Castellano | Euskara | Français | English
Ezagutzera eman
Ikusi egun honetako albiste gehiago
Iruñean eginen duten topaketa nazional batean teknologia berriek automobilgintzaren industrian duten lekua aztertuko dute ostirala, 2008.eko azaroak 14
Topaketa CEIN sozietateak eta Fundetec fundazioak antolatu dute, Industria Ministerioak, Nafarroako Gobernuak eta Nafarroako Automobilgintza Klusterrak sustatu dute, eta azaroaren 25ean eta 26an eginen dute
Berrikuntza, Enpresa eta Enplegu Departamentuari atxikita dagoen CEIN (Nafarroako Enpresen eta Berrikuntzaren Europar Zentroa) sozietate publikoak eta Fundetec fundazioak "Automobilgintzaren Sektoreari aplikatutako Informazioaren eta Komunikazioaren Teknologien I. Lantegi Nazionala" antolatu dute. Topaketa azaroaren 25ean eta 26an eginen dute, Iruñean, Baluarte-Nafarroako Biltzar Jauregi eta Auditorioan.
Lantegia Industria, Turismo eta Merkataritza Ministerioak (Avanza Planaren esparruan), Nafarroako Gobernuak eta Nafarroako Automobilgintza Klusterrak sustatu dute, eta automobilgintzaren sektorearen egoera aztertzea du xede, Informazioaren eta Komunikazioaren Teknologien (IKTak) eskuragarritasunari eta erabilerari begira. Era berean, automobilgintza enpresen ekoizpen maila eta lehiakortasuna hobetzeko irtenbide espezifikoak aztertzea ere badu xede. Topaketara entitate publikoak eta pribatuak, elkarteak (sektorialak eta profesionalenak), teknologia hornitzaileak eta automobilgintza enpresetako kudeatzaile ugari bilduko dira.
Lantegian "IKTen egoera automobilgintzaren sektorean" diagnosia aurkeztuko dute; hots, sektoreko enpresei eta profesionalei egindako 500 inkesten bidez landutako diagnosia.
Era berean, automobilgintzaren sektoreko enpresa batzuetan egin dituzten saiakuntza arrakastatsuen berri emanen dute. Hain zuzen ere, enpresetako prozesuetan ezarri dituzten IKT aplikazioak, ezarpen prozesuko zailtasunak, eta aplikazioen erabilerak ekarri dituen onurak azalduko dituzte.
Lantegira bildu nahi dutenek www.tallerticautomocion.com webgunean dagoen inprimakia bete beharko dute, eta sarrera doakoa izanen da. Gorago aipatu dugun diagnosia egiteko inkesta bete nahi duten enpresek webgune berean aurkituko dute galdera sorta, eta baita jardunaldiko programa osoa ere. Antolatzaileek AutoRevista argitalpen espezializatuaren laguntza ere izan dute.
Fundetec (www.fundetec.es) irabazi asmorik gabeko fundazioa da, eta Espainian Informazioaren Gizartea sustatzea da haren xede nagusia. Horretarako, herritarrek, enpresek eta erakundeek IKTak eskuragarri izateko ekimenak egiten ditu, eta hain zuzen ere, fundazioak sustatzen dituen ekintzak hiru lan ildotan banatu daitezke: baztertzeko arriskua duten giza taldeen alfabetatze digitala; IKTen erabileraren sustapena enpresa txiki eta ertainetan (ETEak), mikroenpresetan eta autonomoen artean, lehiakortasuna hobetzeko tresna gisa; eta langileak IKTen arloan trebatzeko sustapena, HCI programen bidez ("Hogar Conectado a Internet" edo "Interneterako konexioa duen etxea").
Nafarroako Enpresen eta Berrikuntzaren Europar Zentroa (www.cein.es) Nafarroako Gobernuaren sozietate publikoa da, eta bertan Foru Komunitateko enpresa pribatu, finantza entitate eta elkarte nagusiek parte hartzen dute. Foru Komunitatearen garapen ekonomikoa sustatzea du xede, eta horretarako, ekintzailetza espiritua bultzatzen du, enpresa berriak sortu eta finkatu daitezen laguntzen du, eta Nafarroako ETEei berrikuntzaren bidez hazten eta lehiakortasuna hobetzen laguntzen die.
