Nafarroako Gobernuak, Nafarroako Administrazio Publikoaren Institutuaren (NAPI) bidez, hitzaldien zikloa antolatu du, "XXI. mendeko giltzarriak, gatazkak eta erronkak" izenburupean. Horien bidez, gaur egungo gizartearen konplexutasunera hurbilketa egin nahi da. Hitzaldiak irailaren 20, 21, 27 eta 28an egingo dira, 19.30ean, Iruñeko Kondestablearen Jauregian. Sarrera doakoa da.

Jardun hau Jesús Ramón Loitegui NAPIko Trebakuntza Zerbitzuko arduradunak zuzentzen du, eta Nafarroako Unibertsitate Publikoarekin lankidetzan antolatu da, Nafarroako unibertsitateen udako ikastaroen hamargarren edizioaren barruan.

Hirugarren edizio honetan, gaur egungo panoramarekin zerikusia duten lau fenomeno aztertuko dira: gizarte berriaren sorrera ziurgabetasun printzipioa nagusi dela, hurbilketa natura-hondamendien arrazoietara eta ondorioetara, gizartearen zerbitzura bideratutako erronka mediatikoen analisia eta finantza-entitateen eta horien bezeroen artean dagoen lotura.

Lehenengo hitzaldia, "Longevidad, incertidumbre y contingencia: el futuro ya no es lo que era", irailaren 20an izango da, Enrique Gil Calvo Unibertsitate Konplutentseko Soziologiako doktorearen eskutik. Hizlaria "Claves de Razón Práctica" aldizkariko ohiko lankidea da. Gaur egungo gizartea aztertuko du, ziurgabetasun printzipioa nagusi dela, maila kolektiboan –arriskuaren sozietatearen fruitua- zein eskala pertsonalean –lan-kolokatasunaren, familia-porrotaren eta jubilazioa zalantzan jartzearen ondorioz-.

Irailaren 21ean, asteartean, Jorge Olcina Cantos Alacanteko Unibertsitateko Erregioko Analisi Geografikoaren katedradunak "Catástrofes naturales: ¿se rompe el planeta Tierra?" hitzaldia eskainiko du. Natura-hondamendiak inoiz baino ohikoagoak eta arriskutsuagoak direla oinarri hartuta, natura-hondamendiek gizakiengan ondorioak izatea saihesteko beharra jorratuko du.

Hirugarren hitzaldia irailaren 27an, astelehenean, izango da, eta Juan Cruz Ruiz idazle, kazetari eta El Paíseko zuzendariorde eta zutabegileak emango du. Masen komunikabideek gaur egungo gizartean duten eragina aztertuko du. Besteak beste, herritarrek informazio akastunak eta manipulatuak eta informazio benetako eta kontrastatuak bereizteko dituzten zailtasunak jorratuko ditu.

Amaitzeko, irailaren 28an, asteartean, Rafael Rubio Gómez-Caminero "Mi Cartera de Inversión" delakoaren zuzendariak "¡Manos arriba, esto es un banco!" hitzaldia emango du. Hizlariak urte luzez modu ez oso gardenean merkaturatu diren eta azken bi urteetan ekonomia eta finantza krisiarekin bat etorriz eztanda egin dute finantza-produktuak aztertuko ditu.