Nafarroako Gobernuak, gehienez, 1,7 milioi euro bideratuko ditu Sarrigurengo Haur eta Lehen Hezkuntzako ikastetxe publikoa (Eguesen) handitzeko lanetan. Jarduera hori 2012 Nafarroako Planaren barruan jasotzen da, eta horri esker, beste bi linea sortuko dira maila bakoitzean, gaur egun dituen hiruez gain. Hartarako, bi eraikin eraikiko dituzte gaur egungo Haur eta Lehen Hezkuntzako eraikinei atxikita.

Gaurko saioan Foru Gobernuak baimena eman dio Ikuskapen eta Zerbitzuen zuzendari nagusiari proiektuaren idazketa eta lanen zuzendaritza eta gauzatzea kontrata ditzan. Sistema horri "giltza eskura" esaten zaio, eta bi espediente batzeko aukera ematen du. Horrela, eraikitzeko epeak laburtzen dira. Lanak 2011ko irailerako bukatzea aurreikusita dago.

Proiektuan, gutxienez, espazio hauek jaso beharko dira: Haur Hezkuntzako sei gela (bakoitza 55 m²-koa) eta Lehen Hezkuntzako hamabi gela (50 m²), informatika-gela bat (50 m²) eta ikasleak banatzeko bi gela (25 m²), zortzi komun (lau Lehen Hezkuntzarako, hiru Haur Hezkuntzarako eta bat ikasleentzat) eta garbiketa-gela bat.

Gaur hartutako erabakian jasotzen den moduan, gehienez, 1,7 milioi euro (BEZa barne) bideratuko dira jarduera honetarako. Haietatik, 100.000 euro 2010eko aurrekontuan zordunduko dira eta 1.625.000 datorren urteko aurrekontuan. Horrez gain, beste 122.401 euro inbertituko dituzte tresnak erosteko (irakasmateriala, ikus-entzunezkoa, informatikoa eta altzariak).