Miguel Sanz Sesma Nafarroako Lehendakariak eta Rosa Aguilar Rivero Ingurumen eta Landa eta Itsas Inguruko ministroak Nafarroako Ubidearen eta inguru ureztagarriaren lehenengo fasea inauguratu dituzte gaur goizean Pitillasen. Inguru horrek 22.300 hektarea baino gehiago hartzen ditu eta horietatik 14.000 (ia %60) honezkero ureztatu egiten dira eta 35 labore ekoizten dituzte, eta kasuen %17an uzta bikoitzak.

Ekitaldi instituzionalean Amador Jiménez Herrero Pitillaseko alkateak eta Félix Chueca Guindulain Nafarroako Ubideko Ureztatzaileen Komunitateko lehendakariak ere hitz egin dute. Gonbidatu moduan, ekitaldian parte hartu dute Begoña Sanzberro Iturriria, Álvaro Miranda Simavilla eta Laura Alba Cuadrado Nafarroako Gobernuko kontseilariek, Elma Sáiz Gobernuak Nafarroan duen ordezkariak, Rafael Romeo García Ebroko Konfederazio Hidrografikoaren lehendakariak, Foru Administrazioko funtzionarioek, Parlamentuko ordezkariek eta inguruko nekazariek.

Ekitaldi instituzionalaren ostean, agintariak ubidea arautzen duen zentralera joan dira, eta bertan 7B, 8, 09, 10.a eta 10B1 tarteak ireki dira, Ubidearen 1. faseko azkenak. Inbertsio osoa 477 milioi eurokoa izan da. Lanak Sociedad Estatal Canal de Navarra enpresak gauzatu ditu. Enpresa horretan Gobernu Zentralak (%60) eta Nafarroako Gobernuak (%40) partaidetza dute.

Lehenengo fase honetan Ubideko 98 kilometro eta Itoizko urtegiaren oinean kokatutako zentral hidroelektrikoa ireki dira.

Nafarroako Ubidea 180 kilometroko proiektua da eta bi fasetan egingo da. Proiektua amaituta dagoenean, 53.125 hektarea ureztatuko dira guztira eta Iruñerriko industriak eta etxeak hornituko dira, Nafarroako herritarren %70 bertan bizi baita.

Lehenengo fasean 120 milioi eurotik gorako ekoizpen gordina sortuko da eta zuzeneko eta zeharkako 2.200 lanpostu sortuko dira, Ebroko Konfederazio Hidrografikoaren kalkuluen arabera.