navarra.es
Castellano | Euskara | Français | English
Ezagutzera eman
89/2011 Foru Agindua, maiatzaren 30ekoa, Lurraldearen Antolamenduko eta Etxebizitzako kontseilariak emana, etxebizitza babestuaren promozioa aukeratzeko prozedura, martxoaren 28ko 25/2011 Foru Dekretuaren 38. artikuluan aurreikusitakoa, ...
89/2011 FORU AGINDUA, maiatzaren 30ekoa, Lurraldearen Antolamenduko eta Etxebizitzako kontseilariak emana, etxebizitza babestuaren promozioa aukeratzeko prozedura, martxoaren 28ko 25/2011 Foru Dekretuaren 38. artikuluan aurreikusitakoa, ezartzen duena. Foru dekretu horrek etxebizitza babestuaren eskatzaileen zentsua arautzen du(2011ko 110. NAOn argitaratutako testua, ekainaren 8an)
Atarikoa
Nafarroako Foru Komunitateko Administrazioan administrazio elektronikoa ezartzeari buruzko apirilaren 4ko 11/2007 Foru Legeak herritarren zerbitzuan izanen den administrazio elektronikoaren ezarpena bultzatzea du xede, teknika eta bitarteko elektroniko, informatiko eta telematikoak pixkanaka gehituz, teknologiak administrazio prozeduren tramitazioan aurrera egin ahala. Ildo horretan, etxebizitza babestuaren eskatzaileen zentsua arautzen duen martxoaren 28ko 25/2011 Errege Dekretuaren 22. artikuluak ezarritakoaren arabera, telematika bidez eskatzen ahal da etxebizitza babestuaren eskatzaileen zentsuan inskribatzeko, eta modu berean eguneratzen ahal da.
Gaur egun zentsuan inskribatuta dauden gehienak 35 urtez azpikoak dira. Nafarroako Estatistika Institutuak informazioaren eta komunikazioaren teknologien (IKT) eta norbanakoen merkataritza elektronikoaren (ETICCE) 2009ko eta 2010eko erabilerari buruz egindako inkestan esaten denez, 25 eta 34 urte artekoen %86,6ak erabili du inoiz Internet, eta ehuneko hori 95,9ra joaten da 16 eta 24 urte arteko jendeaz ari bagara. Gainera, Internet inoiz erabili izan duten horien artean, bi adinen tartean diren ia %94ek azken hilabetean erabili dute. Datu horiek agerian uzten dute zenbat erabiltzen duen 35 urtez azpiko jendeak Internet, eta zein maiztasun handia duen erabilera horretan.
Etxebizitza babestuaren eskatzaileen zentsua arautzen duen martxoaren 28ko 25/2011 Foru Dekretuaren 38. artikuluak ezartzen du sistemaren bat prestatzen ahalko dela etxebizitza babestuaren eskatzaileek zein promozio nahi duten aukera dezaten. Herritarrek beren eskubideak azkarrago, merkeago eta modu fidagarriago batean erabiltzeko helburua ezarrita dagoenez gero 11/2007 Foru Legean, urrats bat eginez, sistema telematiko bat ezarri da promozio bat aukeratzeko ordurako, zentsuan inskribatuta den etxebizitza babestuaren eskatzaileak interes hori badu etxebizitza babestua esleitzeko prozeduran. Horretarako, euskarri elektronikoak erabiliko dira berme juridikorik galdu gabe.
Alde horretatik, kontuan hartu behar da zentsuan inskribatutako eskatzaileek ez badute banakako promozioetakoren bat aukeratzen ez dutela eskubide apurrik ere galduko beren gogoko etxebizitza esleitzeko; izan ere, 25/2011 Foru Dekretuaren 38. artikuluak ezartzen duen moduan, norbaitek ez badu promozio jakin baten aldeko lehentasuna adierazi, esleipen prozeduran sartutako promozio guztien aldeko hautua egiten duela ulertuko da, baldin eta promozio horiek aurretik adierazitako lehentasunei egokitzen bazaizkie, eta lehentasun horiek nahikoa izanen dira zein etxebizitza/promozioren alde egiten den, haren ezaugarriak zehazteko.
Horrenbestez, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen ) artikuluak xedatzen duenarekin bat, agindu dut:
1. artikulua. Baliabide elektronikoen bidezko komunikazioa.
Promozioa aukeratzea, etxebizitza babestuaren eskatzaileen zentsua arautzen duen martxoaren 28ko 25/2011 Foru Dekretuaren 38. artikuluan aurreikusia, telematika bidez eginen da www.vivienda.navarra.es web orria baliatuz.Horretarako, interesdunak Nafarroako Foru Komunitateko Administrazioak baimendutako ziurtagiri digitala izan beharko du.
2. artikulua. Komunikazioa egiteko epea.
Oro har, aurreko artikuluan aurreikusitako promozio aukeraketa egiteko epea 7 egun naturalekoa izanen da, dagokion esleipen prozedura hasten denetik aurrera.
3. artikulua. Hautatu beharreko promozioak aurkezteko modua.
1. Esleipen prozedura bakoitzeko promozioak bloketan aurkeztuko dira, zein logela motaren eta kopururen aldeko gogoa erakusten den zentsuan inskribatzeko unean edo inskripzio horren azken aldaketan, haren arabera elkartuta.
2. Aurreko atalean ezarritako blokeetako bakoitzean, aukeratutako promozioei zein lehentasun ordena ematen dien adierazi beharko du eskatzaileak. Horrexek erabakiko du logela kopuruen arteko eta hautatu diren promozioen arteko lehentasuna.
3. Eskatzaileren batek zentsuan inskripzioa egiteko unean adierazitakoaz bestelako etxebizitzak dituen promozio bat edo gehiago aukeratuz gero, lehentasun hori hasieran adierazitakoaren mende geldituko da, non ez den hasieran hautatutako etxebizitza motako promoziorik adierazi.
4. artikulua. Bitartekoak.
Zentsua kudeatzen duen organoaren bulegoetan eta Infonavarrakoetan beharrezko baliabide informatikoak prestatuko dira interesdunek foru agindu honetan araututako promozioa aukera dezaten.
Xedapen Iragankor Bakarra. 2011n promozioa aukeratzeko epea.
2011. urtean etxebizitza babestua esleitzeko egiten diren prozeduretan 10 egun balioduneko epea emanen da, esleipen prozedura hasten denetik aurrera, foru agindu honen 1. artikuluan aurreikusitako promozioa aukeratzeko.
Azken Xedapenetako Lehena. Nafarroako Aldizkari Ofizialean argitaratzea.
Foru agindu hau Nafarroako Aldizkari Ofizialean argitaratuko da.
Azken Xedapenetan Bigarrena. Indarra hartzea.
Foru agindu honek aurtengo ekainaren 1ean hartuko du indarra.
