Castellano | Euskara | Français | English
Ezagutzera eman
Ikusi egun honetako albiste gehiago
Sanz presidentea Cintruénigora joan da, altzarien sektoreko hiru aitzindariri egin dieten omenaldira osteguna, 2008.eko uztailak 17
Joaquín Alvero, Francisco Pérez eta Alfonso Rincóni esker ona adierazi diete, hirurehun cintruenigoarren ogibide den sektorea bultzatzeagatik
Sanz presidentea eta Roig kontseilaria omendutakoekin.
(
irudia handitu
)
Miguel Sanz Sesma Nafarroako Gobernuko presidentea Cintruénigora joan da, gaur goizean, Joaquín Alvero Cornago, Francisco Pérez Navascués eta Alfonso Rincón Fernández altzarien sektorearen bultzatzaile eta aitzindariei egin dieten omenaldira. Hartara, esker ona adierazi diete euren ibilbidearengatik, egin duten lana eta Erriberako herrian hirurehun pertsona altzarien sektoreari esker bizi direla kontuan hartuta.
Sanz presidentearekin batera, José María Roig Aldasoro Berrikuntza, Enpresa eta Enplegu Departamentuko kontseilaria eta Adolfo Navascués Navascués Cintruénigoko alkatea bildu dira omenaldira.
Hiru cintruenigoarrei Alhama Hotelean egin diete omenaldia, eta hasteko, "Cintruénigo Fabricantes de Muebles" erakundearen bideo bat eskaini dute. Erakundearen ordezkariak, Alfonso Rincónek (izen bereko omenduaren semea), eskerrak eman dizkie hiruei, euren ezaguerak eta eskarmentua gainerakoekin partekatzeagatik. Adierazi duenez, hiru omenduen laguntzarik gabe "ez genukeen aurrera egin izanen".
Alfonso Rincónek gaineratu duenez, "Cintruénigo Fabricantes de Muebles erakundeak eskerrak eman nahi dizkizue hiruei, ongi egindako lanarekiko maitasunaren berri eman izanagatik, gu guztiok profesional bihurtzen lagundu izanagatik, eta zuengandik jaso ditugun ezaguerengatik eta eskarmentuarengatik".
"Cintruénigo Fabricantes de Muebles" proiektuak zortzi enpresa biltzen ditu, 6,4 milioi euro fakturatzen ditu urtean, eta zuzeneko 100 langiletik gora ditu.
Ondoren, Sanz presidenteak eskultura bana eman die hiruei. Eskulturak ahalegina eta nekaezintasuna islatzen ditu, eta egilea Bóregan da. Francisco Pérez Navascués 1986an hil zen, eta haren eskultura Julia Azagra alargunak hartu du. Alfonso Rincón Fernándezek eskerrak eman ditu, hiruen izenena.
Jarraian, Cintruénigoko alkatea mintzatu da, eta zorionak eman dizkie hiruei. Bizitza osoa lanean eman izanak herrian eragin onuragarriak izan dituela adierazi du.
Ekitaldiari amaiera emateko, Nafarroako Gobernuko presidentea mintzatu da. Adierazi duenez, proiektu bat bideragarria eta ganorazkoa izanen bada, beharrezkoa da pertsona edo talde batek proiektu horretan sinetsi eta bultzada ematea. Hiru omenduen ahalegina eta Cintruénigoko altzarien sektoreari eman dioten laguntza azpimarratu ondoren, adinekoei eskerrak eman behar zaizkiela adierazi du presidenteak, belaunaldi berriei helarazi dizkieten ezaguerengatik. Gaineratu duenez, "adinekoak zaintzen dakien herria, gaur egun ongi dago, eta etorkizunerako prest dago".
Altzarien sektoreak Cintruénigon duen garrantzia azpimarratu du Miguel Sanz presidenteak, eta gaur egungo krisi ekonomikoa gorabehera, Cintruénigoko enpresak aurrera ateratzeko gai direla adierazi du. Izan ere, kalitatezko enpresak dira eta zerbitzu ona eskaintzen dute. Presidenteak honako gomendio hauek eman dizkie omenaldira bildu direnei: "pauso txikiak, bista ona, asmo onak, eta aukeren zain egotea".
Omenduen biografia laburra
Joaquín Alvero Cornado. 1935ean jaio zen. Lan ibilbidea 16 urterekin hasi zuen, lanbidea Cintruénigoko arotzekin ikasiz. 17 urterekin, bere negozioa sortu zuen, ukuilu zahar batean. Urteek aurrera egin ahala lokala hobetu eta makina berriak erosi zituen, hasiberrientzako eredu bilakatu arte.
Francisco Pérez (1941-1986). Altzarien munduko ibilbidea 7 urterekin hasi zuen, inguruko hainbat lantegitan ikasten hasi zenean, eta 23 urterekin, bere negozioa sortu zuen. Profesionaltasun handiko pertsona izan zen, eta gainera, herriko gazteak trebatzeko tailer bilakatu zuen bere enpresa.
Alfonso Rincón Fernández. 1930ean jaio zen, eta 55 urtetik gora igaro ditu lanean. Egurra lantzeaz gain, ogibidearen garrantziaren berri helarazi die seme-alabei. Oso txikitatik hasi zen ikasten, eskualdeko arotzekin. Bere lehenengo lantegia etxeko kotxetegian egin zuen. Bizitza osoa lanean eman du, eta seme-alabei enpresaburu izateko aukera eman die, oinarri sendoekin.
