Nafarroako Gobernuak eta Tuterako Udalak hitzarmena izenpetu dute, adingabeek bete beharreko neurri judizialen gaineko laguntza programak garatzeko ostirala, 2009.eko urtarrilak 16

Hitzarmenean bi alderdien konpromisoak zehaztu dituzte; hots, arauak hautsi dituzten adingabeen aurkako neurri judizialak bete daitezen zaintzeko konpromisoa

María Isabel García Malo Familia, Gazteria, Kirol eta Gizarte Gaietako Departamentuko kontseilariak eta Luis Casado Oliver Tuterako alkateak lankidetza hitzarmena izenpetu dute gaur goizean, Adingabeen Erantzukizun Penalari buruzko Lege Organikoa ezartzeko laguntza programak garatzeko (komunitatearen aldeko zerbitzuak).

Legedian xedatuta dagoenez, Nafarroako Gobernuari dagokio, Familia, Haurtzaro eta Kontsumoaren Zuzendaritza Nagusiaren bidez, arrisku egoeran dauden adingabeak babestuta egon daitezen zaintzea. Era berean, Foru Gobernuari dagokio arauak hautsi dituzten 14-18 urteko adingabeak berriro heztea eta gizarteratzea xede duten neurri judizialak bete daitezen zaintzea.

Zentzu horretan, García Malo kontseilariak adierazi duenez, gaur izenpetu duten hitzarmenari jarraiki komunitatearen aldeko zerbitzuak garatuko dituzte (zerbitzu publikoetan edo irabazi asmorik gabeko entitateetan egin beharreko lanak, aldez aurretik zehaztutako iraupena eta gizarte intereseko helburuak dituzten lanak).

Neurriaren bidez honako hau ulertarazi nahi diete arauak hautsi dituzten adingabeei: batetik, agindu dieten lana ordain justua dela euren portaera txarra kontuan hartuta; eta bestetik, euren ekintzen ondorioak komunitate osoak jasan behar izan dituela, bidegabeki.

García Malok azpimarratu duenez, komunitatearen aldeko zerbitzuak toki entitateekin batera gauzatzen dituzte; izan ere, toki entitateak jarduera iturriak dira eta neurri judizialak edukiz hornitzea ahalbidetzen dute. Gainera, zerbitzuak tokiko gizarte zerbitzuetako esku-hartzeen osagarri gisa gauzatzen dituzte. Testuinguru horretan izenpetu dute gaur Nafarroako Gobernuaren, Tuterako Udalaren eta dagokion epaitegiaren arteko akordioa, eta segurtasun eta berme iturri izanen diren eta alderdi bakoitzaren konpromisoak ezarri eta mugatuko dituzten alderdiak formalizatzeko balioko du.

Dokumentazioa:: Berri osoa.doc

Jar zaitez gurekin harremanetan | Erabilerraztasuna | Lege abisua | Webaren mapa