Nafarroako 2011ko Aurrekontu Orokorren Aurreproiektuan 4.188,3 milioi euroko gastua ezarri da. Kopuru hori Nafarroak 2010ean abiatutako berreskuratze ekonomikoa bultzatzera bideratuko da. Modu horretan, enplegua sortu eta gizarte-gastua mantenduko da.

Horiek dira Nafarroako Gobernuak 2011ko aurrekontuen Aurreproiektua onestean finkatutako oinarrizko bi helburuak. Hain zuzen ere, helburu horiek ekonomia eta gizarte politikaren zutabeak dira, gastu gaitasunak behera egin duen arren. Aurrekontua bihar igorriko da Nafarroako Ekonomia eta Gizarte Kontseilura azken horrek irizpena eman dezan, proiektua onetsi eta Foru Parlamentuan aurkeztu aurretik.

Zehatz esanda, Nafarroako 2011ko Aurrekontuetan 2010ekoekin alderatuta %5,01eko beherakada egon da. Álvaro Miranda bigarren presidenteordearen eta Ekonomia eta Ogasun kontseilariaren esanetan, "beherakada albait txikiena izan da, herrialde osorako onetsitako zor publikoaren murrizketa kontuan hartuta". 2011n, Nafarroak 243,6 milioiko zorpetzea aurreikusi du (BPGd-ren %1,3), 2010ko aurrekontuetan baino 251,5 milioi gutxiago (495 milioi, %2,75).

Horrez gain, Miranda presidenteordeak esan duenez, "krisi ekonomikoan egindako kudeaketari esker, Nafarroa 2011rako aurrekontuak gutxien murriztu behar dituen autonomia-erkidegoetako bat da. Zehatz esanda, Estatuko murrizketaren batez bestekoa %7,9 da (%15,6 Ministerioen gastua soilik kontuan hartzen bada). Bestalde, autonomia-erkidego guztiek iragarritako murrizketen batez bestekoa %8 eta %9 bitartekoa da, eta Nafarroan %5,01 soilik izango da".

Aurrekontuen bigarren giltzarria enplegua sortzeko jarduera ekonomikoari emandako bultzada da. Ildo horretatik, aurrekontuetan Nafarroa 2012 Planari bultzada berria ematea aurreikusi da, azpiegituretan eta ekoizpen-zuzkiduretan inbertsioak eginda; xede horretarako 259,7 milioi euroko finantzaketa egongo da. Zenbateko horri Planak 2011rako ezarritako aurrekontuz kanpoko finantzaketa gehitu behar zaio (440,6 milioi euro). Hori dela eta, datorren urtean inbertsioaren zifra osoa 700,3 milioi eurotik gorakoa izango da.

Ildo horretatik, aipatzekoa da 2011n Nafarroako Abiadura Handiko Trenaren lanak hasiko direla, eta Foru Gobernuak 43,2 milioi euroko inbertsioa egingo duela. Horrela, lanen hasiera aurreratuko da, eta ADIF 2013an hasiko da ordaintzen.

Inbertsio publikoa jarduera eta enplegua sortzeko motor ekonomikoa izateaz gain, aurrekontuetan apustu indartsua egingo da I+G+b-n inbertitzeko, 137,6 milioi eurotik gora, hau da, ekimen publikoaren BPGd-ren %0,72. Era berean, Enplegu Planak 57,1 milioi euro izango ditu kontsignatuta 2011n eta krisiaren aurkako neurriak garatzeko beste 77,3 milioi euro egongo dira, batez ere, lanpostuak sortzera bideratuta. Krisiaren aurkako beste neurri batzuen artean, aipatzekoak dira gizarte-enplegu babestua mantentzea eta Oinarrizko Errenta jasotzen duten pertsonen kontratazioa sustatzea, langabeen kontratazioa eta prestakuntza sustatzea, ekintzaile berriak babestea, etxebizitzen zaharberritzea bultzatzea, turismo-sektorea bultzatzea, hiriko merkataritza dinamizatzea, lehiakortasun bono berriak ETEentzat, IEN Plana (Ibilgailu Elektrikoa Nafarroan), eta talentua erakartzea.