Nafarroako Gobernuak, gaurko ohiko bileraren ostean, Alberto Catalán kontseilari-eledunaren bidez adierazi du irailaren 5ean, igande arratsaldean, ETA talde terroristak argitaratutako komunikatua "ez dela Espainiako gizarteak, oro har, eta Nafarroakoak, zehazki, espero dutena". Ildo horretatik, ETA taldeari armak uzteko eta terrorismoari behin betiko uko egiteko eskatu dio.

"Gizartea nekatuta dago egintza terroristez eta terroristek eta horien ingurukoek egindako presioaz eta derrigortzeez", esan du Alberto Catalánek. Horrez gain, ETA taldeari eta horren inguruari hurrengoa esan die: "estrategia hauekin hauteskundeetan aurkeztu ahal izango direla uste badute, oker daude".

Nafarroako Gobernuak azpimarratu duenez, ETA behin betiko desagerrarazteko oso garrantzitsuak dira alderdi demokratikoek terrorismoaren aurrean duten batasuna mantentzea, Estatuko Segurtasun Indar eta Kidegoen lana eta ahalegina eta jardun judizialak.

Modu eskematikoagoan, Erakundeekiko Harremanetarako kontseilariak eta Gobernuaren eledunak hamar puntutan laburtu du Nafarroako Gobernuak talde terroristaren azken komunikatuaren inguruan duen jarrera:

- Ez terroristen tregoei, "su-etenei" eta geldialdi teknikoei.

- Ez terroristekin negoziatzeari.

- Ez ETA-Batasuna erakundeetan egoteari.

- Ez terroristen indarkeria kondenatzen ez dutenentzat eta terroristak babesten dituztenentzat hauteskundeetako ateak zabaltzeari.

- Ez Nafarroari buruzko edozein asmori.

- Bai terroristek inongo baldintzarik jarri gabe armak uzteari.

- Bai emaitza judizial onak eman dituen eta ematen dituen jarduera polizial eta judizialari.

- Bai terrorismoaren biktimen duintasun, justizia eta oroimenari.

- Bai Estatuko Segurtasun Indar eta Kidegoak terrorismoaren aurkako borrokan babesteari.

- Bai batasun demokratikoari.