Nafarroaren eta Estatuaren arteko Ekonomia Hitzarmeneko Negoziazio Batzordea Nafarroako Jauregian bildu da gaur goizean. Izan ere, Nafarroako Gobernuak egin zion deia, hitzarmena bosturteko berrirako (2010-2014) eguneratzeko negoziazioak zertan diren ezagutze aldera; estatuaren aldetik Ekonomia eta Ogasun Ministerioa ari da negoziatzen.

Negoziazio Batzordean, Nafarroaren aldetik, Nafarroako Parlamentuan dauden talde eta elkarte guztietako ordezkariak daude: Yolanda Barcina, UPNkoa; Roberto Jimenez, PSN-PSOEkoa; Fermin Ciaurriz, Nafarroa Baikoa; Pablo Archel, IUNkoa; eta Jose Andres Burguete, CDNkoa.

Miranda lehendakariordeak zehatz-mehatz azaldu die Negoziazio Batzordeko kideei Ekonomia Hitzarmena eguneratzeko estatuarekin zer gai negoziatzen ari diren eta negoziazioak nola dauden.

Estatuaren eta Nafarroaren arteko Ekonomia Hitzarmenaren eguneratzea funtsean ekonomia arlokoa da eta, beraz, ez dira zergen legeak eta indarrean dagoen Hitzarmenaren Legea aldatu behar.

Beste gai garrantzitsu batzuk ere badaude, esaterako: legealdi honetan Foruzaingoan sartutako agente berriak Nafarroari ordaintzea eta estatuak Nafarroari osasun eta mendekotasun arloan egin beharreko ordainketen gaineko akordioei eustea.

Miranda lehendakariordeak esan duenaren arabera, Ekonomia Hitzarmena eguneratzeko aurrerapauso nagusia izan da BEZen tartea izenekoak Nafarroan izan ditzakeen eragin negatiboak mugatzea; hasieran konplexua zirudien, baina lortu dute. BEZen tarte hori Nafarroak proposatuta sartu zuten 1998an Ekonomia Hitzarmenean, Nafarroan BEZen bilketak izan ditzakeen gorabeheren berme gisa.

Azkenean, berriz ere Nafarroako Gobernuak proposatuta, estatuk onartu egin du tarte horri eustea, baina eragin negatiboak mugatuta, urteko gehieneko portzentaje baten bitartez; portzentaje horrekin Nafarroak estatuari urtero bueltatu beharreko BEZen gehieneko zenbatekoa argi eta garbi zehaztuko da.

Ekonomia Hitzarmena hurrengo bosturtekorako eguneratzeko akordioarekin, Nafarroaren eta estatuaren arteko finantza harremanak egonkorrak izango dira. Gainera, Nafarroako hurrengo legealdi osoa hartuko du, aldaketa garrantzitsurik egin behar ez bada negoziazio berria eta Ekonomia Hitzarmena 2015. urte amaieratik aurrera gauzatu beharko direlako, maiatzeko hauteskundeen ondoren hasiko den legealdi berria amaitu eta gero

Miranda lehendakariordeak esan duenaren arabera, Nafarroaren eta Estatuaren arteko Ekonomia Hitzarmena eguneratzea "erronka handia da bi administrazioentzat, Autonomia Erkidegoak Finantzatzeko Lege berriak sortutako eszenatokian egin behar delako, eta Lege horrek nabarmen aldatu duelako estatuaren aurrekontu eta eskuduntza egitura, batik bat diru-sarreren arloan eta estatuak erregimen komuneko erkidegoak finantzatzeko eskema berrietan; eta horrek guztiak eragina dauka Nafarroak bere gain hartu beharreko kargak kalkulatzeko moduan".

Gainera, Nafarroako Gobernuko Lehendakari Miguel Sanzek irailean esan bezala, "estatuaren eta Nafarroaren arteko zerga diru-sarreren bilakaeraren aldea keta krisi ekonomikoak nabarmen desdoitu zituen iaz Nafarroak eta estatuak 1998an BEZ kalkulatzeko adostutako formulak; gaur egun, formula horiek kaltegarriak dira Nafarroako ekonomiarentzat eta, zerga diru-sarreren murrizketa ez zuzenduz gero, urteetan luzatuko da".

Gaur, Alvaro Miranda lehendakariordeak Ekonomia Hitzarmenaren Negoziazio Batzordeko kideei jakinarazi die negoziazioa "oso aurreratuta" dagoela eta gai guztietan azken akordioak zehaztea besterik ez zaiela geratzen. Alde horretatik, datozen orduetan erabaki "oso on" bat hartuko dute, asteazkeneko sinadura ekitaldian islatzeko.

Azpimarratu du, gainera, Ogasun eta Aurrekontuen estatu idazkariarekin, Carlos Ocañarekin, "oso ondo moldatu" direla, akordio garrantzitsu horren negoziazioan "zuzenean" inplikatu delako; eta baita Salgado ministroarekin ere. Alabaina, ministroa Miguel Sanz Lehendakariarekin harremanetan egon da eta, horri esker, "negoziazioek bizkor egin dute aurrera".

Nafarraren eta Estatuaren arteko Ekonomia Hitzarmena 1990ean onartu zuten, Lege baten bitartez, eta adostu zuten bost urtean behin eguneratzea.

Azken hiru eguneratzeak estatuarekin adostu zituzten zegozkien bosturtekoak hasi eta bi urte eta erdira, eta, gainera, Kongresuak eta Nafarroako Parlamentuak hainbat lege onartu behar izan zituzten, 1990eko Hitzarmenaren Legea aldatzea ezinbestekoa zelako.

Oraingoan, Nafarroa eta estatua bizkor jarri dira ados, bosturtekoa hasi eta urte betera, lege berriak onartu gabe; izan ere, Hitzarmenean bertan aurreikusitako eguneratze prozesua aplikatu dute eta, prozesu horren arabera, nahikoa da estatuaren eta Nafarroaren arteko Koordinazio Batzordea ados jartzea.

Miranda lehendakariordeak, bihar, PP alderdiaren Nafarroako ordezkariei harrera egingo die, Diputatuen Kongresuan daukaten ordezkaritza dela eta, gaur Negoziazio Batzordean jorratutako gaien berri emateko