Nafarroako Gobernuak erabakia hartu du gaurko saioan. Horren bitartez, Landa Garapeneko eta Ingurumeneko Departamentuko kontseilariari baimena ematen zaio 2,2 milioi euroko urte anitzeko gastuak egiteko, 2012. ekitaldian zordunduta, Landa Garapeneko 2007-2013 Programaren barruan. Hori guztia, nekazaritzako produktuen balio erantsia handitzeko, nekazaritzako elikagaiak transformatzeko eta komertzializatzeko, akuikulturaren sektorean inbertitzeko eta arrantzarako produktuak transformatzeko eta komertzializatzeko laguntzen deialdiaren 21 eskaera bideratzeko.

Laguntza hauen xedea da nekazaritza eta basogintzako produktuen lehiakortasuna hobetzea, balio erantsi handiagoa duten kalitate oneko produktuak sustatuz;, transformazioan eta komertzializazioan eraginkortasuna hobetuz, modernizatuz eta teknologia berriak, prozesu, sistema eta produktu berritzaileak erabiliz. Hartarako, ekoizle eta industriaren arteko lankidetzan laguntzeko estrategia ezarriko dute, lan-segurtasuna hobetu, ingurumena babestu eta animalien higienea eta ongizatea zainduko dute.