Juan Ramón Corpas Mauleón, Kultura eta Turismo kontseilaria, Iruñeko O-ko Ama Birjinaren ermitan hasi diren lanak ikustera joan da gaur. Lan horietan, Ama Birjinaren taula berrituko dute, eta erretaulari ukituren bat ere emango diote, polikromiak eta erortzeko arriskua duten elementuak garbitu eta finkatzeko. Ekintzak 8.643 euroko aurrekontua du, eta bi asteko epea aurreikusi dute burutzeko.

Ama Birjinaren irudia estilo gotikoa duen tailu polikromatua da, XIV. mendearen bigarren laurdenekoa, hala ere, gaur egun duen polikromia XVIII. mendekoa baino geroagokoa da. Aurreikusitako ekintzaren asmoa irudia konpontzea da, zenbait pitzadura dituelako eta kolorea galdu zaiolako. Mantu urdinean, hain zuzen, %20ko galera du.

Egingo dituzten lanak hauek izango dira: tailua gainetik garbitu; irudiaren inguruan argitzeko dauden kableak kendu; polikromiako finkatu eta ezarri, euskarriaren finkatze kimikoa; koroak desmuntatu eta garbitu; arrailak itxi eta hutsuneen berreraikuntza bolumetrikoa egin, berrintegrazio kromatikoa eta azken babesa eman.

Lanak Iruñeko Taller de Artes enpresak egingo ditu, Kultura eta Turismo Departamentuaren zuzendaritza teknikoarekin. O-ko plaza berrurbanizatzeko lanak bukatutakoan, bigarren fase bati ekingo diote, erretaula osoa garbitzeko eta azken babesa emateko.