Lizarrako suhiltzaileen parkeak Urederra ibaira erortzearen bi simulazio egin ditu iturburuaren inguruan nola jardun sistematizatzeko; izan ere, inguru horretan txangolari askok istripuak izaten dituzte, inguru horretarako aproposak ez diren jantziekin joaten direlako edo behar den besteko prebentzioarekin jokatzen ez dutelako.

Simulazioak joan den urrian egin zituzten, eta horri esker, inguru horretan ainguraketa sistema ezarri da. Horri esker, suhiltzaileek tirolina erabili ahal izango dute ibaiaren iturburuan, pertsona bat uretara eroriz gero salbamendu segurua egin ahal izateko. Jardun hau Nafarroako Larrialdi Agentziako Suhiltzaileen Zerbitzurako urtero eskaintzen diren prestakuntza planen barruan sartzen da. Plan horren barruan, parke bakoitzak erabakitzen du zer alderdi sakondu nahi duen lan mekanika hobetzeko.

Lehenengo simulazioan 17 efektibok parte hartu zuten, eta bigarrenean 14k. Neurri naturaleko panpina eta ohatila erabili zituzten salbamendu lanak egiteko. Bi suhiltzailek tirolina erabili zuten eta beharrezko maniobrak egin zituzten ohatila ustezko biltima zegoen lekuraino eramateko.

Modu horretan, benetako egoera baten simulazioa egin zuten. Hain zuzen ere, 2007an, Lizarrako emakume bat ibaira erori zen eta korronteak eraman zuen zutik jartzeko gai izan eta iturburuko ur-jauzi nagusiaren atzean babestu zen arte, salbamenduan parte hartu zuten efektiboentzat ezkutuan geratzen zen inguruan. Emakumeak bost ordu egin zituen lur sartune horretan, azkenean aurkitu zuten arte. Lizarrako ospitalera eraman zuten, hipotermia sintomekin.

Lizarrako suhiltzaileak ohituta daude Urederra ibaiaren iturbururako oinezko tartean salbamenduak egitera, jende asko erortzen baita eta orkatila asko bihurritzen baitira. Uretan frogatutako protokoloari esker, ibai-ibilguko jardunak ere hobetu daitezke, hain ohikoak ez diren arren.