Miguel Sanz Sesma Nafarroako Lehendakariak, Argentinarako bidaia ofizialaren bigarren egunean, lehen mailako osasun zentro bat bisitatu du Funesen, Rosariotik hurbil. Zentro horrek aurten Nafarroako Gobernutik 2.000 euro jaso ditu ekipamendurako, Rosarioko Nafar Etxeak kudeatzen duen laguntza humanitarioko programaren bidez.

Funes Rosarioren ondoan dago eta 1993tik azken herri horretako Nafar Etxearen kirol eta aisia instalazioak kokatzen dira. Kirol instalazio horietan, Aúpa Navarra finka izenekoetan, Reyno de Navarra frontoia dago, Hego Amerikan txapelketa ofizialetarako homologatuta dagoen bakarra. Frontoia Foru Komunitateko funtsekin eraiki zuten eta 2005ean inauguratu zuten. 2008an, frontoia 25 urtetik beherakoen Munduko Pilota Txapelketen egoitza izan zen. Atzo, Sanz Lehendakariak pilota partida ikusi zuen bertan.

Funeseko osasun zentroak 2010ean 2.000 euroko laguntza jaso du hornikuntzetarako eta ekipamendurako, Hego Amerikako nafar zentroek kudeatutako laguntza humanitarioen deialdiaren bidez. Deialdi horren barruan, Rosarioko Nafar Etxeak aurten 12.000 euro kudeatu ditu, lau programa desberdinetarako: laguntza pertsonalizatuak nafar emigranteei edo horien ondorengoei (4.526 euro), Rosarioko Umezurtzen Etxea (2.500 euro), J. Vilela Haur Ospitalea (2.973) eta Funeseko Lehen Mailako Osasun Zentroa (2.000 euro).

Sanz Lehendakaria larru-paleta modalitateko partidara joan zen atzo Reyno de Navarra frontoian. San Francisco Javier txapelketaren finala izan zen, Nafarroako bikote baten (Xabier Menéndez Iturri eta Miguel Fernández Lascoiti) eta Argentinako beste bikote baten (Luciano Cogliarelli eta Mario Bascualdo) artean, eta azken horiek irabazi zuten. Sanz Lehendakariak trofeoak eman eta parte-hartzaileak agurtu zituen.

Txapelketa honetan eta Venado Tuerto herrian egindako beste batean parte hartu duen Nafarroako Federazioko ordezkaritza 8 pilotarik osatu dute: Ibai Barón Aisa, Daniel Berrogui Arrondo, Óscar Labella Moreno, Íñigo Ansó Navarro, Judith Etxarri Elizalde, Haizea Zamora Garaikoetxea, eta aipatutako biak, Miguel Fernández Lascoiti eta Xabier Menéndez Iturri.

Partidaren ostean, Nafarroako folklore erakusketa egin zen Rosarioko Nafar Etxeko dantza taldearen aldetik, eta eguna amaitzeko, senidetasun afaria egin zen. Afarian Argentinako haragi erreak dastatu ahal izan ziren.

Sanz Lehendakariaren bisitak Rosarion jarraituko du gaur. Programaren barruan, Club España izenekora bisita egingo du eta Santa Fe Probintziako Espainiar Toki Entitateen Federazioak harrera egingo dio. Horrez gain, Hermes Binner probintziako gobernadorearekin eta Miguel Ángel Capiello Osasun ministroarekin elkarrizketa izango du. Amaitzeko, Lehendakariak hitzaldia emango du Rosarioko Nafar Etxearen egoitzan.