Nafarroako Gobernuak eta Lehendakaritza Ministerioak hitzarmena sinatuko dute administrazio elektronikoaren garapena sendotzeko. Ildo horretatik, administrazioen arteko koordinazioa erraztu eta erabiltzaileen erosotasunari mesede egiten dieten zerbitzuak bateratuko dira. Akordio horretara Foru Komunitateko udalak bildu ahal izango dira.

Gaurko saioan, Gobernuak hitzarmenaren testua onetsi du. Testu horren bidez, bi alderdiek emandako zerbitzuak modu bateratuan erabiltzea eta Miniterioak bultzatutako bost aplikazioren baldintza teknikoak eta sarbideko baldintzak arautu dira. Aplikazio horietako bat Red Sara da, administrazioen arteko sareko komunikazioak errazten dituena, eta beste bat autonomia-erkidegoekiko edo atxikitako toki entitateekiko datuen bitartekaritza zerbitzua.

Horri lotuta, Ministerioak nortasunari (NAN), egoitzari eta Gizarte Segurantzari buruzko informazioa Estatuko Administrazio Orokorreko organismoen eta administrazio autonomiko eta toki administrazioen artean trukatzea bideratzen du. Bitartekaritza plataformaren bidez, administrazioek herritarren datuak kontsultatu ahal izango dituzte, bai dokumentuak eramateko betebeharra ezabatzeko –Zerbitzu Publikoetarako Sarbide Legearen arabera, herritarrak eskubidea du administrazio publikoen esku dauden datuak eta dokumentuak ez emateko- bai legezko egiaztapenak edo herritarrak baimendutakoak egiteko.

Bestalde, hitzarmenaren arabera, administrazio elektronikkoaren beste zerbitzu batzuk erabil daitezke, hala nola baliozkotze plataforma eta @sinadura sinadura elektronikoa, jakinarazpen telematiko seguruen zerbitzua edo bizileku aldaketaren berri Estatuko Administrazio Orokorrari ematea.

Nafarroako Gobernuak eta Lehendakaritza Ministerioak sinatuko duten hitzarmenaren azken xedea herritarrei on line zerbitzuak ematea, zerbitzuen, izapideen eta prozeduren elkarroperabilitateari mesede egitea eta administrazio elektronikoaren proiektuak koordinatzea da.