2010-2011 ikasturtean 20.000 ikaslek baino gehiagok hartuko dute parte

Javier Esparza Nafarroako Kirol Institutuko zuzendari kudeatzaileak eta Nacho Arberoa Kirol zuzendariordeak eskola-kanpainaren edizio berria aurkeztu dute gaur Iruñeko Kirolaren Etxean. Horren bidez, kirol-jarduera eskani nahi da eta ikasle guztien parte-hartzea bultzatu nahi da, kirolaren prestakuntza eta heziketa izaera azpimarratuz. Horrez gain, nesken parte-hartzea sustatu eta kirol-teknikarien urritasuna arindu nahi da, horien prestakuntza suspertuz.

Era berean, haurren obesitatearen aurka borroka egin nahi da, ariketa fisikoaren bidez, eta bigarren hezkuntzatik aurrera kirol-jarduerak garaia baino lehen bertan behera uztea saihestu nahi da.

Beste helburu garrantzitsu bat kirol modalitaeten kopurua handitzea da. Zehatz esanda, Nafarroako ikasleek 29 kiroletan 45 modalitate praktikatu ahal izango dituzte, lau kategoriatan: kimuak (10-11 urte), haurrak (12-13 urte), kadeteak (14-15 urte) eta gazteak (16-17 urte).

Kirol Jokoetako partaidetza zazpi urtetan bikoiztu egin da

Aurreko kirol kanpainan 19.877 ikaslek parte hartu zuten guztira, hau da, 17. edizioan, 2003-04 denboraldian, parte hartu zuten 10.000 kirolarien zifra bikoiztu egin zen. Aurreko edizioko partaidetzaren balantzeari erreparatuz, eskaririk handiena saskibaloiak, futbolak, eskubaloiak eta pilotak izan zutela ikusten da.

Kategorien arabera, ikasle gehien haur kategorian egon ziren, hain zuzen ere, 6.280 partaide (%31,59), gero kadeteetan, 4.983 partaiderekin (%25.07), kimuetan, 4.333 partaiderekin (%21,80), benjaminetan, 2.361 partaiderekin (%11,88) eta gazteetan, 1.920 partaiderekin (%9,66).

Sexuen arabera, mutilek nesken kopurua ia-ia bikoiztu egiten dute. Mutilak 12.579 izan ziren (%63,28), eta neskak 7.298 (%36,72).

Nafarroako Kirol Jokoen 23. edizioko aurrekontu osoa 1.211.221 eurokoa izan zen. Kopuru horretatik 1.106.801, %91,38, Nafarroako Gobernuaren ekarpena izan zen.