navarra.es
Castellano | Euskara | Français | English
Ezagutzera eman
317/2009 Foru Agindua, urriaren 16koa, Familia, Gazteria, Kirol eta Gizarte Gaietako kontseilariak emana, Arreta Goiztiarreko zerbitzua arautzen duena
(2009ko 135. NAOn argitaratua, azaroaren 2an)
Nafarroako Foru Eraentza Berrezarri eta Hobetzeari buruzko Lege Organikoaren 44. artikuluaren arabera Nafarroak eskumen osoa du oro har gizarte zerbitzuen arloan, eta berariaz haurren, gazteen eta hirugarren adinekoen aldeko politikan, ongintza eta laguntza elkarteen inguruan eta adingabeak babestu eta tutelatzeko eta gizarteratzeko erakunde eta establezimendu publikoen arloan.
Nafarroako Gizarte Zerbitzuei buruzko abenduaren 14ko 15/2006 Foru Legeak gizarte zerbitzuen sistema arautzen du, eta haren xede nagusia da populazioaren gizarte ongizatea lortzea, gizarte zerbitzuez baliatzeko eskubide unibertsala bermatuz.
Lege honen xedea da Nafarroako Foru Komunitatean gizarte zerbitzuen sistema bateratzea, halako moduan non bermatuko baita zerbitzuak pertsonen autonomia, duintasuna eta bizi kalitatea ziurtatuko dituzten baldintza onenetan ematen direla.
Azkenik, foru lege honen beste xede bat da mekanismoak ezartzea gizarte zerbitzuen arloko jarduketa publikoak koordinatzeko, gizarte politikaren gainerako arloekin eta ekimen pribatuko jarduketekin, pertsonen beharrei erantzuten dieten gizarte zerbitzuak lortzeko.
Foru legeak honela definitzen du gizarte zerbitzuen sistema: sarean modu integratuan eta koordinatuan lan eginen duten titulartasun publikoko eta pribatuko prestazio teknikoen eta ekonomikoen, planen, programen eta talde teknikoen multzoa, bat etorriz foru lege horretan eta hori garatzeko xedapenetan ezarritako eremu arauemailearekin.
Gizarte zerbitzuen sistema gidatzen duten printzipioak honako hauek dira: unibertsaltasuna, erantzukizuna eta deszentralizazioa, herritarren partaidetza, arreta pertsonalizatua eta integrala, prebentzioa, normalizazioa, autonomia sustatzea, planifikazioa eta ebaluazioa, administrazioen arteko koordinazioa eta lankidetza, kalitatea eta boluntarioen lanaren sustapena.
Abenduaren 14ko 15/2006 Foru Legearen 18. artikuluak honakoa adierazi du: "Gizarte zerbitzuen zorroak gizarte zerbitzuen sistema publikoko prestazioak ezartzeko tresna dira".
Gizarte Zerbitzu Orokorren Zorroa onesten duen ekainaren 17ko 69/2008 Foru Dekretuak zorroa honela definitzen du: pertsonek gizarte zerbitzuez baliatzeko duten eskubidea zehazten duen erregelamenduzko araua. Horregatik, gizarte zerbitzuen sistemaren aldaketa islatzen du, laguntzan oinarritutako sistema izatetik eskubide zehatz aitortuak bermatzen dituen sistema izatera pasatu baita.
Arreta Goiztiarrari buruzko Liburu Zuriak (Madril, 2000) arreta goiztiarra honela definitzen du: 0 eta 6 urte bitarteko haurrei, familiari eta inguruneari zuzenduta dauden eta garapenean arazoak dituzten edo horiek izateko arriskua duten haurren beharrizanei erantzuteko helburua duten ekintzen multzoa.
Nafarroako Arreta Goiztiarreko Zerbitzua prestazio bermatua da, arreta anbulatoriokoa. Zerbitzuak balorazio, estimulazio eta errehabilitazio programak eskaintzen ditu, haurren, haien familien eta haien ingurunearen beharrizan iragankorrei edo iraunkorrei erantzuteko. Garapenean arazoak dituzten edo horiek izateko arriskua duten 0 eta 3 urte bitarteko haurrekin egiteko esku-hartze integrala izanen da eta tartean dauden sektoreen (osasuna, hezkuntza eta gizarte zerbitzuak) jarduketak koordinatuko ditu.
Horrela, ahultasun egoera berezian dauden 0 eta 3 urte bitarteko haurren autonomia sustatu eta mendekotasun egoerari erantzun nahi zaio. Izan ere, egoera horretan egonda, laguntza bereziak behar dituzte, eta diziplinarteko esku-hartze integral planifikatu orokorra, tartean dauden sektoreen baliabideak biltzen dituena; horrek bizitza sozialean erabat eta aktiboki parte hartzea bermatzeko aukera emanen du.
Beraz, foru agindu honek adierazi nahi du Nafarroako Arreta Goiztiarreko esku-hartze integrala erantzukizun publikoko baliabide bermatua eta unibertsala dela, arreta goiztiarreko funtsezko beste printzipio batzuetan oinarrituta, hala nola elkarrizketa eta partaidetza, gizarteratzea, aukera berdintasuna, diziplinartekotasuna eta lanbide prestakuntza, erakundeen arteko koordinazioa eta deszentralizazioa.
Foru agindu honek Arreta Goiztiarreko zerbitzuaren unibertsaltasuna eta doakotasuna arautzen ditu, baita hauek ere: izaera eta hori eskuratzeko modua, helburuak, eginkizunak, langileak, zerbitzua emateko esparruak eta establezimenduek izan behar dituzten baldintza materialak.
Horiek horrela, Foru Komunitateko Administrazioari buruzko abenduaren 3ko 15/2004 Foru Legeak eta Familia, Gazteria, Kirol eta Gizarte Gaietako Departamentuaren egitura organikoa ezarri zuen irailaren 3ko 125/2007 Foru Dekretuak emandako ahalmenak erabiliz, agindu dut:
1. artikulua. Xedea.
Foru agindu honen xedea da Arreta Goiztiarreko Zerbitzua arautzea Nafarroako Foru Komunitatean. Horrelakotzat jotzen da 0 eta 3 urte bitarteko haurrei, familiari eta inguruneari zuzenduta dauden ekintzen multzoa, garapenean arazoak dituzten edo horiek izateko arriskua duten haurren beharrizanei ahalik eta lasterren erantzuteko helburua dutenak.
Arreta goiztiarrak prebentzio, terapia, habilitazio eta errehabilitazio arloetan banaka eta/edo taldeka egiten den esku-hartzea barne hartzen du, haurrari zein haren familia eta gizarte inguruneari zuzenduta dagoena. Tartean dauden sektoreen (osasuna, hezkuntza eta gizarte zerbitzuak) jarduerak integratu eta koordinatuko ditu, eta arreta integrala garatzeko berariazko baliabideak sortuko.
2. artikulua. Helburua.
Arreta Goiztiarreko Zerbitzuaren helburua da garapenean arazoak dituzten edo horiek izateko arriskua duten haurren garapen ezin hobea erraztea. Asaldura edo ezgaitasun baten ondorioak murriztu nahi dira eta, hala denean, desagerrarazi. Horrez gain, familian eta gizartean integratzeko dituzten aukerak gehitu, eta haurren zein familien bizi kalitatea ahalik eta mailarik handienean handitu.
Arreta Goiztiarreko Zerbitzuaren helburuak hurrengoak dira:
a) Haurrei arreta ematea, jaiotzen direnetik 3 urte bete arte, baita haien familiei ere.
b) Haurraren garapenaren bilakaera optimizatzea, familian eta gizartean integratzen lagunduz.
c) Konpentsatzeko, oztopoak kentzeko eta berariazko beharrizanetara egokitzeko beharrezko mekanismoak txertatzea. Horretarako, adingabeak ingurune sozialean integratzea eta haien oraingo zein etorkizuneko ongizatea bilatuko dira.
d) Haurraren familiak eta inguruneak dituzten beharrizan eta eskariak kontuan hartzea, haiei erantzutea eta horiek indartzea.
e) Adin tarte horretako haurrentzat zerbitzuek prestatzen dituzten jarduerak koordinatzen parte hartzea.
f) Arreta goiztiarreko zerbitzuaren hedapena sustatzea, profesionalen eta zerbitzu horri onura ateratzen ahal dioten biztanleen artean.
g) Adingabeak eta familiak esku hartzeko prozesuan aktiboki parte har dezatela sustatzea, eta familiak erabakiak hartzeko prozesuan parte har dezala.
h) Departamentuen arteko koordinazio proiektuetan parte hartzea.
i) Haur garapenean adituak diren taldeak bermatzea.
j) Arretaren jarraitutasuna bermatzea.
k) Zerbitzuaren kalitateari buruzko ebaluazioa bermatzea, gogobetetasun eta emaitzen adierazleen bidez.
3. artikulua. Aplikazio-esparrua.
Arreta goiztiarraren arloko jarduerak Nafarroan ohiko bizilekua duten eta garapenean arazoak dituzten edo horiek izateko arriskua duten 0 eta 3 urte bitarteko haurrei eta haien familiei zuzenduko zaizkie.
Ulertzen da esku-hartzearen xede diren egoeretako batean daudela hurrengoak:
a) Mesedegarria ez den egoera sozialean edo babesgabetasun egoeran daudenak, bai arrisku egoeran bai babesgabetasun egoeran, baldin eta egoera horrek heltze prozesuari eragiten badio.
b) Jaio aurreko, inguruko eta ondoko aldian heltzeko prozesuari eragiten ahal dioten arazoak izan dituztenak, adibidez: prematuritatea, pisu txikia, erditzeko anoxia edo beste edozein faktore edo seinale biologiko arriskutsu.
c) Honako hauek dituztenak: atzerapena edo beste edozein faktore edo seinale biologiko arriskutsu, garapenaren desbideratzeak, edo ezgaitasun fisikoak, psikikoak edo sentimenezkoak.
Salbuespen gisa, arreta 6 urtera arte luzatzen ahalko da, Arreta Goiztiarreko balorazio taldeak hala erabakitzen badu.
Nolanahi ere, zerbitzu orokorrek (hezkuntza, osasun edo gizarte arlokoek) arreta beharrizanak estali arte iraunen dute zerbitzuek.
4. artikulua. Jarduteko printzipioak.
Arreta Goiztiarreko zerbitzua erantzukizun publikoko zerbitzua da, eta aurreko artikuluan deskribatutako baldintzak betetzen dituzten haur guztientzako eskubide subjektiboa.
Foru Komunitateko Administrazioak zerbitzu hori emateko egiten duen jarduketa bat etorriko da honako printzipio hauekin:
a) Unibertsaltasuna eta aukera berdintasuna. Beharra duten 0 eta 3 urte bitarteko haur guztiengana iritsiko da arreta goiztiarra, bai eta haien familiengana ere, baldintza berberetan.
b) Doakotasuna: zerbitzua jasotzen duten pertsonek eta familiek ez dute ezer ordaindu behar horren truke.
c) Familiaren, administrazioaren eta gizartearen elkarrizketa, partaidetza eta lankidetza.
d) Garapenean arazoak dituzten 0 eta 3 urte bitarteko haurrak familia, eskola eta komunitate ingurunean sartzea eta aktiboki parte hartzea.
e) Diziplinartekotasuna eta lanbide prestakuntza. Horretarako izanen dira osasun, psikologia, hezkuntza eta gizarte arloko profesionalak, haurren garapenaren inguruko prestakuntza eta espezializazioa izanen dituztenak.
f) Erakundeen arteko koordinazioa. Esparru horretan eskuduntzak eta erantzukizunak dituzten administrazioek eta erakundeek beren artean koordinatu behar dute, baliabide ekonomikoak zein giza baliabideak optimizatzeko.
g) Deszentralizazioa. Haur Garapenaren eta Arreta Goiztiarreko zerbitzuek familiaren etxearen erreferentziazko eremutik hurbil egon beharko dute; zerbitzuak irisgarriak izanen dira eta familien beharrizanen arabera antolatuko dira.
h) Irisgarritasun unibertsala eta guztientzako diseinua. Arreta Goiztiarreko zerbitzuak gauzatzeko instalazioek erabat irisgarriak izan beharko dute, bai sarbideari dagokionez, bai zirkulazioari dagokionez. Era berean, informazioa eta komunikazioa modu eta formatu irisgarri eta ulergarrietan eginen dira.
i) Kalitatea. Arreta goiztiarreko programak gauzatzen dituzten zentroetarako eta zerbitzuetarako kalitate estandarrak ezarriko dira, zerbitzu eragimenezkoa bermatzeko. Gauzak horrela, kanpoko zein barneko ebaluazioak eginen dira aldian-aldian.
5. artikulua. Edukiak.
Arreta Goiztiarreko Zerbitzuak hurrengo jarduerak gauzatuko ditu:
a) Egoera arriskutsuen prebentzioa.
b) Garapen prozesuan edozein laguntza beharrizan antzematea.
c) Garapen arazoen diagnostiko funtzionala, sindromikoa eta etiologikoa.
d) Adingabearen, haren familiaren eta haren ingurunearen habilitazio, errehabilitazio, terapia eta diziplinarteko arreta.
e) Familia orientatzea, hari laguntzea eta haren ondoan egotea, adingabearen garapen integraleko prozesuan.
f) Adingabearen garapenaren eta haren familiaren jarraipena eta etengabeko ebaluazioa.
g) Honako hauen jardueren arteko koordinazioa: arazoak dituzten adingabeen prebentzioan, antzemate goiztiarrean eta arretan esku hartzen duten osasun, hezkuntza eta gizarte arloko sektoreen jardueren artean, eta adingabe horiek hartzen dituzten haur hezkuntzako zentroetako profesionalen eta beharrezkotzat jotzen ahal diren beste eragile batzuen jardueren artean.
h) Arreta goiztiarrari lotutako profesionalei aholkularitza ematea, hori eskatzen badute.
6. artikulua. Eskuratzea.
Arreta goiztiarreko zerbitzuak ofizioz edo alderdi batek eskatuta eskuratzen ahalko dira.
Prozedura ofizioz abiarazten ahalko da, baita Arreta Goiztiarreko Zentroaren beraren edo osasun, gizarte edo hezkuntza arloko zerbitzuen ekimenez ere.
Halaber, prozedura abiarazten ahalko da, gurasoek, tutoreek edo zaintzaileek eskatzen badute.
7. artikulua. Prozedura eta ebazpena.
Eskaera bidaliko da Arreta Goiztiarreko Zentrora, eta adingabearen, haren familiaren eta haren ingurunearen banakako egoera aztertu eta baloratuko da.
Balorazio hori egiteko, egokitzat jotzen diren txosten guztiak eskatzen ahalko zaizkio tartean dagoen edozein sektoreri. Baloraziotik ondorioztatutako diagnostikoa balorazio txostenean agertuko da, eta bertan Banaka Esku Hartzeko Programa behar den ala ez zehaztuko da.
Nafarroako Mendekotasun Agentziaren organo eskudunak emandako ebazpenaren bidez aintzatetsiko da arreta goiztiarreko zerbitzua eskuratzeko eskubidea, Arreta Goiztiarreko Zentroak proposatuta.
Eskubidea aintzatesteari buruzko ebazpenak Banaka Esku Hartzeko Programa prestatzea dakar berarekin. Programa horrek banakako baloraziotik ondorioztatutako helburuak eta beharrezko jarduerak barne hartuko ditu.
Arreta Goiztiarreko Zentroak programa hori garatuko du, Haur Garapenaren eta Arreta Goiztiarreko Unitateen (HGAGU) bidez.
8. artikulua. Iraungipena.
Iraungipenaren unean, familiak eskubidea izanen du ahozko informazioa jasotzeko, baita haurraren eboluzioa, une horretako egoera eta beharrezkotzat jotzen diren beharrizanak laburtzen dituen idatzizko txostena ere, familiaren partaidetza eta adostasuna izanda.
Bidezkoa izanen da arreta goiztiarreko esku-hartzea amaitzea, jarraian zehazten diren zirkunstantzietako bat gertatzen denean. Kasu horretan Nafarroako Mendekotasun Agentziaren organo eskudunak ebazpena emanen du.
a) Banakako programan ezarritako helburuak bete direnean.
b) Haurra eskola sistemara sartu denean.
c) Familiak borondate argia agertzen duenean.
d) Zerbitzua zuzen emateko ezarritako arauak betetzen ez direnean.
Adingabearen legezko ordezkaritza gauzatzen duenak eginkizunak burutzeari uzten badio edo jarrera txarra agertzen badu eta horrek adingabea babesik gabe uztea ekartzen ahal badu, Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legean ezarritakoarekin bat jardunen da.
9. artikulua. Esku hartzeko prozesua.
Arreta Goiztiarreko esku-hartze integralak haien artean estu lotuta dauden hainbat fase ditu:
a) Eskaerak jasotzea.
b) Informazio bilketa.
c) Harrerako elkarrizketa.
d) Lehenbiziko balorazioa eta diagnostiko hipotesiak egitea.
e) Familiari informazioa itzultzea.
f) Banaka Esku Hartzeko Plana prestatzea.
g) Esku hartzea.
h) Ebaluazio eta jarraipen sistematikoko plana.
i) Bideratzea.
Haurrak, haren familiak eta haren inguruneak sortzen dituzten agiri guztiak Historia Bakarrean egonen dira: barneko agiri hori erreferentzia izanen da taldeko edozein profesionalentzat.
10. artikulua. Arreta Goiztiarreko Zerbitzuaren antolaketa.
Laguntza Goiztiarraren Zerbitzuaren organo erantzulea den aldetik, Arreta Goiztiarreko Zentroa bi unitatetan egituratuko da:
a) Balorazio Unitatea, Balorazio Taldeko profesionalek osatutakoa.
b) Zuzeneko Laguntzako Unitateak, Haur Garapenaren eta Arreta Goiztiarreko Unitateetako (HGAGU) profesionalek osatutakoa.
11. artikulua. Arreta Goiztiarreko Zentroa.
Arreta Goiztiarreko Zentroak Arreta Goiztiarreko Zerbitzuaren jarduerak planifikatzeko, baloratzeko, ebaluatzeko eta antolatzeko eginkizunak eginen ditu Nafarroako Foru Komunitate osorako.
Zentro horri dagokio programari buruzko eskaera guztiak -bai gurasoek, tutoreek edo zaintzaileek zuzenean egiten dituztenak, bai beste zerbitzu batzuek bideratzen dituztenak- jasotzea.
Zuzendari-koordinatzaileak, Balorazio Unitateak eta Haur Garapenaren eta Arreta Goiztiarreko Unitateek (HGAGU) osatuko dute Arreta Goiztiarreko Zentroa.
11.1. Ahal dela, zuzendari-koordinatzailea profesionala izanen da: psikologoa, pedagogoa, psikopedagogoa, neuropediatra edo errehabilitazioko medikua.
Arreta Goiztiarreko Zerbitzuaren antolaketaren kudeaketaz eta kudeaketa teknikoaz arduratuko da Zuzendaritza.
Hona hemen gauzatu beharreko eginkizunak:
-Arreta Goiztiarreko Zerbitzua planifikatzea eta antolatzea, Balorazio Unitatearekin eta Zuzeneko Arretakoekin batera.
-Arreta Goiztiarreko Zerbitzua koordinatzea Nafarroako Foru Komunitate osoan.
-Familia harrera egitea.
-Urteko jarduketa planen jarraipena eta kontrola egitea, baita urteko oroitidazkien ebaluazioa ere.
-Zuzeneko arretako taldeen arteko koordinazioa sustatzea eta bermatzea.
-Haurrei arreta ematen dieten zerbitzuen arteko koordinazioa sustatzea eta bermatzea.
-Zerbitzuaren funtzionamendua ebaluatzea eta kalitate eta hobekuntza arloko elementuak gehitzea.
-Balorazioa eta arreta jasotzen dituzten biztanleen erregistro bateratua diseinatzea.
-Prestakuntza eta eguneratze zientifikoko jarduerak sustatzea eta antolatzea.
-Indarreko legedia betetzen dela ziurtatzea.
-Urteko jarduketa plana betetzen dela ziurtatzea.
-Langileen kudeaketa egitea.
-Eskatzen zaion beste edozein.
11.2. Balorazio Unitatea.
Balorazio Unitateak (Balorazio Taldea, hainbat lanbide biltzen dituena) honelako profesionalak izan beharko ditu, gutxienez: psikologoa, pedagogoa, errehabilitazioko medikua eta gizarte langilea, eta arreta goiztiarrean berariazko prestakuntza izanen dute.
Balorazio Taldearen eginkizunak hauek dira:
-Jasotako eskaerak aztertzea.
-Beharrezko informazioa biltzea.
-Haurren, haien familien eta haren ingurunearen beharrizanen balorazio diagnostikoa egitea.
-Zenbait haurrekin esku hartu beharrari buruzko txostena prestatzea eta esku ez hartzeko justifikazioa egitea.
-Banaka Esku Hartzeko Planaren programak diseinatzea, Haur Garapenaren eta Arreta Goiztiarreko Unitateetako profesionalekin batera, eta plan horien jarraipena eta ebaluazioa egitea.
-Balorazio txostenak igortzea bidali dituen Zerbitzuari.
-Historia Bakarra osatuko duen banakako espediente bakoitza eguneratzen dela zaintzea.
-Familiei informazioa, laguntza eta aholkularitza ematea eta horiekin esku hartzea, hori eskatzen duten kasuetan.
-Kasu bakoitzerako erreferentziazko profesional bat hautatzea. Bere eginkizuna izanen da espezialistek haurrarekin, familiarekin eta ingurunearekin egiten dituzten jarduerak koordinatzea.
-Gurasoen taldeak sustatzea eta, hala denean, gidatzea, prestakuntzan eta seme-alaben eguneroko harremanetan laguntza emanez.
-Esku hartu beharra duten kasuak komunitateko Haur Garapenaren eta Arreta Goiztiarreko Unitateetara bideratzea, etxetik hurbil egoteari lehentasuna emanez.
-Haur Garapenaren eta Arreta Goiztiarreko Unitateetako profesionalekin lan egitea, Banaka Esku Hartzeko Plana egiteko eta hari jarraipena egiteko.
-Osasun, gizarte eta hezkuntza arloko baliabideen sarearekiko koordinazioa ezartzea, informazioa trukatzea erraztuz, esku hartzeko prozesuan behar diren jarduerak bermatzeko.
-Hala denean, minusbalio eta/edo mendekotasun ziurtagiria emateko balorazioa proposatzea, hori behar duten kasuetan.
-Familiek behar dituzten laguntzak tramitatzea Haur Garapenaren eta Arreta Goiztiarreko Unitateekin.
-Prestakuntza eta etengabeko eguneratzea, bere jarduketa eremuari lotutako gaietan.
-Gurasoei eta profesionalei laguntzeko gidaliburuak ikertzea eta egitea.
-Haur Garapenaren eta Arreta Goiztiarreko Unitateetako profesionalekin urteko jarduketa plana eta oroitidazkia egitea.
11.3. Haur Garapenaren eta Arreta Goiztiarreko Unitateak.
Haur Garapenaren eta Arreta Goiztiarreko Unitateek haurrei, familiei eta inguruneari zuzenean arreta eskaintzeko eginkizuna betetzen dute, Banaka Esku Hartzeko Plana burutuz.
Haur Garapenaren eta Arreta Goiztiarreko Unitate bat izanen da Iruñerako eta Iruñerrirako, Nafarroako Mendekotasun Agentziak zuzenean kudeatuko duena.
Haur Garapenaren eta Arreta Goiztiarreko gainerako Unitateak geografikoki banatuko dira, ahal dela, Nafarroako Foru Komunitateko Gizarte Zerbitzuen zonifikazioaren arabera. Gauzak horrela, Nafarroako Mendekotasun Agentziak egiten dituen laguntza kontratuen bidez kudeatuko dira.
Unitate bakoitza Zuzeneko Arretako profesional finkoek edo ibiltariek osatuko dute, arreta jaso behar duten biztanleen kopuruaren eta banaketa geografikoaren arabera.
Haur Garapenaren eta Arreta Goiztiarreko Unitate bakoitza osatuko duten profesionalen kopurua ezberdina izanen da, arreta jasotzen duten biztanleen kopuruaren eta aginduta dituzten eginkizunen arabera. Ahal den guztietan, taldeetako profesionalen egonkortasuna eta jarraipena bermatuko dira.
Eskatzen ahal diren lanbide profilek berariazko ezagutzak izanen dituzte haurren eboluzioaren garapen orokorraren oinarrizko arloetan gutxienez: garapen kognitiboan, garapen sentsoriomotorrean, mugimendu garapenean eta hizkuntzaren garapenean. Era berean, arreta goiztiarreko berariazko prestakuntza izanen dute (psikomotrizista, logopeda, fisioterapeuta, terapeuta okupazionala, haur hezkuntzako irakaslea...).
Hona hemen Haur Garapenaren eta Arreta Goiztiarreko Unitateen eginkizunak:
-Balorazio Taldearekin lan egitea balorazio diagnostikoan.
-Balorazio Taldearekin batera banakako programak diseinatzea eta horiek ebaluatzea.
-Kasu bakoitzerako erreferentziazko profesional bat hautatzea Balorazio Taldearekin batera. Bere eginkizuna izanen da espezialistek haurrarekin, familiarekin eta ingurunearekin egiten dituzten jarduerak koordinatzea.
Ahal den neurrian, erreferentziazko pertsona hori haurrarekin programa gauzatzen duen profesional bakarra izanen da, nahiz eta gainerako profesionalek ikuskatu, lagundu eta gidatu.
-Familiari orientabidea, laguntza eta lankidetza ematea, lan saioetan haurrarekin parte hartzea erraztuz, komenigarria den guztietan.
-Haur garapenari eta Arreta Goiztiarrari buruzko berariazko agiri teknikoak prestatzea.
-Familiei informazioa eta aholkularitza ematea, haurraren ezgaitasunaren ondorioak konpentsatzeko eta/edo arintzeko dauden laguntza teknikoen gainean (gidaliburuak, materialak, jostailuak eta abar).
-Haur eskolekin sistematikoki koordinatzea.
-Oinarrizko Osasun Laguntzako zerbitzuekin eta zerbitzu espezializatuekin sistematikoki koordinatzea.
-Etengabeko prestakuntza eta eguneratze zientifikoko jardueretan parte hartzea.
-Ikerketa proiektuetan parte hartzea.
-Nafarroako Foru Komunitatean zein Espainiako gainerako autonomia erkidegoetan dauden ezgaitasunari lotutako elkarteei eta erakundeei eta haien zerbitzuei buruzko informazioa ematea.
-Balorazio Taldearekin batera, urteko jarduketa plana eta oroitidazkia egitea.
Nolanahi ere, Haur Garapenaren eta Arreta Goiztiarreko Unitateen jarduketak honakoa egin beharko du:
-Haur eskolekin koordinatu, eskolek haurrei gizarteratzeko eta ikasteko prozesuei buruz eskaintzen dizkieten aukerak gehitzen lagunduz, zeren terapia eta hezkuntza prozesua indartzen baitute.
-Gurasoek prozesuan parte hartzea erraztea.
-Haurren eta familien adinarekin eta beharrizanekin bat datorren ordutegia proposatzea.
-Gurasoek seme-alaben tratamenduan parte hartzea erraztea, familien beharrizanekin bat datorren ordutegia bermatuz.
Zuzeneko arreta ematen duten Haur Garapenaren eta Arreta Goiztiarreko Unitateek foru agindu honen eranskinean adierazten diren baldintza materialak bete beharko dituzte.
Hala ere, Arreta Goiztiarreko Zerbitzuak ematen ahal dira, egoerak eskatzen badu eta haurraren ingurune naturalaren barnean gauzatzen ahal badira.
12. artikulua. Diziplinarteko koordinazioa.
Arreta Goiztiarreko Zentroa osatzen duten profesionalek eta Haur Garapenaren eta Arreta Goiztiarreko Unitateak osatzen dituztenek koordinazio eta lankidetza printzipioak errespetatuz jardunen dute. Asmo horrekin bilerak eginen dituzte urteko jarduketa planean ezarritako aldizkakotasunez, hurrengo helburuak lortzeko:
-Kasuen jarraipena.
-Zailtasunen azterketa / konponbideen bilaketa.
-Programak prestatzea eta jarraipena egitea.
-Zerbitzuaren antolaketa.
Halaber, behar bezalako diziplinarteko koordinazioa bermatzeko asmoz, Arreta Goiztiarreko Balorazio Unitatea osatzen duten profesionalek eta Haur Garapenaren eta Arreta Goiztiarreko Unitateak osatzen dituztenek behar beste bilera eginen dituzte tartean dauden administrazioko beste zerbitzu batzuetako profesionalekin, hurrengo helburuak lortzeko:
-Kasuen azterketa, jarraipena eta, egokia bada, bideratzea.
-Jarduketa prozedura koordinatuen azterketa eta proposamena.
13. artikulua. Parte hartzeko mekanismoak.
Esku hartzeko eredu irekia eta malgua sustatu nahi da, gai izanen dena erabiltzaileen iritziak eta eskaerak biltzeko eta Arreta Goiztiarreko Programaren egituraren dinamikara eta egiturara ekartzeko. Horretarako, nahitaezkoa izanen da parte hartzeko mekanismo biziak eta bideragarriak izatea. Honako mekanismo hauek antolatuko dira:
- Barne araubidearen erregelamendua.
Barne araubidearen erregelamendua egin eta ezagutaraziko da. Bertan erabiltzaileen, profesionalen eta zerbitzuaren beraren eskubideak eta betebeharrak zehaztuko dira. Informazioa eta komunikazioa modu eta formatu irisgarri eta ulergarrietan eginen dira beti.
- Familiaren parte-hartzea.
Prozesu osoan familiak aktiboki parte hartu beharko du. Hasieratik parte hartuko du haurrari lotutako esku hartzeko plan guztietan, baita plan horiek ukitzen dituzten erabakiak hartzerakoan ere. Beraz, familiari Arreta Goiztiarreko Programaren garapenari dagokionez hura ukitzen duten zirkunstantzia guztien berri eman beharko zaio.
Bestalde, familientzako Parte Hartzeko Sistema ezarriko da, zerbitzuaren funtzionamenduari buruzko iritziak eta iradokizunak ematea errazteko asmoz. Horretarako, zerbitzuari buruzko gogobetetasun inkesta jarriko da gurasoen eta/edo tutoreen eskura, baita iradokizun postontzi iraunkorra ere. Programaren hasierako fasean eta amaierakoan bete beharko da inkesta.
- Zuzendaritza Batzordea.
Departamentuen arteko beharrezko koordinazioa bermatzeko asmoz, Arreta Goiztiarreko Zuzendaritza Batzordea eratuko da, Nafarroako Mendekotasun Agentziari atxikita egonen dena eta hurrengo kideek osatuko dutena:
a) Familia, Gazteria, Kirol eta Gizarte Gaietako Departamentuko zuzendari nagusia.
b) Nafarroako Mendekotasun Agentziako zuzendari kudeatzailea.
c) Autonomia Pertsonalaren Sustapenerako eta Mendekotasunaren Prebentziorako zuzendariordea.
d) Osasuneko zuzendari nagusia.
e) Hezkuntzako zuzendari nagusia.
Batzordea urtean behin bilduko da gutxienez, arreta goiztiarreko ekintzarako ildo estrategikoak proposatzeko eta ezartzeko, urteko planifikazioa egiteko eta arreta goiztiarrean inplikatutako sistemen arteko koordinazio egokia laguntzeko.
- Batzorde Teknikoa.
Batzorde Teknikoa eratuko da lan batzorde gisa, urteko lan plana jarraitzeko, koordinatzeko eta aztertzeko. Hiru hilean behin bilduko da gutxienez, eta hurrengo kideek osatuko dute:
a) Arreta Goiztiarreko Zentroko zuzendaria.
b) Balorazio Unitateko teknikari bat.
c) Iruña eta Iruñerria zein Nafarroako gainerako eremuak ordezkatzen dituzten Haur Garapenaren eta Arreta Goiztiarreko Unitateetako bi teknikari.
d) Gizarte Zerbitzuen arloko teknikari bat.
e) Osasunaren arloko teknikari bat eta buru osasuneko teknikari bat.
f) Hezkuntzaren arloko teknikari bat.
Gainera, Batzorde Teknikoko kideek beharrezkotzat jotzen badute, beste ordezkari batzuek parte hartzen ahalko dute, profesional aditu gisa.
Azken Xedapenetako Lehenbizikoa. Foru agindu hau garatu eta betearazteko gaikuntza.
Ahalmena emanen zaio Familia, Gazteria, Kirol eta Gizarte Gaietako kontseilariari foru agindu hau garatu eta betearazteko behar diren xedapenak eman ditzan.
Azken Xedapenetako Bigarrena. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
ERANSKINA
Arreta Goiztiarreko Zentroak eta zuzeneko arreta ematen duten Haur Garapenaren eta Arreta Goiztiarreko Unitateek honako baldintza hauek bete beharko dituzte:
- Baldintza fisikoak eta ekipamendu arlokoak
-Irisgarritasun integrala, arkitektura oztoporik gabea. Iriste eta komunikazio errazak, garraio publikoaren bidez.
-Baliabideak kokatzeko zentzuzko irizpideak erabiliz aukeratuko da hura kokatzeko eremu geografikoa edo ingurunea.
-HGAGU eta lokal berean ematen ahal diren beste zerbitzu batzuk bereiziko dira, ahal dela arkitekturaren bidez eta betiere modu funtzionalean.
-Tratamendu gelek lurzoru beroa, ez irristakorra eta garbitzeko erraza izanen dute.
-Erabiltzaileen ezaugarrietara eta tipologiara moldatu beharko dira zerbitzu horri dagokion zentroaren diseinua, ekipamendu baldintzak eta ekipamenduak, segurtasunari dagokionez.
-Ebakuaziorako eta suteen aurkako plana izan beharko da.
- Guneak eta espazioak
Jarduketa esparruaren eta biztanleen arabera, zentro bakoitzak gune bereiziak izaten ahalko ditu administrazio, esku-hartze eta zerbitzu orokorren beharrizanak betetzeko.
Jarraian gune bakoitzean izaten ahal diren edukiak deskribatuko dira, orientazio gisa.
- Administrazioaren gunea
-Harrera, administrazio, zuzendaritza eta kudeaketa eginkizunak egiteko behar diren guneak izanen ditu.
-Gune horrek izanen ditu zuzendaritzaren bulegoa, administrazioa, argiztapen eta aireztapen onak eta administraziorako egokia den ekipamendua.
-Arreta espezializaturako gunea
-Arreta eta tratamendu egokiak gauzatzeko behar diren guneak izanen ditu.
-Bulego guztiak balio anitzekoak izaten ahalko dira, betiere kalitateko arreta egokia bermatzen baldin bada. Gelen eta bulegoen kopurua erabiltzaileen kopuruaren eta eskaeren araberakoa izanen da.
- Zerbitzu orokorren gunea
-Atari-sarrera, itxaron-gela eta bainugelak izanen ditu.
-Haurrei arropa aldatzeko eta titia emateko lekuak.
-Silletak edo haur-kotxeak uzteko lekua.
-Ekipamenduak eta materialak biltegiratzeko eta garbitzeko lekua.
- Materialak
Jarduketa esparruaren arabera, HGAGU bakoitzak dauden beharrizanei erantzuteko eta zerbitzu egokia eskaintzeko beharrezkotzat jotzen diren berariazko material guztiak izanen ditu.
