Castellano | Euskara | Français | English
Ezagutzera eman
Ikusi egun honetako albiste gehiago
Eparotzeko Santa Fe Monasterioko ostatua inauguratu da Urraulgoitin larunbata, 2007.eko martxoak 24
Nafarroako Gobernuko Kultura eta Turismo kontseilaria, Juan Ramón Corpas Mauleón, Urraulgoitin izan da gaur, Eparotzeko Santa Fe monumentu-multzoko ostatuaren inaugurazioan buru.
Eparotzeko garaia.
(
irudia handitu
)
Kontseilariaz gain, ekitaldian izan dira Urraulgoitiko alkatea, Martín Iriarte Vizcay; Cederna-Garalur erakundeko lehendakaria, Javier Esparza Gurrea; establezimenduko kudeatzailea, Asunción Díaz Güell; Urraulgoitiko Udaleko idazkaria, Josetxo Bayona; eta Cederna-Garalur erakundeko teknikaria, Carlos García Pascual.
Santa Fe multzo arkitektonikoa Urraulgoitiko Bailarako gune kultural eta espirituala da; Kultura Ondasun izendatu zuten uztailaren 26ko 235/1993 Foru Dekretuaren bitartez. Multzoak hiru arkitektura-elementu dauzka: Erdi Aroko basilika, XVII. mendeko klaustroa eta etxebizitza-eraikinak, beren patio eta XV. mendeko garaiarekin; azken elementu horri eraikin zibil ere esaten zaio.
Etxebizitzen alderdian hotel txiki bat dago eta gaur eguerdian inauguratu da; hotelak dauzka sei logela bikoitz, jangela eta taberna. Proiektua Urraulgoitiko Udalak sustatu du eta Nafarroako Gobernuak 581.528 euro jarri ditu; zenbateko horrekin ordaindu dira proiektua idazteko aurrekontuaren %90 eta obrak egikaritzeko aurrekontuaren %69,50 (aurrekontua 785.216 eurokoa zen). Gainerakoa jarri dute Cederna-Garalur erakundeak, Leader + ekimena medio (70.000 euro), eta Udalak.
Multzoa lehen ere birgaitu zuten, Udalak sustatuta eta Kultura eta Turismo Departamentuak lagunduta, 1994an, 1996an eta 2001ean; birgaitzean gastatu ziren, guztira, 127.000 euro.
Horren harian, Cederna-Garalur erakundea, Nafarroako Gobernuarekin elkarlanean, berreskuratze-proiektuaren prozesu guztian babesle eta laguntzaile tekniko izan da, hauen bitartez: Pirineoaurreko Arroen Garapen Agentea, Nafarroako Mendietako Turismo Ataleko teknikariak eta Ekintzaileentzako Zerbitzuen Atala; azkenak proiektuaren bideragarritasuna aztertu zuen.
Nafarroako Gobernuko Kultura eta Turismo Departamentuak sustatutako Nafarroako Mendiak Dinamizatzeko Planaren Segimendu Batzordeak, martxoaren 19an, Kultura eta Turismo Departamentuak 20.992,29 euroko dirulaguntza (proiektuaren %64,23, Planeko gainerako proiektuei bezalaxe) emateko proposamena egitea onartu zuen. Zertarako? Santa Fe multzo historikoan esku hartzeko: sarbideak urbanizatzeko, Monasterioko eta hoteleko aparkalekuak egokitzeko, eta kanpoko harresiak garbitzeko eta lotzeko, monumentu-multzoa ixte aldera.
Esku-hartze hori ondare historiko, etnografiko eta industriala berreskuratzeko eta turismorako erabiltzeko Nafarroako Gobernuak sustatzen duen jarduera-ildoaren barruan dago, birgaitze-proiektu hauen moduan: Arbizuko, Zugarramurdiko eta Amaiurko errotak; Oliteko La Joyosa Guarda, Pujadas Jauregia, Berako Churrut eta Baztango Ursua Jauregia hotelak; eta, industri ondarean, Lizarrako Tximista eta Marcillako Villamarcilla hotelak.
