Nafarroako Gobernuak, gaur egindako bileran, 396.000 euroko dirulaguntzak ematea erabaki du "Vitra Parque del Arga" sustatzaileari, Lezkairun (Iruñea) babes ofizialeko etxebizitzen bi proiektuetan C mailako kalifikazio energetikoa lortzeagatik.

Laguntza hauen onarpena 2009ko ekainean, 6/2009 Foru Legearekin, hirigintza eta etxebizitza arloko Premiazko Neurrien arloan abian jarritako neurrien barruan sartzen da. Lege horren 6. artikuluak dio 3.600 arteko laguntzak emango direla etxebizitza bakoitzeko, babestutako etxebizitzen eraikin berrietan energia aurrezteko neurriak sartzeagatik.

Zehazki esanda, 40 euroko laguntza ematen da "A" kalifikazioa lortzen duten etxebizitzen metro karratu bakoitzeko; 30 euro "B" kalifikazioa lortzen dutenen metro karratu bakoitzeko; eta 20 euro "C" kalifikazioa lortzen duten etxebizitzentzako. Eskuratutako ziurtagiria kontsumitutako energiaren eta horri atxikitako CO2 igorpenen estimazioaren araberakoa da, eta hori horrela, "A" kalifikazioa duen eraikina da eraginkorrena eta "G" duena gutxiena.

Kasu honetan, Vitra sustatzaileak "C" kalifikazioa lortu du Lezkairuko bi sustapenetan. Horietariko lehena, 196.384 eurokoa, salerosketa araubideko babes ofizialeko 115 etxebizitzei dagokie. Bigarrena, 200.396 eurokoa, gune bereko beste 115 etxebizitzako sustapen bati dagokio. Sustatzaileak 2010. urtearen joanean jasoko du dirulaguntzaren erdia eta 2012.ean beste erdia.