Miguel Sanz Sesma Nafarroako Gobernuko Lehendakariak Giles Paxman Erresuma Batuko enbaxadorea Espainian eta Derek Doyle britainiar kontsula Bilbon hartu ditu gaur bulego ofizialean. Paxmanek Nafarroako garapen ekonomikoaren giltzarriak ezagutzeko interesa agertu du. Diplomazialariak Foru Komunitateko energia berriztagarrien bilakaerari eta puntako beste sektore batzuen bilakaerari, hala nola biomedikuntzari, eskaini die arretarik handiena.

Sanz Lehendakariak enbaxadoreari azaldu dio autogobernuak Nafarroan garrantzi handia duela, Espainiako errealitatean sartutako erkidego historikoaren ikur moduan, eta Foru Komunitatean erakunde, unibertsitate eta entitate publiko eta pribatuekin lankidetzan eskainitako zerbitzuen kalitatea eta efizientzia azpimarratu ditu. Horri esker, sortzen ari diren sektoreak antzeman eta proiektu berritzaileak bultzatu daitezke.

Nafarroako Lehendakariak eta britainiar enbaxadoreak Britainiar Enbaxadako eta Nafarroako entitateetako (hala nola CENER eta Cenifer) arduradunen artean zenbait bisita eta lan-bilera zehaztea adostu dute. Horrez gain, enbaxadoreak Lehendakariari iragarri dio Nafarroara berriro ere irailean etortzeko asmoa duela Foru Komunitateko garapen ekonomiko, politiko eta soziala zehatzago ezagutzeko.