Kultura eta Turismo Departamentuak 38.104 eskaera -6.774 euskaraz- jaso ditu

Nafarroako hezkuntza esparruko musika entzunaldien programa hau Nafarroako Gobernuak antolatu eta finantzatzen du. Nafarroako Gobernua Nafarroako Orkestra Sinfonikoarekin, kontserbatorioekin, aholkulariekin, gida didaktikoen arduradunekin, narratzaileekin eta abarrekin lankidetzan aritzen da.

Zikloen arabera, Haur Hezkuntzan 9.826 eskaera jaso dira (2.100 euskaraz). Hala ere, 8.680 plaza banatu ahal izan dira, 1.680 euskaraz. Lehen Hezkuntzan 21.034 eskaera jaso dira guztira, 3.862 euskaraz, eta 15.600 plaza banatu dira, 3.100 euskaraz. Bigarren Hezkuntzan, 7.244 eskaera jaso dira guztira, 812 euskaraz.

Programaren bidez, ikasleek gelan jasotzen duten musika prestakuntza haientzat berariaz antolatutako kontzertuetan modu aktiboan parte hartuz osatzen da. Programa hau aitzindaria da Espainian, eta horren bidez, haurrak eta nerabeak musika klasikora hurbiltzen dira, musika-esperientzia hauetan parte hartuz. Kasu gehienetan, kontzertu hauek ikasleentzat bizitzako lehenengoak izaten dira. Horien bidez, ikasleengan kultura ohiturak sortu eta ikasleak musika onaz gozatzeko gaitasunean hezi nahi dira.

Programaren barruan, ikasleentzako lehen entzunaldiak 1993an antolatu ziren. Ordutik, Nafarroa osoan ikasleen kopuruak gora egin du etengabe urtez urte. Urte hauetan, gainera, laguntzaile eta espezialista berriak eta errepertorio konplexuagoak gehitu dira.