Sofia Erreginak Tuterara bisita ofiziala egingo du datorren martxoaren 28an, astelehenean, Gaztambide Antzoki berrituaren inaugurazio-kontzertura joateko. Horrez gain, Erreginak Almirantearen Etxea eraikin historikora bisita egingo du. Etxea María Forcadak hiriari dohaintzan eman dio erabilera soziokulturalerako. Eta Erriberako hiriburuko "Reina Sofía" ospitaleko ordezkaritza hartuko du zentroaren 25. urteurrenean. Bisita 18:00etan hasiko da, eta Erreginak Nafarroako bigarren hirian (biztanleei erreparatuz) egingo duen bisita ia hiru orduz luzatuko da.

Erreginaren lehen geldialdia Almirantearen Etxea izango da. Bertan, Sofia Erregina eraikin historikoaren dohaintza-emailearekin, María Forcada barruen zaharberritzailearekin, bilduko da, bera baita eraikinaren kudeaketaz arduratzen den pertsona. Ondoren, Tuterako hirigune historikoko zentro soziokultural honetan José María Yturralde Valentziako pintorearen erakusketa ikusiko du eta nafar erroak dituen Levanteko artistarekin hitz egingo du.

Jarraian, Erreginak hiriko ospitalea sortu zeneko hogeita bosgarren urteurrena ospatzeko ekitaldian parte hartu ahal izango du. Horretarako, Almirantearen Etxean, Sofía Erreginak ospitaleko ordezkaritza bat hartuko du. Ordezkaritza horrek Nafarroako Erriberako ia ehun mila biztanle artatzen dituen zentroaren mende laurden honetako lorpen nagusiak kontatuko dizkio Erreginari.

Amaitzeko, Erregina Almirantearen Etxea utzi eta 19ak baino minutu batzuk lehenago Gaztambide Antzokira joango da. Antzokiaren berritze lanak amaitu dira eta bertan Erreginak Nafarroako Orkestra Sinfonikoaren inaugurazio-kontzertua entzungo du. Orkestrak Pablo Sarasate Nafarroako konpositorearen lanak interpretatuko ditu, Ernest Martínez Izquierdo zuzendaritzapean, eta bakarlari moduan Tianwa Yang txinatar biolinista duela. Canal 4 Navarrak kontzertua Foru Komunitate osorako eskainiko du.