Ikusi egun honetako albiste gehiago
Hamar nafar tratamendu antibiralarekin, txerri-gripea izan dezakeen errioxar batekin batera Mexikora bidaiatu ondoren
asteartea, 2009.eko apirilak 28
Hala ere, Kutz kontseilariak baieztatu du Foru Komunitatean ez dela kasu susmagarririk antzeman
Caparrosoko bederatzi pertsonak prebentziozko tratamendua jaso dute.
María Kutz Peironcely Osasun kontseilariak gaur goizean txerri gripearekin lotutako nobedadeak jakinarazi ditu. Orain arte Nafarroan kasu susmagarririk ez dagoela azaldu du.
Hala ere, kontseilariak esan duenez, Errioxan gaixotasuna izan dezakeen herritar bat Mexikon hamar nafarrekin batera egon da (bederatzi Caparrosokoak dira eta beste bat Murillo el Frutokoa). Herritar horiei tratamendu profilaktiko antibirala eman zaie prebentzio-neurri moduan.
Horrez gain, Osasun kontseilariak esan du gaur laugarren alerta epidemiologikoa jakinarazi dela (ez da kasu susmagarria) Lizarrako "García Orcoyen" ospitalean. Pertsona etxera bidali dute eta laborategiko probak egin dizkiote. Proba horien emaitzak gaur ezagutuko dira. Gogoan izan behar da asteburuan eta atzo, astelehena, deitutako aurreko hiru alertek emaitza negatiboak izan zituztela laborategian.
Kontseilariak berriro ere “lasaitasun” deia egin die herritarrei eta osasun-sistema guztiz erne dagoela esan du, are gehiago OMEk alertaren 4. maila ezarri duenean (transmisioa pertsona batetik bestera). Bestalde, kontseilariak modu positiboan baloratu du autonomia-erkidego guztien eta Ministerioaren artean dagoen koordinazioa.
- Dokumentazioa:
- Audioa
- Bideoa