Castellano | Euskara | Français | English
Ikusi egun honetako albiste gehiago
"Aval Navarra" izeneko neurria da, eta Nafarroako Parlamentuak azaroan krisiaren aurka borrokatzeko onartu duen planaren baitan dago
Álvaro Miranda Simavilla bigarren presidenteorde eta Ekonomia eta Ogasun Departamentuko kontseilariak eta Daniel Aznar Munárriz Sonagar sozietateko (Sociedad Navarra de Garantía Recíproca) presidenteak lankidetza hitzarmena izenpetu dute, gaur goizean, enpresa txiki eta ertainetarako bermeak kudeatzeko. Aurrekontua 30 milioi eurokoa da.
"Aval Navarra" izeneko neurria da, eta Nafarroako Parlamentuak ekonomia suspertzeko eta krisiaren aurka borrokatzeko onartu duen planaren baitan dago (azaroan 6ko Foru Legea). Neurria Nafarroako Gobernuak eta Nafarroako Alderdi Sozialistak hitzartu dute.
Bermeei dagokienez, enplegua sortzeko inbertsioei sostengua ematea eta enpresa txiki eta ertainetarako kostu eta epe egokiak dituen finantzaketa bultzatzea dute xede, gaur egun maileguak lortzeko zailtasunak daudela kontuan hartuta. Sonagar sozietateak azterlan teknikoak eginen ditu, kasu bakoitzean bermea ematea komenigarria ote den edo ez ikusteko, eta gainera, enpresei bermeak emanen dizkie, Nafarroako Gobernuaren azpi-bermearekin.
Bermeak eskuratzeko baldintzak
Legean industriaren arloko inbertsioetarako, nekazaritzako elikagaiak eraldatu eta merkaturatzeko, eta enpresa txiki eta ertainetako azpiegitura turistikoak sortu eta modernizatzeko ezarritako laguntzak lortu ditzaketen esku-hartzeetarako bermeak eskatu ahal izanen dira.
Bermeak 60.000 eurotik 600.000 eurora bitartekoak izanen dira, eta gehienezko zenbatekoa proiektu bakoitzerako aurreikusitako inbertsioaren %60koa izanen da. Laguntzak lortzeko gutxieneko inbertsioa 100.000 eurokoa izanen da. Nafarroako Gobernuak emanen duen guztizko zenbatekoa 30 milioi eurokoa izanen da.