Nafarroako Gobernuko Lehendakaria, Miguel Sanz Sesma, Uritzen, Azparrenen eta Orotz-Betelun izan da gaur goizean, dagoeneko abian dauden edo laster irekiko dituzte turismo sektoreko enpresa proiektuak gertutik gertura ikusteko.

Gero Azparrenera joan da, mendi aterpea eta udaletxea ikustera; aterpea Nafarroako Gobernuaren inbertsioari esker egin dute eta udaletxea Canal de Navarra fundazioaren laguntzarekin birgaitu dute.

Lehendakariarekin batera joan dira bigarren lehendakariorde eta Ekonomia eta Ogasun kontseilaria, Alvaro Miranda, Itoiz-Canal de Navarra fundazioko presidente gisa; Kultura eta Turismo kontseilaria, Juan Ramon Corpas; eta Berrikuntza, Enpresa eta Enplegu kontseilaria, Jose María Roig Aldasoro (hura Orotz-Betelun izan da).

Bisitariak Uritzeko Torre de Uriz landa hoteleko instalazioak ikustera joan dira.

Uritzeko Erdi Aroko dorrea eta hari atxikitako etxea Nafarroako Gobernuarenak dira.

Hotela Erdi Aroko defentsa dorre batean dago; eraikin bat dauka atxikita eta biak pasabide batekin lotuko dituzte.

Barruko antolaketari dagokionez, etxabean daude atondoa, harrera gunea, egonlekua, jantokia, sukaldea, sukalondoa, langileentzako zona, higiene zerbitzu orokorrak, fardelak uzteko gela eta goiko solairura igotzeko eskailera.

Lehen solairuan daude hiru logela, bainugeladunak (horietako bat establezimenduko arduradunarentzat izango da), sukalondoa eta egongela; egongelatik irteten da dorrea eta atxikitako eraikina lotzen dituen pasabidea.

Kultura eta Turismo Saila arduratu da eraikina moldatzeaz. Obrak 2006an hasi zituzten eta

2007an dorrea birgaitzez amaitu zuten (harrizko leihoak eta egurrezko egitura berritu zituzten eta teilatua berreraiki zuten), baita etxea birgaitzez ere, landa hotela jartzeko.

Gero, 2008an, egokitze eta akabera lanak egin eta instalazioak jarri zituzten (aurrekontua: 848.041,08 euro), baita ingurua hiritartu ere (gutxi gorabeherako gastua: 288.993,35 euro).

Azkenik, 2009an, fundazioak bi eraikinetan altzariak jarri zituen eta barrua hornitu zuen, gestioaz arduratuko diren lagunekin koordinatuta (izan ere, gestioa esleitu dute).

Bisitan parte hartu dute Artzibarreko alkateak, Jose Ignacio Videgainek, eta Uritzeko udalbatzako buruak, Pedro Ibarrak.