Begoña Sanzberro Iturriria Landa Garapeneko eta Ingurumeneko kontseilariak Departamentuak Nafarroan sai arrearen populazioa babesteko abian jarri dituen neurrien emaitzak aurkeztu ditu gaur goizean. Populazio hori egonkortu egin da eta, aldi berean, hegazti nekrofago horien erasoen kopuruak behera egin du. Aurkezpen horretan Enrique Eraso Bioaniztasuna Zaintzeko Zerbitzuko zuzendaria ere egon da. Zerbitzu hori espeziearen populazio dinamika, baldintza demografikoak eta espazioaren erabilera ezagutzeko azterlana egiten ari da.

Landa Garapeneko eta Ingurumeneko Departamentuak garatutako jardun nagusia Hegazti Nekrofagoen Elikadura Osagarriko Puntuen Sarea (PASAN) sortzea izan da. Jardun hori 2008an hasi zen 6 aska jarrita, eta 2010. urtearen amaieran 14 puntu egongo dira, herri hauetan: Napari (Erromantzatua), Irunberri, Zarrakaztelu, Zudairi (Ameskoabarrena), Zangoza, Garralda, Gorramendi (Baztan), Zandueta (Artzibar), Erronkari, Otsagabia, Nabaskoze, Indurain (Itzagaondoa), Zurukuain (Deierri) eta Bardeak. Horietako batzuk epe laburrean operatibo egongo dira, horien kudeaketa plana onesten denean eta giza kontsumora bideratuta ez dauden animalia jatorriko azpiproduktuen kudeaketarako baimendutako establezimenduen barruan inskribatzen dituztenean (Sandach). Neurri hori Europako erregelamendua betetzeko aplikatzen da. Hori dela bide, produktu horien kontrol zehatza egiten da biltzean, garraiatzean, manipulatzean, eraldatzean eta suntsitzean, produktu horiek gizakien edo animalien osasunerako arriskuren bat izatea saihesteko.

PASAN puntuak jartzeari esker, saiak elikadura puntu batera leial bihurtzea lortzen da, puntu horiek elikadura-iturri segurua baitira. Landa Garapeneko Departamentuak egindako kalkuluen arabera, Nafarroan dagoen espezie horren populazioak egunean 2.700 kilo janari behar ditu. 2008an, janlekuetan kopuru horren ehuneko 15 eman zitzaien. 2009an, ehuneko 40. Eta 2010. urtean elikagai beharrizanen ehuneko 70i erantzungo zaio, Departamentuak ezarritako helburua lortuz, ez baita ehuneko hori gainditu nahi. Gainerako %30a basoan hiltzen diren animalia basatietatik lortuko dute.

Horrek esan nai du saiek gaur egun bizirik irauteko behar den beste janari dutela. Landa Garapeneko Departamentuaren arabera, datu horren froga da abere bizidunen aprobetxamenduak (modu okerrean eraso deitzen direnak) apurka-apurka gutxitu egin direla janlekuak abian jarri zirenetik. Animalia bizidunen aprobetxamenduak duela lau urteko mailan kokatzen dira gaur egun.

Nafarroako sai arrearen populazioari dagokionez 2009an egindako azken erroldaren arabera (5 urterik behin egiten dira), populazioa egonkortu egin da, eta gaur egun 2.800 bikote daude. Sanzberro kontseilariak azpimarratu duenez, datua positiboa da, "espeziearen bideragarritasunari eusteko kopuru handia baita eta Foru Komunitatearen lurralderako eta egon dagoen janarirako kopuru egokia baita".

Gogoan izan behar da sai arrearen populazioa duela 30 urte inguru hasi zirela aztertzen Nafarroan. 1979an, populazio habiagilea 312 bikotekoa zen; 1984an, 517 bikotekoa; 1989an, 948 bikotekoa; 1994an, 1.457 bikotekoa; 1999an, 2.004 bikotekoa; 2004an, 2.751 bikotekoa, eta 2009an, 2.783 bikotekoa.