Castellano | Euskara | Français | English
Ezagutzera eman
Ikusi egun honetako albiste gehiago
Gobernuak 1,5 milioi euroko gastua egiteko baimen eman du, Nafarroako Ortofotografia eta Mapa Topografikoa eguneratzeko
astelehena, 2008.eko urriak 13Lurraldearen plangintza egiteko eredu gisa erabiltzen duten kartografia 1:5.000 eskalako Mapa Topografikoa da, eta Ortofotografiak lurraldea airetik ikustea ahalbidetzen du, ibilgailuen forma eta lursailen mugak bereizteko adinako zehaztasunarekin
Nafarroako Gobernuak bi akordio erdietsi ditu gaurko bilkuran. Honako hauek: batetik, Nafarroako Mapa Topografikoa (1:5.000) eguneratzeko kontratua egiteko baimena (Foru Komunitate osoko oinarrizko kartografia, Geografia Informazioaren Sisteman -GIS- sartzeko); eta bestetik, Nafarroako Ortofotografia (1:5.000) egiteko baimena. Bi proiektuetarako gastua 1,5 milioi eurokoa izanen da.
Lurraldea ezagutu, kudeatu eta haren plangintza egiteko eredu gisa erabiltzen duten kartografia Nafarroako Mapa Topografikoa (1:5.000) da, eta hortaz, funtsezko elementua da lurraldeari buruzko informazioa izateko, Nafarroako ekonomia eta gizartea behar bezala garatu daitezen bermatzeko, eta Nafarroaren iraunkortasuna bermatzeko.
Nafarroan kartografia analogikoaren garaitik (joan den mendeko 70eko hamarkadaz geroztik) sortzen dute informazio hori, baina orain teknologia digital berrietara egokituta. Hala, datuak GIS tresnetan erabili eta Internet bidez zabaltzeko zerbitzuetan (SITNA edo IDENA, besteak beste) integratu ahal izatea ahalbidetuko duen eredu bat lantzen ari dira gaur egun. Gainera, informazio mota honen balio nagusia zorroztasuna edo kalitatea da; hots, informazioaren zehaztasuna eta gaurkotasuna.
Eta kalitate eskakizunak direla-eta, beharrezkoa da Mapa Topografikoa (1:5.000) zenbait urteko kontratuen bidez eguneratzea. Are gehiago orain, Europako INSPIRE Zuzentarauak (Europako Informazio Espazialaren Azpiegitura) xedatutakoari jarraiki Administrazioek sortzen duten informazio geografikoa bizkor eta modu seguruan aurkitu eta erabili ahal izateko bitartekoak izatea beharrezkoa delako.
Mapa Topografikoa eguneratzeko hainbat lan egin beharko dituzte: hegaldi fotogrametriko digitala (25cm/pixel), sostengu fotogrametrikoa, aireko triangelaketa, goraguneen eredu digitala, eta Nafarroa osoko orto-argazkiak (25cm/pixel). Hori guztia egiteko aurrekontua 952.592,11 eurokoa da, honela banatuta: 464.679,08 euro, 2009ko aurrekontuetatik; eta 487.913,03 euro, 2010ekoetatik.
Nafarroako Ortofotografia
Nafarroako Gobernuak Tracasa enpresari agindu dio Ortofotografia egiteko (2009-2010 aldian), hegaldi fotogrametriko digitalerako (25cm/pixel), sostengu fotogrametrikorako, aireko triangelaketarako, goraguneen eredu digitalerako eta Nafarroa osoko orto-argazkietarako (25cm/pixel) beharrezkoak diren bitartekoak bermatzeko. Aurrekontua 561.648 eurokoa da, honela banatuta: 149.376 euro, 2009ko aurrekontuetatik; eta 412.272 euro, 2010ekoetatik.
Nafarroako Ortofotografia (1:5.000) eta Nafarroako Mapa Topografikoa (1:5.000) oinarrizko elementuak dira lurraldea ezagutu, kudeatu eta haren plangintza egiteko. Ortofotografiak, zehazki, lurraldea airetik ikustea ahalbidetzen du (airetik egindako argazkien bidez osatzen dute), eta argazkien zehaztasuna eta bereizmena funtsezkoak dira. Kasu honetan, 25 zentimetroko bereizmena hautatu dute Nafarroa osorako. Hala, irudietan argi eta garbi ikusi ahal izanen da ibilgailuen forma, eta errepideetako seinale horizontalak eta lursailen mugak ere erraz bereizi ahal izanen dira.
Ortofotografia gero eta maizago egin behar izaten da, informazioa gero eta bizkorrago zaharkitzen delako; izan ere, lurraldea etengabe ari da aldatzen eta herritarrak gero eta kontzientziatuagoak daude informazio tresnen erabileraren gainean. Zentzu horretan, duela bost urtera arte 50 zentimetroko bereizmeneko estaldura genuen 4 urtean behin, eta aurrerantzean, berriz, 25 zentimetroko bereizmeneko estaldura izanen dugu urtero.
Nafarroako Gobernuak, bestalde, beharrezkotzat jotzen du zenbait urteko kontratuen bidez Ortofotografia (1:5.000) egiteko agintzea, Administrazioarentzat zein enpresa eta herritarrentzat (SITNA moduko zerbitzuen bidez) oinarrizkoa den informazio hori eguneratuta eta eskuragarri egonen dela eta kalitatezkoa izanen dela bermatzeko. Izan ere, SITNA edo IDENA zerbitzuen balio nagusia bertako informazioa kalitatezkoa izatea eta eguneratuta egotea da.
