maiatzaren 22ko 32/2013 Foru Dekretuaren 22. artikuluan jasotako justifikazio ekonomikoa egiteko dokumentu-eredua izanen da toki entitate bakoitzak oinarrizko gizarte zerbitzura bideratzen duen aurrekontuaren ehunekoa zehazteko iturria. Eredu hori Gizarte Politikako eta Kontsumoko Zuzendaritza Nagusian eskuratu daiteke.
Xedapen Iragankor Bakarra. Haurreria adierazlearen iturria, b) atalarena, Oinarrizko Gizarte Zerbitzuaren arreta jaso duten adingabeak.
Gizarte Zerbitzuen Erabiltzaileen Informazio Sistemaren 5. bertsioa, web ingurunean, Foru Komunitateko oinarrizko eskualde guztietan ezartzen ez den bitartean, maiatzaren 22ko 32/2013 Foru Dekretuaren 22. artikuluan jasotako justifikazio ekonomikoa egiteko dokumentu-eredua erabiliko da Haurtzaroari eta Familiari Arreta Emateko Programarekin loturik dauden jarduketen esparruan, adingabeei arretari emateari dagokionez, arreta jaso duten 18 urtetik beherakoen kopurua zehazteko iturri gisa, betiere finantzatzen den urtearen aurre-aurreko urteko datuak harturik.
Azken Xedapen Bakarra. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra, eta urte bereko urtarrilaren batetik aurrera izanen ditu ondorioak.
