María Kutz Peironcely Osasun kontseilariak eta Marisol Aranguren Balerdi Osasun Publikoaren Institutuko zuzendariak Hogar Zoe zentroa bisitatu dute gaur goizean. Zentroa San Bizente Paulekoaren Karitateko Alabek zuzentzen dute eta Nafarroako Gobernuak diruz laguntzen du. Zentro horretan zailtasunak dituzten pertsona seropositiboak eta hiesa duten pertsonak artatzen dituzte, azken horiek bitarteko ekonomikorik eta gizartearen edo familiaren babesik ez dutenean.

Etxea 1994ko abenduaren 28an ireki zuten San Bizente Paulekoaren hiru Alabek. Gaur egun zentroan 5 Alaba daude, baita zerbitzuen enpresa ere. Nafarroan hiesa duten gaixoentzat dagoen zentro bakarra da. Zentroa ireki zutenetik 128 pertsona igaro dira bertatik eta 2009an 23 artatu zituzten. Okupazioa %100 izan da zentroaren ibilbide ia osoan. Gaur egun, egoiliarrek 40 eta 60 urte bitartean dituzte, eta zentroan dauden hamar pertsonatik lauk gurpil-aulkia behar dute.

Zentroan bi sexuetako hamaika pertsona artatu daitezke. Lau plaza desgaitasun fisiko handia duten pertsonentzat dira eta erizaintza gela batean egoiliarrak artatzen dira okerrera egiten dutenean edo larri daudenean, eta larrialdiak ere artatzen dira. Zentroak jantokia, egongela, jokoen gela, medikuaren bulegoa, sukaldea eta zerbitzu orokorretarako gelak ditu, baita jarduerak egiteko tailer okupazionala ere. Etxeak baratzea eta lorategia ditu inguruan, eta egoiliarrek horiek zaintzen parte hartzen dute.

Finantzaketa nagusia Osasun Departamentutik eta Gizarte Gaietako Departamentutik iristen da, eta egoiliarrek eta San Bizente Paulekoaren Karitateko Alabek ere ekarpenak egiten dituzte. Aurrekontu osotik, Osasun Departamentuak 122.000 euro eman ditu 2010. urterako.

Gizarte zerbitzu publikoek, Gizarte Ongizateak zein Osasun Departamentuak, artatutako pertsonen beharrizanak identifikatzen dituzte, bai ohiko jarraipena egiteko bai ospitalera eraman behar direnean, eta ondoren balizko erabiltzaile bakoitzarekin Hogar Zoe zentroan sartzeko eskaera egitea baloratzen da. Hala denean, Osasun Publikoaren Institutuko Hies Programarekin harremanetan jartzen da. Eskaerak zentroko zuzendariarekin batera baloratzen dira, eskatzailearekin elkarrizketa egiten da, eta lekua dagoenean, eskatzailea zentroan sartzen da.

Hogar Zoe zentroaren helburu nagusiak hauek dira: egoiliarren bizi-kalitatea hobetzea, osasuna sustatzea prebentzioaren eta zainketen bidez, segurtasuna eta autoestimua sustatzea, familiarekin harremanak berreskuratzea, zauriak sendatzea eta hurbilketa erraztea, informazioa eta prestakuntza ematea pertsonari artapen osoa emanez eta proiektu pertsonalizatua eta modu indibidualean ebaluatua egitea gizarteratzea eta egokitzapen psikologikoa egiten ahalegintzeko.

Osasun Artapenean osasuna sustatzen eta berrezten ahalegintzen da, norbere burua zaintzeko, gaixotasunak prebenitzeko eta bizitzako oinarrizko jarduerak hobeto egiteko, medikuntza beharrizan guztiak asetzeko, medikuarengana joateko eta beharrezko botikak edukitzeko eta tratamendua behar den moduan betetzen dela bermatzeko.