Nafarroako Gobernuko Lehendakariak, Miguel Sanz Sesmak, "Estudios de la Administración desde la Administración" liburua aurkeztu du gaur goizean Iruñean. Liburu horretan erakunde publikoen errealitatea zertan den azaldu dute Nafarroako erakunde nagusietan ardura handiko karguak dauzkaten, edo eduki zituzten, hogei langile publiko nabarmenek.

Lana Nafarroako Gobernuak argitaratu du, Ignacio Bandres Urrizaren hilondoko omenaldi gisa. Bandres Nafarroako Administrazio Publikoaren Institutuko zuzendari gerente izan zen azken bi legealdietan, baita Foru Gobernuaren Funtzio Publikoko arduradun nagusi ere 1991tik 2003ra, eta iaz hil zen, gaixotuta.

Liburua gai juridikoei buruzko Pro Libertate bildumako 23. alea da; bilduma hori Bandres berak sustatu zuen 2003an, NAPIko zuzendaritzatik.

NAPIko Pio Baroja aretoan egin duten aurkezpenera bertaratu dira Toki Administrazioko kontseilaria, Amelia Salanueva Murguialday; Kultura eta Turismoko kontseilaria, Juan Ramon Corpas Mauleon; Berrikuntza, Enpresa eta Enplegu kontseilaria, Jose María Roig Aldasoro; eta NAPIko zuzendari gerentea eta idazkari nagusia, Gregorio Eguilaz Gogorza eta Tomas Rodriguez Garraza, hurrenez hurren.

Ignacioren seme Maximo Bandresek, familiaren izenean, "eskerrak" eman dizkie Nafarroako Gobernuko agintariei, 40 urtean aitagan "uste osoa" jartzeagatik eta aita "foru erkidegoko historiaren parte bihurtzeagatik".

Ildo berean, Sanz Lehendakariak honako hau esan du: "Ignacio Bandres oso presente egon da gure artean eta egongo da beti, pertsona, langile eta funtzionario gisa eredugarria izan baitzen; lanean ahalegin handia egiten zuen, eta Nafarroa hobetzea, modernizatzea, garatzea eta aitzindari bihurtzea izan zuen helburu beti, aurrerakuntza eta ongizatea sustatzea".

Liburuaren 800 ale argitaratu dituzte eta 18 euroan salduko dituzte.