Nafarroako Gobernuak hartutako akordioa dela bide, Familia, Gazteria, Kirol eta Gizarte Gaietako kontseilariari seme-alaba jaioberrien zainketan erantzukidetasuna sustatzera bideratutako zuzeneko laguntzak izapidetzeko baimena eman zaio, ebaluazio indibidualizatuaren araubidea erabiliz.

Zehatz esanda, Departamentu horrek datozen asteetan deialdi bat izapidetuko du bigarren seme-alaba eta hurrengoak zaintzeko eszedentzia eskatzen duten gizonezkoentzat hilean 600 eurora arteko laguntzak emateko, seme-alaba horiek 12 urte betetzen dituzten arte edo 2010eko aurrekontu-ekitaldia amaitzen den arte. Laguntza hori jasotzeko eskubidea izateko, beharrezkoa da gurasoek lan egitea eta eskatzaileak lanaldi osoko kontratua izatea (lanaldi murriztua dutenen kasuan, laguntza aurreko sei hilabeteetan kotizatutako lanaldiaren proportzionala izango da, edo aldizkako langile finkoen kasuan, aurreko urtean kotizatutako 180 egunak).

Gaur egun gurasoentzat (aitak eta amak) irekitako laguntzen deialdia dago, hilean 417,27 euroko zuzkidurarekin. Eszedentzia eskatzen duten gizonezkoek jaso dezaketen kopurua handitzearen helburua da gizarteari ulertaraztea aitak eta amak seme-alaben zainketan eskubide eta eginbehar berberekin parte hartu behar dutela; era berean, laguntza hauek eskatzen dituztenen artean berdintasun handiagoa lortu nahi da, tradizioz eginkizun horiek emakumezkoei lotuta daude eta.

Deialdi berria 2010eko urtarrilaren 1etik emandako eszedentzietan aplikatuko da eta, beraz, 600 eurora arteko igoera horretatik onurak lor ditzakete atzeraeraginez bai 417,27 euroko laguntza jasotzen duten aitek (kobratutako hilekoei dagokien aldea ordainduko zaie), bai eskatzaile berriek; azken horiek laguntza eszedentzia ematen zaien datatik aurrera jasoko dute.