Castellano | Euskara | Français | English
Ezagutzera eman
Ikusi egun honetako albiste gehiago
Gobernuak 2008-2012 aldiko Iruzurraren Aurkako Plana egiteko ardura eman dio Zerga Ogasunari astelehena, 2008.eko martxoak 3
Nafarroako Gobernuak akordioa erdietsi du gaurko bileran, eta ondorioz, 2008-2012 aldiko Iruzurraren Aurkako Plana egiteko ardura eman dio Nafarroako Zerga Ogasuna erakunde autonomoari.
Berritasun nagusi gisa, honako hau aipatu daiteke: eragile ekonomikoek eta sozialek, eta herritarrek, oro har, parte hartuko dute dokumentua lantzeko prozesuan.
Plan berriak 2003-2007 aldikoa ordezkatuko du. Plan zaharraren emaitzak, hain zuzen, joan den astean aurkeztu zituzten, jendaurrean, eta haren indarraldian 532 milioi euro berreskuratu ahal izan ditu Zerga Ogasunak.
Ildo estrategikoak
Aurreko planak bezalaxe, berriak ere bost urteko iraupena izanen du, eta Ogasunaren plangintza estrategiko orokorra ezartzea izanen du helburu, erakundeak bere zereginak bete ahal izateko. Plangintza orokorra, gainera, jarduera arloen eta funtzioen araberako programa zehatzago eta espezializatuago baten bidez osatuko dute, eta bertan, honako hauek egonen dira, besteak beste: urteroko ikuskaritza planak, zergak kudeatzeko eta biltzeko planak, eta zergadunentzako zerbitzuen gaineko planak daude.
Dokumentu berriak honako ezaugarri nagusi hauek izanen ditu:
- Estrategikoa. Nafarroako Zerga Ogasunaren jarduera ildoarekin bat eginez (zerbitzua + kontrola = betetzea), erakunde autonomoak datozen lau urteetan egin beharrekoa zehaztuko du.
- Integrala. Ogasuneko unitate guztiak eta erdietsi beharreko helburuak barne hartuko ditu. Ideia nagusia honako hau izanen da: iruzurraren aurkako borroka guztion ardura da.
- Eraginkorra. Barne lanaren emaitza gisa, zehatza izanen da, generikoa baino gehiago. Antolakuntzaren, plangintzaren, teknologiaren, giza baliabideen, eta baliabide materialen arloko neurriak proposatuko ditu, eta baita esku-hartze espezifikoak ere, arrisku sektoreen gainean.
- Ebaluagarria. Neurri bakoitzeko, helburuak, xedeak, adierazleak, epeak eta arduradunak zehaztuko dituzte.
- Parte-hartzea. Barne lanaz eta Ogasuneko langile guztien ekarpenez gain, iruzurraren aurkako borroka guztion kontua dela kontuan hartuta, Planaren diseinuan eragile ekonomikoek eta sozialek, profesionalen erakundeek eta elkarteek, eta herritar guztiek, oro har, parte hartu ahal izanen dute.
- Hezkuntza. Iruzurrari aurrea hartzeko tresnarik eraginkorrenetako batek, zergen arloko balioen gaineko hezkuntzak, berariazko atala izanen du Planean. Izan ere, sarritan hezkuntza alde batera uzten da, haren emaitzak epe luzekoak izaten baitira.
Nafarroako Gobernuaren akordioari jarraiki, Zerga Ogasunak Planaren lehen zirriborroa eginen du, eta Erakundearen Zuzendaritza Batzordeak onartu ondoren, kanpo eragileei aurkeztuko diete (eragile ekonomikoak eta sozialak, alderdiak, elkarteak), euren iritzia emateko. Ekarpen horiekin, bigarren zirriborroa idatziko dute, eta jendaurrean jarriko dute, herritarrek ere euren ekarpenak egin ahal izateko. Amaitzeko, herritarren ekarpenak aztertu ondoren, azkeneko dokumentua idatziko dute, eta Nafarroako Gobernuak onartuko du. Prozesu osoa burutzeko aurreikusi duten epea zortzi hilekoa da.
