Nafarroako Gobernuak, gaurko saioan, Sustapen Ministerioarekin eta Euskal Autonomia Erkidegoarekin lankidetzan aritzeko protokolo orokorraren testua onetsi du, tarte honen azterlan informatiboaren zuzendarikidetza gauzatzeko: Iruñea – lotura Euskal Y-arekin, kantabriar trenbide-korridorea – Mediterraneoa.

Protokolo horren xedea 3 administrazioen arteko lankidetza da, lurraldean konponbide integratua lortzeko eta horietako bakoitzaren eskumenekoak diren baldintzekin bateragarria izateko.

Testuan jasotakoaren ildotik, Sustapen Ministerioak azterlan informatiboa idatzi eta horretarako beharrezkoak diren zerbitzuak kontratatuko ditu. Azterlana Trenbide Azpiegituren Zuzendaritza Nagusiko teknikari batek zuzenduko du. Era berean, Nafarroako Foru Komunitateak eta Euskal Autonomia Erkidegoak lanen koordinatzailea izendatuko dute. Sustapen Ministerioak egingo du ingurumen-inpaktuaren ebaluazioa, eta azterlan informatiboa idatziko du.

Horrez gain, Nafarroako Foru Komunitateko eta Euskal Autonomia Erkidegoko Administrazioak elkarrekin modu aktiboan lanean arituko dira txostenak biltzeko, eta bitartekariak izango dira beste entitate batzuen eta lurralde-eskumenak dituzten beste administrazio batzuen aurrean.

Gaur onetsitako protokoloaren arabera, azterlana idazteko zerbitzuen kontratazioaren kostua Sustapen Ministerioaren kontura izango da, baina Nafarroako Foru Komunitateak eta Euskal Autonomia Erkidegoak txostenak biltzetik edo hasieran aurreikusi gabeko lan osagarriak egitetik eratorritako gastuak ordaindu ahal izango dituzte.

Protokoloan ezarritakoaren ildotik, jarraipen batzordea sortuko da. Batzorde hori osatuko dute Sustapen Ministerioko Trenbide Azpiegituren zuzendari nagusiak, Eusko Jaurlaritzako Herri Lan eta Garraio salburuordeak eta Nafarroako Gobernuko Herri Lanetako zuzendari nagusiak, edo horiek eskuordetzen dituztenek.