Sanz Lehendakariak azpimarratu duenez, Nafarroako Gobernuak Nafarroako edozein ingurutan ekimen pribatuaren bultzada eta ahalegina babestu eta aktibatzen ditu. Era berean, Lehendakariak adierazi du energiak gure gizartean garrantzi handia duela, "energiarik gabe ezinezkoa baita aurrera egitea." Horrez gain, Lehendakariaren esanetan, 13,4 milioi euroko inbertsio honek orainaldiko energia-hornikuntza eta inguruaren etorkizuneko garapena bermatuko ditu.

Bidasoako azpiestazioa trinkoa da (espazioa %60 murriztu da), eta horrek esan nahi du eraikin baten barrualdean ezarri direla 132 kV eta 30 kV-ko sistema elektrikoak eta kontrol, babes, komunikazio, etab. ekipo tradizionalak. Modu horretan, ingurumen inpaktua eta mantentze lanak txikiagoak dira.

Lehenengo fasean, azpiestazioko transformadoreak 35 MVA-ko potentzia trifasikoa eta 132/39 kV-ko transformazio-erlazioa izango ditu, kargako tentsioa erregulatuko du eta 30 kV-ko gelaxka sistema izango du.

Linea osoak mendi-ingurua zeharkatzen du Bidasoa ibaiaren haranean (Nafarroako Pirinio aurrea). Orografia zailaren eraginez, 10 kilometro inguruko sarrerak ireki behar izan dira antzinako basoko pista berreskuratuen eta malda handiak dituzten mendiko pista berrien artean. Azken 15 urteetan Nafarroan eraiki den tentsio honetako linearik luzeena da, Mikel Barriocanal proiektuaren ingeniariak adierazi duen moduan.