Nafarroako Gobernuak Investigacion, Desarrollo e Innovacion Medioambiental fundazioari 380.000 euroko diru-laguntza eman dio. Horretarako, Berrikuntza, Enpresa eta Enplegu kontseilari Jose Maria Roig Aldasorok, Lizarrako alkate Begoña Ganuza Bernaolak, eta FIDIMAko eta Lizarrerriko Enpresaburuen Elkarteko buru Angel Ustarroz Larribak lankidetza hitzarmen bat sinatu dute.

Diru-laguntza izango da FIDIMAren laborategia sortzeko eta egokitzeko gastuak ordaintzeko. Laborategia Miguel de Eguia parke teknologikoko enpresa mintegian jarriko dute, Lizarrako Udalak sustatuta. Udalak errentamendu kontratua sinatuko du FIDIMArekin edo, bestela, mintegia gestionatzen duen erakundearekin, eta laborategia jartzeko 300 metro koadro edukiko dituzte.

Nafarroako Gobernuaren iritziz, funtsezko tresna da jakintza teknologikoan oinarritutako ekonomia edukitzeko eta enpresa sarera lotutako egiturak sortzeko; era horretan enpresen sektorean teknologia sustatu eta transferitu daitekeelako eta enpresa berriak sortzea bultzatu.

FIDIMA ikerketa eta garapen zentro pribatu bat da, honako asmo hauek mamitzeko sortua: hutsune eta hobetzeko aukera gehien dauden ingurumen sektoreetan ikerketa aplikatuak egitea, enpresen premiei eta arauen eskakizunei aurre hartzea eta ingurumen arloan konponbide berritzaileak lortzea.

Behin diru-laguntzaren xedea beteta, onuradunak egindako gastuak justifikatu beharko ditu, 2010eko abenduaren 31 baino lehen; horretarako aurkeztu beharko ditu justifikazio txostena eta egindako gastuen fakturak edo ziurtagiriak.

Justifikazio dokumentuak aztertu ondoren, Berrikuntza eta Informazioaren Gizarte Zerbitzuak ordainketa egiteko proposamena bidaliko dio Enpresa arloko zuzendari nagusiari; proposamenarekin batera aurkeztuko dute onuradunak diru-laguntza kobratzeko eskubidea ematen duten baldintzak bete dituenaren egiaztapen txostena