"Silencios: 22 pintores navarros" (Isiltasunak: Nafarroako 22 pintore) erakusketaren bidez zabalduko da Baluarten "Punto de Encuentro con el arte contemporáneo" (Topaketa arte garaikidearekin) programa larunbata, 2007.eko martxoak 31

Miguel Sanz Sesma Nafarroako Gobernuko presidenteak gaur eguerdian inauguratu du Nafarroako gaur egungo pinturari buruzko erakusketa, "Silencios: 22 pintores navarros" (Isiltasunak: Nafarroako 22 pintore) izenburupean. Gaurtik ekainaren 3a arte ikus daiteke Baluarteko Muralla Aretoan.

Erakusketaren kartela. ( irudia handitu )

Erakusketan, hurrengo hauen lanak ikus daitezke: Florencio Alonso, Juan José Aquerreta, Alfonso Ascunce, Javier Balda, José Miguel Corral, Santiago García, Luis Garrido, Elena Goñi, Antón Hurtado, Miguel Leache, Jokin Manzanos, Ignacio Muro, Félix Ortega, Pedro Osakar, Pedro Osés, Diego De Pablos, Julio Pardo, Dick Rekalde, Jesús Rivero, David Rodríguez Caballero, Pedro Salaberri eta Koldo Sebastián.

"Punto de Encuentro con el Arte Contemporáneo" (Topaketa Arte Garaikidearekin) programako lehen erakusketa da, eta Nafarroako Gobernuak sustatu du Kultura eta Turismo Sailaren bidez. Programa horren barruan, nazioarteko eta Espainiako arte garaikideari buruzko beste erakusketa bi egongo dira. Ekainetik irailera, areto berean, "Markus Lüpertz. Cuerpo y paisaje" (Markus Lüpertz. Gorputza eta paisaia) erakusketa ikusi ahal izango da, Kosme de Barañano komisarioaren eskutik. Erakusketa horretan, artista aleman horren lana ikusi ahal izango da, Alemaniako espresionismo berriaren edo pintura basatiaren barruan sartuta dagoena. Urritik abendura, María de Corral komisarioak Espainiako gaur egungo arteari buruzko ikuspegia eta hautaketa eskainiko digu "Planes futuros: arte español de los 2000" (Etorkizuneko planak: 2000tik aurrerako arte espainiarra) izenburuko erakusketan.

Modu horretan, arte garaikidea nafarrengana hurbildu nahi da eta Artea Bultzatzeko Planaren bidez eta "Monografías de Artistas Navarros Contemporáneos" (Nafarroako Artista Garaikideen Monografiak) bilduma Minor eta Maior serietan aterata abian jarritako jardunak osatuko dira.

"Silencios. 22 pintores navarros" (Isiltasunak. Nafarroako 22 pintore) izenburuaren bidez, erakusketaren eduki tematikoa laburtzen da. Juan Manuel Bonet komisarioaren hitzetan, hogeita bi artista dira, eta bakoitzak pintura ikuspegi desberdinetik ulertzen du.

Florencio Alonso, Juan José Aquerreta, Alfonso Ascunce, Javier Balda, José Miguel Corral, Santiago García, Luis Garrido, Elena Goñi, Antón Hurtado, Miguel Leache, Jokin Manzanos, Ignacio Muro, Félix Ortega, Pedro Osakar, Pedro Osés, Diego De Pablos, Julio Pardo, Dick Rekalde, Jesús Rivero, David Rodríguez Caballero, Pedro Salaberri eta Koldo Sebastián artisten lanak, erakusketan egoteaz gain, katalogoan jaso dira, egile bakoitzaren argazkiarekin batera.

Katalogo honetan, lanaren deskripzioaz gain, Juan Ramón Corpas Mauleón Kultura kontseilariak egindako aurkezpen instituzionala jaso da; komisarioaren testu bat, eta oraintsuko arte nafarraren kronologia bat, Carlos Chocarrok eta Celia Martínek idatzitakoa. Argazki orokor horretan, hogeita hamabost urteko kronologia jaso da. Abiapuntua 1972ko "Iruñeko Topaketak" dira, eta gaur egun arte iristen da. Aretoko foileto bat ere argitaratu da.

Jarduera osagarri moduan, apirilaren 26rako hitzaldi bat programatu da. Horretan, Juan Manuel Bonet komisarioak azken hamarkadetako arte nafarrari buruz hitz egingo du.

Erakusketan sarrera doakoa izango da, ekainaren 3a arte ikus daiteke, 17:00etatik 21:00etara, asteartetik ostiralera, eta 11:00etatik 14:00etara eta 17:00etatik 21:00etara, larunbat eta jaiegunetan.

Dokumentazioa:: Juan Manuel Bonet testuaren katalogoa

Jar zaitez gurekin harremanetan | Erabilerraztasuna | Lege abisua | Webaren mapa