Uztailaren 23tik 30era ziertzoa izan da nagusi. Egun gehienak eguzkitsuak eta tenperaturak aldi honi dagozkionak izan dira, eta euri gutxi egin du, iparraldean eta mugako inguruetan izan ezik, leku horietan zenbait egunetan egon baitira hodeiak eta euria. Baratzeko laboreetarako gorabeherarik gabeko astea izan da, eta eguzkiari eta beroari esker laboreak garatu eta heldu egin dira.

Ildo horretatik, lehorreko zerealen eta lekadunen uzta amaitzen ari da, eta eguraldiak laguntzen badu, lanak datorren astean amaituko dira. Era berean, zereala ekoizten duten eskualdeetan izandako azken prezipitazioei esker, hurrengo kanpainarako ereiteko lurrak prestatzen hasi dira.

Horrez gain, galtzuarekin fardoak egiteko lanetan buru-belarri ari dira, gerora biltegietan pilatzeko edo kamioietan kargatzeko, biomasa egite aldera edo animaliak elikatzeko. Kanpaina hau etekin eta ekoizpen oso onak ematen ari da.

Udako lehorreko laboreei dagokienez, aipatzekoa da orain arte ipar-mendebaldeko eta Pirinioetako eskualdeetako abeltzaintza-inguruetan bazka-artoak duen potentzial ona. Bazka-artoa luzetarako hazkunde-prozesuan murgilduta dago, eta euri hauekin neurri begetatibo garrantzitsua lortzea eta loretzen hastea espero da. Inguru hauetan labore horri eskainitako azalera egonkorra da.