Plan Bereziaren bidez, toki azpiegiturei lotuta dauden inbertsio beharrizanei erantzun nahi zaie, betiere, horiek ez baitaude Plan Arrunteko plan gidarietan eta toki programazioan bilduta. Gainera, inbertsio horiek egiten ez badira oinarrizko zerbitzuak ematea zalantzan jartzen da, lurralde-desorekak eragiten dira, eta horien aurrean tratamendu berezia behar izaten da. Horrez gain, zuzkidura ekonomiko horren bidez zeharbideak urbanizatzeko jardunak egin ahal izango dira.

Lehen urtean lanak dituzten toki entitateak beharrezko dokumentazioa prestatzen has daitezke, eta gainerakoek 2011ra arteko epea izango dute.

Plan honetara bildutako 51 proiektu berriak, 9,5 milioi eurotik gorako inbertsio osoa eskatuko dutenak, hurrengo hauei lotuta egingo dira: zoladurak; uraren hornikuntza eta saneamendu sareak; argiteria publikoa; udal eraikinak; toki errepideak; hilerriak eta zeharbideak. Modu horretan, adibidez, aipatzekoak dira Sarrigurengo udaletxea eta Beriainen hornikuntza eta saneamendu sareak berritzea.

Era berean, aurreikusitako kopurua baino %10 gehiago jasoko duten 68 proiektuak hurrengo hauek dira: uraren goi hornidurarako lanak; argiteria publikoa; zoladura eta udal eraikinak. Kasu horietan, proiektuak hasieran 2009-2012 Toki Inbertsioen Planera bildu ziren, baina kasuan kasuko udal entitateen egoera eta horietako azpiegituren egoera dela-eta, batez bestekoa baino hondatuago baitaude, %10 gehiago egokitzen zitzaien. Horrela, normalean proiektu horiek Toki Administrazio Departamentuaren %70 edo %80ko ekarpena izaten badute, Plan Berezi honekin %80 edo %90 izango dute. %10 gehiago lortzen duten toki entitateak herri txikiak dira. Lan horien artean, besteak beste, Ultzama-Odieta eta Anueko hornikuntza, hirugarren fasean, eta Urrotz, Untzitibar, Itzagaondoa eta Lizoainibargo bosgarren fasea aipatu behar dira.

Gaur onetsitako Plan Bereziaren 9 milioi euroak Nafarroako Gobernuak indarrean dagoen 2009-2012 Toki Inbertsioen Plan Arruntera bideratutako 224,9 milioiei gehitu behar zaizkie. Oro har, 233 milioi euro horiek eta toki entitateei dagozkien ekarpenek Nafarroa osoan 330 milioi eurotik gorako inbertsioa eragingo dute aldi honetan.