Miguel Sanz Sesma Nafarroako Gobernuko Lehendakaria Nafarroako Gobernuaren egoitzako Tronu Aretoan Nafarroako Nazioarteko XIII. Ikastaroa ixteko ekitaldiaren buru izan da. Ikastaroa uztailaren 18tik 30era egin da. Ikastaro horretan Argentina eta Txileko nafar etxeetako 20 ikaslek parte hartu dute, eta horiei Foru Komunitatearen gaineko ezagutza sakonak transmititu dizkiete, hitzaldien, mahai-inguruen, bisiten, ibilaldien eta beste jarduera batzuen bidez.

Ekitaldi honetan, ikasle horiei ikastaroari dagozkion diplomak eta bekak eman dizkiete. Leku hauetako nafar etxeetako ikasleak izan dira: Bolívar (2), Buenos Aires (4), Mar del Plata (1), Mendoza (6) eta Rosario (5) Argentinan; eta Santiagoko nafar etxeko ikasleak (2), Txilen. Ekitaldian, etxe bakoitzeko ordezkariek Nafarroako Gobernuari Foru Komunitatea "in situ" ezagutzeko aukera ematea eskertu diote.

Lehendakariak ikasleei adierazi die ikastaroan eskuratutako ezagutzak haien herrialdeetako ikaskuntzan, lanbidean eta bizitza pertsonalean zabaldu behar dituztela. "Horrez gain, eskuratutako ezagutzaren bidez lurralde honekiko konpromisoa, zuon arbasoena dena, indartzea lortu badugu, eta herri konprometitu, ireki, unibertsal, berritzaile eta sortzailearen irudia proiektatu badugu, gure asmoak beteta egongo dira", gehitu du Miguel Sanzek.

Ekitaldian Alberto Catalán Higueras Gobernuaren eledunak eta Erakundeekiko Harremanetarako kontseilariak, Lola Eguren Apesteguía Erakundeekiko Harremanetarako zuzendariak, Crisanto Ayanz Monreal Buenos Airesgo nafar etxeko lehendakariak eta Elsa Nora Poza Diéguez Rosarioko etxeko zuzendaritza batzordeko ordezkari batek parte hartu dute.

Edizio honetan, ikastaroa "Done Jakue Bidearen egituraketa" izenburupean antolatu da, eta gai nagusia jakobear bidea izan da. Erromesaldia ikuspuntu askotatik jorratu da (historia, arkitektura eta arte ondarea, turismoa, etab.). Horrez gain, bidea oinarri hartuta, garapen esparru berriak ezagutarazi dira, hala nola ingurumena, energia berriztagarriak eta komunikazioak, baita emigrazio historikoarekin eta gaur egungo lankidetzarekin lotutako alderdiak ere.

Gainera, ibilaldi desberdinen bidez, merindadeko bost hiriburuak bisitatu dituzte –Lizarra, Erriberri, Iruñea, Zangoza eta Tutera-, baita Foru Komunitateko beste leku aipagarri batzuk ere, hala nola Orreaga, Aralar, Errege Bardeen Natura Parkea, Los Arcosgo abiadura zirkuitua eta Baztan.

Ikastaroaren aurrekontua 69.579 eurokoa da, 2008ko edizioan baino %28,6 gutxiago. Iazko aurrekontu osoa 97.425 eurokoa izan zen. Edizio honetan, ikastaroaren parte-hartzaileen kopuruak eta iraupenak ere behera egin dute, gaur egungo egoera ekonomikoa kontuan hartuta.