XIII. Espainia Japonia Foroa gaur inauguratu dute Iruñeko Errege Artxibo Nagusian eta ekitaldian Alberto Catalanek, Erakundeekiko Harremanetarako kontseilari eta Nafarroako Gobernuaren eledunak, parte hartu du.

Inaugurazio ekitaldiko buru izan dira, baita ere, Iruñeko alkate Yolanda Barcina eta Foroko presidentekideak, Josep Pique ministro ohia eta Shinichi Yokoyama. Foroko eztabaidagaiak ekonomiari, berrikuntzari eta ingurumenari lotutako gaiak izango dira, besteak beste ibilgailu elektrikoaren sustapena.

Catalan kontseilariak Xabierko San Frantzisko azpimarratu du, eta esan du gizon nabarmena izan zela "Europako eta Japoniako kulturen artean zubi iraunkor bat eraiki zuten" misiolari europarren artean, eta "globalizazioaren aitzindari" izan zela; Nafarroak globalizazioan du, hain zuzen, jomuga.

Catalanek adierazi du Nafarroa "harro" dagoela "dauzkan jakintza, ahalmen teknologia, berrikuntzaren aldeko apustua eta energia berriztagarrien arloko esperientzia" hain foro garrantzitsuan eskaini ahal izateaz.

"Nafarroako Gobernuak nahi du Foroa Nafarroaren grina eta helburuen isla izatea. Nafarroa erkidego langile, solidario eta berritzailea da. Nafarroak maite ditu bere historia eta tradizioak, eta, aldi berean, irekita dauzka kanporako ateak. Gure erkidegoak uste osoa dauka aurrera egiteko eta garatzeko aukeretan, elkar ulertu eta lan egiteko zubi berriak eraiki nahi ditu, eta itxaropenez eta ilusioz begiratzen dio etorkizunari", esan du kontseilariak.

Gaurko jardunaldietako partaideak hauek dira: Atzerri Arazoetako ministroa, Trinidad Jimenez; Nafarroako Gobernuko Lehendakaria, Miguel Sanz; Ekonomia eta Nazioarteko Harremanetako eta Energia Gaietako zuzendari nagusia, Jose Eugenio Salarich; Ipar Amerika, Asia eta Pazifikoko Kanpo Politikako zuzendaria, Luis Felipe Fernandez de la Peña; Casa Asia erakundeko zuzendari nagusia, Jesus Sanz; eta Japoniako hainbat pertsona ospetsu.

Gaur eta bihar, Espainiako eta Japoniako adituek hainbat gai aztertuko dituzte, besteak beste: ardatz estrategikoaren Pazifikorako desplazamendua eta Asiako herrialdeen, batik bat India eta Txinaren, eszenatoki globalera azaleratzea; Espainiak eta Japoniak sinatu dituzten enpresa eta zientzia arloko lankidetza hitzarmen berriak; eta ibilgailu elektrikoaren eginkizuna, berrikuntzaren eta ingurumenarekiko errespetuaren paradigma gisa