Castellano | Euskara | Français | English
Ezagutzera eman
Ikusi egun honetako albiste gehiago
Gobernuak 233,3 milioi euroko ekarpena eginen du, 2009-2012ko Tokiko Inbertsioen Planaren bidez asteartea, 2008.eko ekainak 24
Planaren baitan, 40 milioi euroko gastua eginen dute, udal eta kontzejuek erabakitzen dituzten inbertsioak egiteko partida berri batean
Nafarroako Gobernuak 233,3 milioi euroko ekarpena eginen du 2009-2012ko Tokiko Inbertsioen Planaren bidez, toki erakundeek inbertsioak egiteko, azpiegituretan eta bestelakoetan. Miguel Sanz Nafarroako Gobernuko presidenteak eta Amelia Salanueva Murguialday Toki Administrazioko Departamentuko kontseilariak inbertsioen plana eta Toki Ogasunen Parte-Hartze Funtsaren banaketari buruzko Lege Proiektua aurkeztu dituzte, gaur goizean.
Funtsak 240.782.458 euroko zuzkidura izanen du 2009an, eta 2010, 2011 eta 2012an, ekainetik ekainera bitarteko KPI gehi 2 puntu erantsiko dizkiote aipaturiko zenbatekoari. 2009ko 240 milioiak honela banatuko dituzte: 157,7 milioi, transferentzia arruntetarako; 56,2 milioi, kapital transferentzietarako (inbertsioetarako ekarpenetarako, Inbertsio Planaren Legeak araututa); 21,5 milioi euro, beste laguntza batzuetarako (Iruñeko hiriburutza agiria barne); eta 4,9 milioi euro, udalbatzetako kideei ordaintzeko.
Era berean, 2009-2012ko Tokiko Inbertsioen Planaren bidez 233,3 milioi euroko ekarpena eginen dute datozen lau urteetan, honela banatuta: 56,2 milioi, 2009an; 57,6 milioi, 2010ean; 59 milioi, 2011n; eta 60,5 milioi, 2012an.
Zenbateko horiei esker, Nafarroako Gobernuak eta toki erakundeek hobekuntzak egin ahal izanen dituzte; hau da, inbertsio publikoak egin ahal izanen dituzte ekonomia bizirik mantentzeko. Bestalde, Toki Araubidearen Foru Batzordeak aldeko txostena eman die bi lege-testuetako edukiari eta zenbatekoei. Aipaturiko Batzordean, Nafarroako Gobernuaz gain, Nafarroako Udalerrien eta Kontzejuen Federazioak ere parte hartzen du, zenbatekoak handitzeko asmoarekin betiere.
Esan dugun moduan, partida orokorrari KPI gehi 2 puntu erantsiko dizkiote urtero, eta horrela, toki erakundeek diru gehiago jasoko dute, urterik urte. Izan ere, banaketa zerga ordainketaren arabera eginen balute, ordainketak behera eginez gero udalek eta kontzejuek diru gutxiago jasoko lukete.
Toki Ogasunen Parte-Hartze Funtsaren banaketari buruzko Lege Proiektuak eta 2009-2012ko Tokiko Inbertsioen Planak garrantzizko berrikuntzak dituzte. Izan ere, Nafarroako azpiegituren eta oinarrizko zerbitzuen egoera nabarmen hobetu da azkeneko urteetan, eta ondorioz, testuetan partida berriak eta laguntza gehiago sartu ahal izan dituzte. Gainera, aldagai gehiago hartu ahal izan dituzte kontuan.
Aldaketen onuradun nagusiak herri txikienak izanen dira, Foru Komunitatearen lurralde oreka erdieste aldera. Era berean, toki erakundeek askatasuna izanen dute dagozkien partidetako batzuk nahi duten bezala inbertitzeko, udal eta kontzejuen finantzaketa eta autonomia hobetze aldera.
Horrela bada, eta aurreko urteetan bezalaxe, Inbertsioen Planak eutsi eginen die, batetik, plan zuzentzaileei (presio handiko ur hornidura, ibai eta erreken arazketa eta hondakinen bilketa eta tratamendua), eta bestetik, toki programazioko inbertsioei (presio txikiko ur hornidura, sareak, argiztapena, zolaberritze lanak, udal eraikinak, bideak eta hilerriak), gisa horretako esku hartzeak egin ahal izateko, Nafarroa osoan. Hala ere, azpiegiturak oso egoera txarrean dauzkaten erakundeek edo egoera ekonomiko txarrean daudenek laguntza gehiago jaso ahal izanen dituzte, eta aldi berean, zerbitzu gehien dauzkatenek edo biztanle gehiagorentzako adinako zerbitzuak dituztenek, udalerri nagusi izateagatik, abantailak izanen dituzte.
Berritasun nagusia honako hau da: udal eta kontzejuek partida bat izanen dute erabakitzen dituzten inbertsioak egiteko. Toki erakundeek babes handia eman diote partida horri, Nafarroako Udalerrien eta Kontzejuen Federazioaren bidez. 2009-2012 aldian, hain zuzen, 40 milioi euroko zuzkidura izanen du aipaturiko partidak, eta udal eta kontzeju guztiek nahi dituzten inbertsioak egin ahal izanen dituzte, datozen 4 urteetan, jasotzen duten zenbatekoaren bidez. Zentzu horretan, gutxieneko zenbatekoak ezarri dituzte: kontzejuek gutxienez ere 1.000 euro jasoko dituzte, eta udalek, berriz, gutxienez ere 3.000 €.
Udal eta kontzeju bakoitzak jasoko duen zenbatekoa eta azpiegituren egoera indizeak (hornidura, argiztapen eta zolaberritze lanak) jendaurrean jarriko dituzte, toki erakundeek aukera gehiago izateko nahi dituzten laguntzak eskuratzeko.
Azkenik, berritasun gisa, zeharbideetarako partida bat sortu dute, hobekuntzak koordinatuta egin ahal izateko (Toki Administrazioko Departamentua eta Herri Lan, Garraio eta Komunikazio Departamentua).
