Castellano | Euskara | Français | English
Ezagutzera eman
Ikusi egun honetako albiste gehiago
Nafarroako Gobernuak "administrazio elektronikoa" sustatuko du izapideak interneten bidez kudeatu ahal izateko asteartea, 2007.eko otsailak 6
Nafarroako Gobernuaren Presidenteordea eta Ekonomia eta Ogasun Departamentuko kontseilari Francisco Iribarren Fentanes jaunak eta Lehendakaritza, Justizia eta Barneko kontseilari Javier Caballero Martínez jaunak, goiz honetan, Foru Legeko proiektua aurkeztu dute "administrazio elektronikoa" Nafarroako Foru Gobernuan ezartzeko. Nafarroako Gobernuak aipatutako proiektua atzo onetsi zuen eta laster Parlamentuari igorriko dio eztabaidatzeko.
Foru legeko proiektu honen xedea honakoa da: pixkanaka administrazio berri bat sortzea informazio eta komunikazio teknologia berrien erabileratik abiatuta (IKT). Era horretan, hiritarrek euren eskubideak aitortzea, betekizunak betetzea, eta, laburbilduz, erakunde honekin eta bertako langileekin harremanetan izatea nahi da, modu errazean eta arinean, gaur egun dituzten berme legal guztiak bere horretan mantenduz. Horretaz gain, proiektuak Administrazioak erabiltzen duen informazio gehiena hiritarren esku jarri nahi du, gardentasun handiagoa lortzeko eta hiritarrek zerbitzu publikoen kudeaketan eta erabakiak hartzeko prozesuetan gehiago parte hartzeko.
Hain zuzen ere, legea indarrean sartu ondoren, hiritarrek eskaerak aurkeztu, informazioak lortu, dokumentuak zuzendu, administrazio errekurtsoak egin, administrazio ziurtagiriak eta dokumentuen kopiak lortu, prozeduren izapideen egoera ezagutu, teknologikoki eskaintzen zaizkien zerbitzuetan sartu, entzunaldiaren edo informazio publikoen bidez prozeduretan parte hartu, ikastetxetan izena eman, fakturak aurkeztu edo Ogasun publikoan diru-sarrerak egin ahal izango dituzte. Legeak, onetsiz gero, Foru Administrazioko 21.000 langileei eta Nafarroako 600.000 biztanleei eta erakunde honekin harremana duten guztiei eragingo lieke.
Izapideak arintzeko eta informazio hobea eskaintzeko neurriak
Foru legeko proiektu honetan aipatutako neurri nagusien artean honakoak nabarmendu behar dira:
- Erregistro Nagusi bat sortzea: nahi duten guztientzat eskura izango da Nafarroako Gobernuaren interneteko web atarian: www.navarra.es. Erregistro honetan, hiritarrek euren eskaerak eta bestelako dokumentuak boluntarioki eta doan aurkeztu ahal izango dituzte, eguneko hogeita lau ordutan, urte guztiko egun guztietan. Horretarako, elektronikoki erabili ahal izateko araututako formulario elektronikoak egitea aztertuko da.
- bilera birtualak: foru legeko proiektua ez dagokio bakarrik Administrazioak hiritarrekin duen harremanari. Horretaz gain, administrazio-unitateen barne harremanak modernizatzen ditu eta, elkargoetako erakundeen "bilera birtualak" barne hartzen ditu, nobedade gisa, hau da: leku desberdinetatik baliabide elektronikoen bidez antolatzen diren bilerak.
- administrazio egintzen jakinarazpenak eta Iragarki Taula Elektronikoa: Administrazioaren edozein egintza erabateko lege-baliotasunarekin jakinarazi ahal izango da, hiritarrak adierazten duen helbide elektronikoan eta Iragarki Taula Elektronikoa erabili ahal izango da egungo ediktuen udal taulen ordez (egun, bertan aipatzen dira interesatua aurkitu ezin denean egin beharreko jakinarazpenak).
- oharrak: era berean, foru legeari esker, Administrazioak, nahi duten guztiei, zerbitzu zehatzei edo egintza publikoei buruzko mezuak, oharrak, informazioak eta bestelakoak bidali ahal izango dizkie sakelako telefonora edo antzeko gailuetara.
- sinadura elektronikoa erabiltzea: dokumentuak Administrazioan aurkezteko sinadura elektronikoa erabili ahal izango da. Garrantzi handikoetarako, berriz, aurreratutako sinadura eskatuko da.
- hiritarrek informazioa eskurago edukitzea eta hobeto erabiltzea atal berriari esker, besteak beste, Nafarroako Aldizkari Ofiziala, lege eta araudietako arau nagusiak, aurrekontu orokorrak eta kontu orokorrak, enplegu publikoko deialdiak, diru-laguntzen deialdiak, kontratazio ataria, hirigintza planeamenduko erregistroa, iradokizunen eta erreklamazioen postontzia eta aukerazko bestelako administrazio erregistroak eskura izango dituzte.
Administrazio Elektronikoaren Batzordea
Aurreikuspen hauek eraginkortasunez garatzeko, proiektuak Administrazio Elektronikoaren Batzordea eratuko du, foru Administrazioko departamentuen ordezkari guztiek osatuta. Hura beharrezko jarduerak sustatzeaz, antolatzeaz eta koordinatzeaz arduratuko da.
Lege oro garatzerakoan eta aplikatzerakoan hiritarren datu pertsonalak babesteko exijituko da. Horretarako, eta existitzen direnen osagarrizko berme gisa, proiektuak Foru Erkidegoko Arartekoaren betekizuna azpimarratuko du eta Gobernuari, Nafarroako Datu Pertsonalak Babesteko Agentzia sortzea sustatzeko gaitasuna emango dio.
Azkenik, aipatutako legeak lau urteko epea ezarriko du, hiritarraren zerbitzura, arauak egiteko, jarduera partikularrak baimentzeko, isunak ezartzeko, desjabetzeak egiteko, erregistro publikoetan izena emateko, ikastetxetan izena emateko eta matrikulak egiteko, Ogasunari ordaintzeko eta administrazio errekurtsoak izapidetzeko eta ebazteko administrazio-prozeduretako oinarrizko elementuak elektronikoki ezartzeko.
