Landa Garapeneko eta Ingurumeneko Departamentuak eta Aezkoa haraneko Batzar Nagusiek hitzarmena sinatu dute Aezkoa mendiko larreetan artzaintza jasangarria egiteko laguntzak aplikatzeko (Erabilgarritasun Publikoaren Katalogoko 1. zenbakia). Leku horiek Nafarroako Natura 2000 Sarera bilduta daude. Laguntzen bidez, Orreaga-Iratiko Oihana Erkidegorako Intereseko tokiaren ingurumen-babesa bermatu nahi da.

Diru-laguntzaren zenbatekoa 31 euro hektareako da eta Aezkoa mendia antolatzeko proiektura bildutako azalera 2.192 hektareakoa da. Hori dela eta, haraneko Batzar Nagusiak urtean 67.952 euroko diru-laguntza jasoko du, hau da, hitzarmenean ezarritako bost urteetan (2010-2014) 339.760 euro emango dira guztira.

Diru-laguntza horiek jasotzeko, Aezkoa haranak larre baliabideak antolatzeko proiektua onetsi dutela egiaztatu behar du, baita antolamendu-plan horretan ezarritakotik eratorritako jarduerak egiteko konpromisoa ere. Aezkoako abeltzainen bi ordezkarik eta Nafarroako Gobernuko Bioaniztasuna Zaintzeko Zerbitzuko bi funtzionariok osatutako jarraipen batzordea urtean bi aldiz bilduko da gutxienez, kasuan kasuko jardunak betearazteko irizpideak emateko eta emaitzak eta gastuaren justifikazioak gainbegiratzeko.

Sinatutako hitzarmena dela bide, Aezkoa Haraneko Batzar Nagusiek abereak horretarako prestatutako inguruetan pilatzeko konpromisoa hartzen dute (Mendate Handiak, Sariozar, Nabala eta Abodi), 2.545 hektareako azaleran; era berean, Garazirekin (Frantzia) larreen akordioa sinatu behar dute urtero eta laguntzetara bildutako larre-unitate bakoitzerako hitzarmenean ezarri den abere-zama bete beharko dute. Hitzarmenaren arabera, Nabala, Sariozar, Irón eta Abodiko larreak berreskuratzea eta horien hobetze ekologiko eta produktiboa lehentasunezko helburuak dira.

Hitzarmena Andrés Eciolaza Carballo Nafarroako Gobernuko Ingurumen eta Ur zuzendari nagusiak eta Félix Jamar Jauregui Aezkoa haraneko Batzar Nagusiko presidenteak sinatu zuten.