Nafarroako Gobernuko Lehendakariak, Miguel Sanz Sesmak, harrera egin dio Javi Martinez futbolari nafarrari Nafarroako Jauregiko tronu aretoan, gaur eguerdian. Izan ere, futbolariak munduko kopa irabazi du Espainiako selekzioarekin, Hegoafrikako Munduko Txapelketan.

Harreran, Sanz Lehendakariak Nafarroaren izenean eskerrak eman dizkio kopa irabazteagatik; "izan ere, Nafarroa hunkituta dago Espainiako selekzioaren arrakastarekin, eta zuk Nafarroako arraza, teknika eta sormena eman dituzu, eta baita gure jendearen, gure lurreko gizon-emakumeen bereizgarri den leialtasuna ere".

Sanzek iragarri du jokalari gazteak (21 urte dauzka) etorkizun oparoa izango duela. "Txapelketa gehiago jokatuko ditu, baita partida gehiago ere selekzioarekin, denetik baitauka", esan du. "Dauzka, gainera, futbolean jokatzeko ezinbestekoak diren baldintza tekniko eta fisikoak, sentimendua eta arraza, urguilua baita ikustea atzetik nola ateratzen den, etsaiari aurren ola egiten dion eta kontrako atean eraso nola egiten duen".

Javi Martinezek, bere aldetik, eskerrak eman dizkie nafar guztiei, eskaini dioten babesagatik. "Hegoafrikatik Gazteluko plaza ikusi dugu, bete-bete eginda, eta horrek harro sentiarazten gintuen eta motibatu egiten gintuen". "Handik egin ahal izan dudan omenaldi txikia zapia jarri eta haiekin guztiekin gogoratzea izan da", esan du.

Halaber, Lehendakariak esan duenaren ildoan, arrakasta gehiago lortu nahi dituela esan du. "Oraindik gaztea naiz eta espero dut hemendik bi edo lau urtera beste kopa batekin bueltatzea" adierazi du.