Ekonomia eta Gizarte Kontseilua (EGK) Nafarroako Jauregian bildu da gaur goizean, besteak beste, Foru Komunitatearen egoera ekonomikoa aztertzeko eta Nafarroako 2011ko Aurrekontu Orokorrak egiteko lehen hurbilketa abiatzeko.

Álvaro Miranda Simavilla bigarren presidenteordea eta Ekonomia eta Ogasun kontseilaria buru dela, bilerako gaien zerrendan Nafarroako egoera ekonomikoari buruzko txostena jorratu eta MODERNA Planari buruzko txostena aztertu da.

Era berean, Kontseiluak Nafarroako 2011ko Aurrekontu Orokorrak egiteko lehen hurbilketa egin du. Ildo horretatik, Nafarroako Enpresaburuen Elkarteak, Nafarroako Lan Enpresen Elkarteak, Nafarroako Nekazari eta Abeltzainen Batasunak, Udalerri eta Kontzejuen Federazioak eta Kontseilua osatzen duten beste erakunde batzuek lehenengo ekarpenak kontseilariari eman dizkiote. Ekarpen horietan etorkizuneko aurrekontuan aintzat hartu behar diren inbertsioei buruz gogoeta egiten da.

Kontseilariak ekarpen guztiak eskertu ditu eta 2011rako aurrekontuen proposamenean aztertuko dituztela esan du. Hala ere, Foru Komunitateak aurrekontuetan gastu publikoa murrizteko ahalegina jaso beharko duela gogorarazi du, horrek autonomia-erkidego guztietan eta Estatuko Administrazio Orokorrean eragina baitu, Europak finkatutako bideari jarraituz.

EGK organo aholku-emailea da. Ekonomia eta Ogasun Departamentuaren menpe dago eta 28 kide ditu, burua, Departamentu honetako kontseilaria, barne hartuta. Organo honen eginkizun nagusia gai sozioekonomikoak arautzen dituzten foru-legeen aurreproiektuei buruzko txostenak eta irizpenak ematea da, batez ere Nafarroako Aurrekontu Orokorren aurreproiektuari buruzkoak eta ekonomia, zerga, lan, nekazaritza, enplegu eta gizarte-ongizate esparruetako gaiei buruzkoak, Nafarroako Gobernuak edo Parlamentuak eskatuta edo norbere ekimenez.

EGK hurrengo hauek osatzen dute: Foru Komunitateko Administrazioko ordezkariak; Nafarroako Udal eta Kontzejuen Federazioko ordezkariak; UGT, Comisiones Obreras, ELA eta LAB sindikatuetako ordezkariak; Nafarroako Enpresaburuen Konfederazioko ordezkariak; Nafarroako Nekazaritza Kooperatiben Batasuneko ordezkariak; Irache Kontsumitzaileen Elkarteko ordezkariak; Nafarroako Nekazari eta Abeltzainen Batasuneko ordezkariak; EHNE Nafarroa nekazaritza-sindikatukoak; Nafarroako Lan Enpresen Elkarteko ordezkariak; Gurelur elkarte ekologistakoak; Nafarroako Unibertsitate Publikokoak; eta "Santa María La Real" Nafarroako Etxekoandreen, Kontsumitzaileen eta Erabiltzaileen Elkarteko ordezkariak.