Nafarroa da atzerritarrak gutxien baztertzen dituen autonomia-erkidegoetako bat, Espainiako arrazakeriaren eta xenofobiaren bilakaerari buruzko 2009ko azterlanaren arabera. Hain zuzen ere, azterlana Arrazakeriaren eta Xenofobiaren Espainiako Behatokiak (Oberaxe) egiten du, Lan eta Immigrazio Ministerioaren menpeko erakundeak.

Txostenean autonomia-erkidegoen arabera aztertzen da herritarrek Espainiako atzerritar kopuruari buruz duten hautematea. Horren arabera, inkestari erantzun diotenen artean, Nafarroa da –Euskal Autonomia Erkidegoaren (%21), Galiziaren (%24) eta Errioxaren (%33) atzetik- etorkinen kopurua "gehiegizkoa" dela uste ez duen laugarren autonomia-erkidegoa. Foru Komunitatean, hala uste dute inkestari erantzun diotenen %38k, nazioko batez bestekoaren azpitik (%46).

Azterlanaren arabera, etorkinen agerpenari buruzko hautematean eta balorazioan, "itxuraz beste faktore batzuek parte hartzen dute, ikusten diren edo inguruan bizi den atzerritar kopuruaz harago". Txostenari erreparatuz, 2008ko urtarrilaren 1ean herrialdean erroldatuta zeuden etorkinak %11,4 ziren, eta Nafarroan, %10,5. Hala ere, espainiarren %46ren ustez (eta nafarren %38ren ustez), atzerritarren agerpena "gehiegizkoa" zen.

Horrez gain, azterlanaren arabera, espainiarren gehiengoa hurrengo honen alde dago: familia berriz elkartzea (hala dio inkestari erantzun diotenen %80k), etorkinek langabeziaren ondoriozko prestazioa jasotzea (%87), eskubideak defendatzeko elkarteak osatzea (%74) eta espainiar naziotasuna lortzea (%69). Era berean, inkestari erantzun dioten pertsonen %62k atzerritarrek udal hauteskundeetan botoa eman behar dutela uste dute.

Arrazakeriaren eta Xenofobiaren Espainiako Behatokiak urtero txosten bat argitaratzen du, Ikerketa Soziologikoen Zentroak egindako zundaketa oinarri hartuta. Azterlan horretako iritzi-datuak Ikerketa Soziologikoen Zentroak 2008ko irailean eta urrian egindako immigrazioarekiko jarreren inkestari dagozkio.