Erriberrin, uztailaren 18tik abuztuaren 3ra bitarte, Antzerki Klasikoaren Jaialdia eginen dute asteazkena, 2008.eko maiatzak 21

Aurrekontua 840.000 eurokoa izanen da, 35 ekitaldi eginen dituzte, hainbat "ingurunetan", eta 16 konpainiak parte hartuko dute

Jaialdiaren kartela.

Juan Ramón Corpas Mauleón Kultura eta Turismo Departamentuko kontseilariak Erriberriko Antzerki Klasikoaren Jaialdia aurkeztu du, gaur goizean, Pedro Luis Lozano Úriz Kulturaren zuzendari nagusiarekin eta Álex Ruiz Pastor zuzendari artistikoarekin batera. Jaialdia Nafarroako Gobernuak antolatzen du, eta aurtengoa uztailaren 18tik abuztuaren 3ra bitarte eginen dute. Antolatzaileen arabera, aurten interpretazioari eskainiko diote arreta berezia, eta beraz, "aktoreen jaialdia" izanen da.

Jaialdia Erriberriko Udalak eta "Autopistas de Navarra" eta "Cementos Portland Valderrivas" enpresek babesten dute, eta Erriberriko Errege Jauregiaren eta "Nafarroa" Jatorrizko Deituraren Kontseilu Arau-emailearen laguntza izaten du. Aurtengoak 840.000 euroko aurrekontua du (iazkoak baino 100.000 euro gehiago). Guztira 35 ekitaldi eginen dituzte (emankizunak eta bestelako jarduerak), eta 16 konpainiak parte hartuko dute.

Jaialdia egiteko hainbat "ingurune" aukeratu dituzte, antzerkiari buruzko ideiak edo kontzeptuak biltzen dituzten ibilbideak. Honako hauek, hain justu: Don Juanen mitoa, Shakespeareren mitoa, hitz magikoa, mihiaren komikoak, kale ingurunea, bi une, eta aktoreen jaialdia.

Don Juanen mitoari dagokionez, "El burlador de Sevilla" eskainiko dute, "Teatro de la Abadía" konpainiaren eskutik. Haur eta gurasoentzako jarduera bat ere eginen dute, "Cómo contar mitos a los niños: El burlador sin sardina", Luisa eta Marisaren eskutik. Era berean, mahai inguruak eginen dituzte, txoritegian, "El burlador a través de la literatura. Cómo ver a Don Juan en el siglo XXI" izenburuarekin.

Shakespeareri dagokionez, bere lanen lau ikusmolde aurkeztuko dituzte. Elkarrengandik urrun dauden antzerki proposamenak izanen dira guztiak ere: "Mucho ruido y pocas nueves", "Teatro de Fondo" konpainiarekin; "Burgher King Lear", Joao García Miguelena; "El mercader de Venecia", "Darek Teatro" konpainiaren eskutik; eta "Espíritus del bosque", "Morboria Teatro" konpainiarekin.

Gainera, Emilio Gutiérrez Cabaren "Sonetos" eskainiko dute, estreinakoz. Antzerki klasikoaren muinarekin jolastea helburu duen lana da; hots, hitzarekin eta aktorearekin jolastea helburu duen lana.

Mihiaren komikoei dagokienez (euren bidean aurkitzen zituzten herri eta hirietan emanaldiak eskaintzen zituzten aktore eta konpainiak, antzerkia txoko guztietara helarazten zutenak), lau ikuskizun prestatu dituzte, artearen komedia abiapuntu hartu eta gaur egungo eskaeretara iritsi arte. Honako hauek, hain justu: "Juglarías", Carlos Albarekin; "El Buscón", Templanza konpainiaren eskutik; "Ñaque", Metamorfosis konpainiarekin; eta "La herencia de Pantalone", "Venecia Inscena" konpainiaren eskutik.

Bestalde, kale ingurunea proiektuen antzerki gune bilakatuko da, klasikoetan oinarrituta. Honako hauek ikusi ahal izanen dira: "Meninetes" Volantins konpainiaren eskutik; "La Herencia de Pantalone", Venecia Inscenarekin; "Juglarías", Carlos Albarekin; "Espíritus del bosque", Morboria konpainiarekin; eta "Antes de la función" (bertan, ikusleak, emankizunerako bidean, beste garai bateko pertsonaiaren batekin egin dezake topo, edozein bazterretan).

Jaialdian garrantzi berezia izanen du Rafael Álvarez "El Brujo"ren parte-hartzeak. El Brujok "De Místicos y Pícaros" eskainiko du Erriberrin (Nafarroakoa lanaren bigarren emanaldia izanen da, Almagron estreinatu ondoren). Era berean, garrantzi berezia izanen du Antzerki Klasikoko Konpainia Nazionalaren eta Antzerki Klasikoko Gazte Konpainia Nazionalaren parte-hartzeak. Calderón de la Barca eta Lope de Vegaren lanak eskainiko dituzte, Eduardo Vasco eta Helena Pimentaren zuzendaritzapean (hurrenez hurren).

Dokumentazioa:: Berri osoa.doc; Programa; Web gunea

Jar zaitez gurekin harremanetan | Erabilerraztasuna | Lege abisua | Webaren mapa